Read Tshiluba Malu Menza 20 Bible Online

Malu Menza 20 - Tshiluba bible

Malu Menza 20

¹Mitoyi mimane kujika, Polu kusangisha bena ditaba, kubakolesha ku muoyi, kulayangana nabu. Pashishe kuyaye mu Masedoniya.

²Kupitshilaye munkatshi mua ditunga adi, wenda ukolesha bena ditaba ku muoyi ne malongesha mavule. Pashishe kuyaye mu ditunga dia bena Ngreke.

³Kushalayemu ngondu isatu. Pakavuaye mumane kudilongolola bua kubuela mu majuwa, kuya mu Siriya, kumvuaye lumu ne: bena Yuda mbamuelele tshifufu tshibi. Ke yeye kupangadika bua kulonda njila wa ku makasa, kupitshila mu Masedoniya.

⁴Bavua bamushindikija[175] kudi Sopatere, muana wa Piruse, wa mu tshimenga tshia Bereya, kabidi ne kudi Aristarke ne Sekunduse ba mu Tesalonike, Ngayuse wa mu Derbe, Tishike ne Trofime ba mu Aziya, kabidi ne kudi Timote.

⁵Bonsu abu kudianjila, bua kutuindila mu Trowase.

⁶Kunyima kua tshibilu tshia Mampa kaayi mela buanga, tuetu kumuka ne majuwa mu Filipe, kuenda matuku atanu, kusangana bena ditaba netu aba mu Trowase. Tuetu kushalamu lumingu lujima.

⁷Disambombu dilolu, tuvua basangile bua Didia dia Mfumu[176] Polu uvua uyukila ne bantu bavua basangile netu. Kutungunukaye ne dilongesha too ne mundankulu mua butuku, bualu uvua ne bua kubashiya patshiabu.

⁸Mu nzubu mu tshibambalu tshia kulu mutuvua basangile, bavua batemeshe miendu ya bungi.

⁹Nsongalume mukuabu, dina diende Etike, uvua musombe ku muelelu wa dididishi. Bu muvua Polu ulongesha mukungulu mule, kubungilaye ne tulu, kulala bikole. Bua bukole bua tulu, nsongalume awu kutetuka, kupona panshi ku tshisasa tshisatu tshia nzubu wa tshilala kulu. Bantu kuya bua kumujula. Kadi ukavua mufue.

¹⁰Polu kutuluka, kuya kulala pambidi pende.[177] Pashishe kumuambulaye mu maboku, wamba ne: — Lekelayi kulubakana nanku, udi ne muoyi!

¹¹Pashishe kubandaye tshiakabidi kulu, kudiabu Didia dia Mfumu. Yeye mumane kulongesha kabidi tshitupa tshile too ne ku dinda, ke kushisha kuyaye.

¹²Kupingajabu nsongalume kuabu ne muoyi. Bantu kusanka bikole.

¹³Tuetu kudianjila kubuela mu majuwa, kuya ku Ashose. Ke kutuvua ne bua kuangatshila Polu mu majuwa. Uvua mumane kujadika nanku, bualu uvua ujinga kuyila mu njila wa ku makasa.

¹⁴Pavua Polu utupeta mu Ashose, kubuelaye pende mu majuwa. Tuetu kuya ku Mitilene.

¹⁵Tumuka mu Mitilene, tuetu kufika pabuipi ne tshidila tshia Kiyose dituku divua dilonda. Butshia tuetu kufika mu Samose, butshia[178] kabidi tuetu kufika mu Milete.

¹⁶Bualu Polu uvua musue kupita Efeze, kayi utulamu. Kavua musue kujingakana mu buloba bua Aziya. Uvua uya lukasa, bua kufika mu Yerushalayime dituku dia Pentekostese, bu biobi mua kuenzeka.

¹⁷Pavua Polu mu Milete, kutumaye bantu mu Efeze bua kubikila bakulu ba Tshisumbu tshia bena ditaba.

¹⁸Bakulu bamane kufika, Polu kubambila ne: — Nudi bamanye mumvua musombe matuku onsu atuvua nenu, biangatshile ku dituku dia kumpala dimvua mufike mu buloba bua Aziya.

¹⁹Mvua mukuatshile Mfumu mudimu ne bupuekele buonsu. Bena Yuda bavua bambungamija, bankengesha, bualu bavua bangelela bifufu bibi.

²⁰Nudi bamanye ne: pamvua munulongeshe, munumanyishe malu onsu mu bisangilu ne mu nzubu yenu, tshivua munusokoke bualu nansha bumue buvua mua kunulengelela.

²¹Mvua ndomba bena Yuda ne bantu ba bisamba bikuabu, bua badilengeje, bapingane kudi Mvidi Mukulu, bitabe Mfumu wetu Yezu.

²²Mpindiewu ndi nya mu Yerushalayime, mudi Mueyelu wa Tshijila untuma. Tshiena mumanye bidi mua kungenzekelamu.

²³Ndi amu mumanye ne: ku tshimenga tshionsu, Mueyelu wa Tshijila udi umuanyisha ne: nebakukengeshe, nebakuele mu nzubu wa lukanu.[179]

²⁴Kadi kushala ne muoyi kakuena ne mushinga kundi. Tshidi ne mushinga tshidi anu kujikija mudimu wanyi, kukumbaja mudimu uvua Mfumu mungomekele: ke kukobola Lumu lua Disanka lua mudi Mvidi Mukulu mutunange, mutufuile luse.[180]

²⁵Mvua mutambakane munkatshi muenu bonsu, ndongesha malu a Bukalenga bua Mvidi Mukulu. Kadi mpindiewu ndi mumanye se: muntu nansha umue wa kunudi kakummona kabidi.

²⁶Ke pandi nnujadikila lelu ne: pikala muntu wa kunudi ujimina, tshilumbu tshiende katshiena tshinkuata to.

²⁷Bualu mvua munumanyishe muonsu mudi Mvidi Mukulu ulongolola malu, tshiyi musokoke kalu nansha kamue.

²⁸Dimukayi! Nudilame bimpe, nulame Tshisumbu tshia mikoku,[181] tshidi Mueyelu wa Tshijila munupe. Nukube Tshisumbu tshia bena ditaba, tshidi Mvidi Mukulu mupete ku lufu lua muanende mulela.

²⁹Ndi mumanye ne: pangaya, nyama ya lonji neibuele munkatshi muenu, inyangakaje tshisumbu.

³⁰Munkatshi muenu kabidi nemujuke bantu bakula malu a dishima, bua kukoka bena ditaba bua babalonde.

³¹Nanku nuikale batabale. Nuvuluke ne: bidimu bisatu butuku ne munya, mvua mbela yonsu wa kunudi, nansha ne binsonji ku mesu.

³²Kadi mpindiewu, ndi nnuteka mu bianza bia Mvidi Mukulu, ne mu muaku wa luse luende. Muaku awu udi mua kunukolesha mu ditaba, kunupa bilenga bidi Mvidi Mukulu mulamine bantu badi bende.

³³Tshivua mulombe muntu nansha umue nkanu ya tshiamu tshitoke tshia mushinga mukole, nansha mpawungi, nansha bilamba.

³⁴Nudi bamanye nuenu bine mumvua mukuate mudimu bua kupeta bionsu bituvua tukengela, meme ne bavua nanyi mu luendu.[182]

³⁵Mvua munuleje misangu yonsu ne: ke munudi ne bua kukuata mudimu bikole bua kuambuluisha bakengi. Nuvuluke miaku ivua Mfumu Yezu muambe ne: “Disanka dia kupa ndipite dia kupeta.[183]”

³⁶Polu mumane kuamba nanku, kutuaye binu ne bavuaye nabu, kutendelelabu Mvidi Mukulu.

³⁷Bonsu kudila miadi, kupukila Polu, bamutua mishiku bua kulayangana nende.

³⁸Bavua ne dibungama, nangananga bualu uvua mubambile ne: katuakumonangana kabidi kashidi. Pashishe kumushindikijabu too ne ku majuwa.