Read Tshiluba Malu Menza 22 Bible Online

Malu Menza 22 - Tshiluba bible

Malu Menza 22

¹— Batatu ne bana betu, ntelejayi. Bualu ndi musue kudilumbuluila mpindiewu kumpala kuenu.

²Bantu bumvua ne: Polu udi wakula mu buena ebrewu, kupuwabu talalaa. Ke Polu kuamba ne:

³— Ndi muena Yuda. mBandele mu Tarse wa mu Silisiya. Kadi ndi mukolele mu Yerushalayime emu. Ngamaliyele,[192] ke uvua mundongeshe bimpe bitambe mikenji ya bankambua betu. Mvua mukuatshile Mvidi Mukulu mudimu ne disuminyina, amu munudi nuenu bonsu benza lelu.

⁴Mvua mukengeshe, mushipeshe bavua balonda njila wa Mfumu Yezu. Mvua mukuate balume ne bakaji, mubeleshe mu nkanu.

⁵Mutuangaji munene, ne bena tshipangu tshia bakulu bonsu badi apa, badi mua kujadika bindi ngamba ebi. Bavua bampeshe mikanda, mifundila bana betu bena Yuda ba mu Damase. Ke mumvua mufike muine amu, bua kukuata bavua bitaba Yezu, kupingana nabu mu Yerushalayime, bua babanyoke.[193]

⁶— Mvua nya mu njila. Nkavua pa kubuela mu Damase. Bu mpindiewu, diba munda munya, butoke bunene bufuma mu diulu kumbuikila ne nkenke yabu.

⁷Meme kudishinda panshi, kumvua diyi ne: “Shawule, Shawule, udi unkengesha bua tshinyi?”

⁸Meme kuebeja ne: “Mukalenga, wewe udi nganyi?” Diyi kungandamuna ne: “Ndi Yezu wa mu Nazarete uudi ukengesha.”

⁹Bantu bafuvua nabu kumona butoke, kadi kabavua bumvua diyi dia uvua ungakuisha to.

¹⁰Ke meme kukonka ne: “Mukalenga, ngenze tshinyi?” Ke Mfumu kungandamuna ne: “Juka panshi, uye mu Damase. Momu amu nebakuambile bionsu bidi Mvidi Mukulu mukufundile bua wewe kuenza.”

¹¹Butoke bunene abu buvua bungenza mpofu. Ke batuvua nabu kunkuata ku tshianza, kumfikisha mu Damase.

¹²Momu amu muvua muntu, diende Ananiyase, munangi wa Mvidi Mukulu, uvua ukumbaja bimpe mikenji yetu. Bena Yuda bonsu ba mu tshimenga atshi bavua bamuanyisha.

¹³Ke kufikaye bua kumonangana nanyi. Kusemenaye pabuipi nanyi, ungamba ne: “Muanetu Shawule, tabalaku!” Diba mene adi meme kutabala, kumumona.

¹⁴Kuambaye kabidi ne: “Mvidi Mukulu wa bankambua betu mmukusungule, bua wewe kumanya tshidiye musue, kumona Muntu umue epele uvua mukumbaje tshidiye musue, kudiumvuila ne diyi diende menemene.

¹⁵Bualu wewe ke udi ne bua kujadikila bantu bonsu tshiuvua mumone, ne tshiuvua mumvue bualu buende.

¹⁶Kadi mpindiewu tshiudi windila kabidi ntshinyi? Jukaku, bakutue mu mayi, utonde mu dina dia Yezu, bua mibi yebe ijimine.”

¹⁷— Meme kupingana mu Yerushalayime. Mvidi Mukulu kundeja malu, pamvua ntendelela mu nzubu wende.

¹⁸Meme kumona Mfumu, ungamba ne: “Kolesha, patuka lukasa mu Yerushalayime. Bualu benamu kabakuitaba biudi ulongesha bualu buanyi.”

¹⁹Ke meme kuandamuna ne: “Mfumu, kadi badi amu bamanye mumvua mbuela kale mu nzubu ya kutendelela, mbelesha mu nkanu, nkumisha bantu bavua bakuitaba.

²⁰Pavuabu bashipa mujadiki webe Stefane, meme kabidi mvuapu. Mvua muanyishe bavua bamushipe, mubalamine ne bilamba.[194]”

²¹Kadi Mfumu kungambila amu ne: “Uye! Bualu ndi nkutuma kule, kudi bantu ba bisamba bikuabu.”

²²Bantu bavua bateleja Polu too ne ku miaku eyi. Ke kushishabu kuela mbila ne: — Muntu awu tshiende ndufu! Mushipayi! Tshidiye wenza pa buloba ntshinyi?

²³Kuelabu bibingu, bela bilamba biabu panshi, bela ne buloba mulu.

²⁴Mulombodi wa basolayi ba bena Rome kutuma diyi, bua babuele ne Polu mu lupangu lua basolayi, bamukume mikaba, bua ambe tshidi bantu bamubengele nanku.

²⁵Kadi basolayi bamane kumusuika, ke Polu kuebeja tshindonda tshia mulombodi wabu tshivua muaba awu ne: — Nudi mua kukumisha muntu muena Rome mikaba, kabayi nansha banji kumulumbuluisha anyi?[195]

²⁶Ke tshindonda atshi kuya kuebeja mulombodi wa basolayi ne: — Udi mumvue tshiudi wenza anyi? Muntu ewu mmuena Rome!

²⁷Mulombodi kuya kuebeja Polu ne: — Ngambila tumone, udi muena Rome menemene anyi? Polu kuitaba ne: — Eyowa, ndi muena Rome.

²⁸Ke mulombodi kuamba ne: — Meme ndi mutule lupetu luvule, bua kusumba muanzu wa bena Rome. Ke Polu kuandamuna ne: — Kadi mene, mbandele muena Rome.

²⁹Diakamue basolayi bavua ne bua kukumisha Polu mikaba bua akule, kumukabu muaba awu. Mulombodi wa basolayi kabidi kumvua buowa, bualu uvua mujingulule ne: Polu undi musuikishe nkanu mmuena Rome!

³⁰Butshia, mulombodi wa basolayi kukeba kumanya tshilumbu tshivua bena Yuda bafundile Polu. Kumusuluishaye nkanu. Kubikilaye bamfumu ba batuangaji, ne bena Tshipangu tshikulu bonsu, mu tshisangilu. Pashishe mumane kubueja Polu, kumuimanyikaye kumpala kuabu.