Read Tshiluba Malu Menza 8 Bible Online

Malu Menza 8 - Tshiluba bible

Malu Menza 8

¹Shawule uvua muanyishe pende lufu lua Stefane alu.[75] Dituku mene adi, kutuadijabu kukengesha bikole Tshisumbu tshia bena ditaba tshivua mu Yerushalayime. Bena ditaba bonsu kutangalaka. Kuyabu mu buloba bua Yudeya ne bua Samariya. Bapostolu kudishadila.

²Bantu balamatshi ba Mvidi Mukulu kujika Stefane. Kudilabu bikole bua lufu luende.

³Shawule uvua wenza muende muonsu bua kubutula Tshisumbu tshia bena ditaba. Uvua upita ku nzubu ku nzubu, ukuata balume, ukuata bakaji, ubela mu lukanu.[76]

⁴Bantu bavua batangalaka, bavua bendakana miaba yonsu, balongesha Lumu lua Disanka.

⁵Filipe kuya mu tshimenga tshikulu tshia Samariya,[77] wenda ulongesha bena mu tshimenga ne: Kristu wafiki!

⁶Bantu bavule bavua bateleja ne ntema malongesha a Filipe, bualu bavua bumvua lumu lua bishima bivuaye wenza, babimona kabidi ne abu abidi.

⁷Bualu mikishi mibi ya bungi ivua mikuate bantu, ivua ipatuka, yela mbila mikole. Bena tuneke bavule ne batebuki bavua basanguluka.

⁸Nanku bantu bavua basanka bikole mu tshimenga atshi.

⁹Mu tshimenga amu muvua muntu, dina diende Simone. Ukavua musombemu bidimu bivule. Uvua muena dialu, ukemesha bena Samariya. Uvua udiamba ne: ndi muntu muneme.

¹⁰Bantu bonsu, bana ne bakulumpe, bavua bamuteleja ne ntema, bamba ne: — Muntu ewu ke bukole bua Mvidi Mukulu. “Bukole bunene,” mutudi tuamba, ke budi munda muende.

¹¹Nanku bavua bamuanyisha, bualu uvua ubakemesha matuku mavule ne midimu yende ya dialu.

¹²Kadi Filipe mumane kubakengesha Bukalenga bua Mvidi Mukulu, kabidi ne bukole bua dina dia Yezu Kristu, kuitababu Lumu lua Disanka. Kubatuaye mu mayi, balume ne bakaji.

¹³Simone kabidi kuitaba. Kumutuabu mu mayi. Kushalaye pabuipi ne Filipe. Uvua ukema bua bishima binene ne malu a dikema bivua bienzeka, yeye mumone.

¹⁴Bapostolu bavua mu Yerushalayime, bumvua ne: bena mu Samariya mbitabe muaku wa Mvidi Mukulu, kubatuminabu Petro ne Yowanane.

¹⁵Bobu bamane kufika mu Samariya, kutendelelabu Mvidi Mukulu, bua bena ditaba bapete Mueyelu wa Tshijila.

¹⁶Bualu Mueyelu wa Tshijila kauvua muanji kupuekela nansha muntu umue. Kadi bavua babatua amu mu mayi mu dina dia Mfumu Yezu.

¹⁷Nenku Petro ne Yowanane kubatenteka bianza. Kupetabu Mueyelu wa Tshijila.

¹⁸Kadi Simone umona ne: bena ditaba mbapete Mueyelu wa Tshijila, bualu bapostolu bavua babatenteka bianza, kutuadilaye Petro ne Yowanane makuta,

¹⁹ubalomba ne: — Mpeshayi kabidi bukenji ebu, bua muntu yonsu undi ntentekela bianza, apete Mueyelu wa Tshijila.

²⁰Kadi Petro kumuandamuna ne: — Wewe ne makuta ebe, nubutuke! Bualu udi wela meji ne: dipa dia Mvidi Mukulu tudi mua kudisumba ku makuta!

²¹Wewe kuena mua kukuata netu mudimu nansha kakese, bualu muoyi webe kawena mululame kumpala kua Mvidi Mukulu.

²²Lekela meji mabi auvua nawu. Utendelele Mfumu, bua, bu biobi mua kuenzeka, akufuile luse, bua meji mabi auvua muele.

²³Bualu ndi mumone muudi ne lubabu munda muebe tente, mujingila kudi bubi.

²⁴Ke Simone kuambila Petro ne Yowanane ne: — Ngakuilayi nuenu kudi Mfumu, bua kannyoki munudi nuamba amu.

²⁵Bapostolu babidi aba bamane kujadikila bantu muaku wa Mfumu, kabidi bamane kubumvuijawu, kupinganabu mu Yerushalayime. Mu njila bavua benda balongesha Lumu lua Disanka mu misoku ya bungi ya bena Samariya.

²⁶Mutumibue wa Mvidi Mukulu kuambila Filipe ne: — Pueka kuinshi mu ditunga,[78] ulonde njila wa kale wa mu tshipela, wa kumuka ku Yerushalayime, kufika ne ku Ngaza.

²⁷Filipe kuya diakamue. Mu njila kupetanganaye ne muntu. Uvua muntu mupakula, muntu munene mu bulongolodi bua ditunga dia bena Kushe, mulami wa mpetu yonsu ya mukalenga mukaji wabu.[79] Uvua muye kutendelela Mvidi Mukulu mu Yerushalayime.

²⁸Ukavua upingana kuabu, musombe mu ditempu diende, ubala mukanda wa muambi Yeshaya.

²⁹Ke Mueyelu wa Tshijila kuambila Filipe ne: — Ambuluja, upete ditempu diadia.

³⁰Filipe kusemena, wenda unyema. Kulu vuaye muena Kushe ubala[80] mukanda wa muambi Yeshaya. Filipe kumukonka ne: — Udi mujingulule biudi ubala abi anyi?

³¹Muntu awu kumuandamuna ne: — Nenujingulule bishi, pandi tshiyi ne udi mua kubinjunguluila? Kulombaye Filipe bua abande mu ditempu, asombe pamue nende.

³²Miaku ya mu Mukanda wa tshijila ivuaye ubala ivua nenku: “Uvua bu mukoku udibu baya nawu ku tshishipelu, bu muana wa mukoku udi upuwa, padibu bamukulula boya. Kavua muakule muaku nansha umue.

³³Bavua bamupepeja, banyanga tshilumbu tshiende. Udi mua kuakula bua ndelanganyi yende nnganyi? Bualu bavua bamushipe pa buloba.[81]

³⁴Muena Kushe awu kuebeja Filipe ne: — Ngambila tumone, udi muambi utela ewu nnganyi? Udi uditela anyi, udi utela muntu mukuabu?

³⁵Ke Filipe kumujinguluila miaku ya mu Mukanda wa tshijila ivuaye ubala. Ke muvuaye mumulongeshe Lumu lua Disanka lua Yezu.

³⁶Baya too, kufikabu muaba uvua mayi. Muena Kushe kuambila Filipe ne: — Ke mayi aa. Tshidi tshikandika bua kuntuamu ntshinyi? [

³⁷Filipe kumuandamuna ne: — Pawikala muitabe ne muoyi webe mujima, badi mua kukutua mu mayi. Ke muntu awu kuandamuna ne: — Ndi ngitaba ne: Yezu-Kristu ke Muana wa Mvidi Mukulu![82]]

³⁸Kuimanyikaye ditempu. Filipe ne muena Kushe kutuluka, kubuela bonsu babidi mu mayi. Ke Filipe kumutua mu mayi.

³⁹Bobu bamane kupatuka mu mayi, Mueyelu wa Tshijila kuambula Filipe. Muena Kushe nanshaye kumumona kabidi to. Kutungunukaye ne luendu, wenda usanka.

⁴⁰Filipe kudimona ne: nkadi mu Azote.[83] Kutungunukaye ne luendu too ne ku tshimenga tshia Kezareya. Mu njila uvua wenda ulongesha Lumu lua Disanka mu bimenga bionsu.