Read Tshiluba Rome 10 Bible Online

Rome 10 - Tshiluba bible

Rome 10

¹Bana hetu, ndi njinga ne muoyi wanyi mujima, ndomba kudi Mvidi Mukulu, bua bena Yuda bapete lupandu.

²Bualu ndi mua kubajadikila ne: badi ne disuminyina dikole, bakeba kuenza tshidi Mvidi Mukulu musue. Kadi disuminyina diabu adi kadiena dishindamena pa dimanya dilelela nansha.

³Bualu kabavua bajingulula mushindu udi Mvidi Mukulu ubingisha bantu kumpala kuende nansha. Bavua bakeba kudibingisha nkayabu mushindu wabu. Nanku kabena bitabe mushindu udi Mvidi Mukulu ubingisha bantu nansha.

⁴Bualu Kristu mumane kufika. mikenji ya Moshe kayena kabidi njila wa kuya kudi Mvidi Mukulu to. Nanku mpindiewu badi Mvidi Mukulu ubingisha, ke bonsu badi bitaba.

⁵Telejayi bivua Moshe mufunde bua bantu badi bakeba kubinga ku mesu kua Mvidi Mukulu ku ditumikila dia mikenji: “Muntu udi ukumbaja bidibu bafunde mu mikenji, neapete lupandu kudiyi.[65]”

⁶Kadi umvuayi mudibu bamba bua bantu badi bakeba kubinga ku mesu kua Mvidi Mukulu bua ditaba: “Kudiedi lukonku mundamunda ne: Wabanda mu diulu nnganyi?” (mbuena kuamba ne: bua kutulula Kristu panshi).

⁷Kudiedi nansha lukonku lua ne: “Wapueka mu kandondu nnganyi?” (mbuena kuamba ne: bua kupatula Kristu ku bafue, kumupingaja panu). k

⁸Tshidibu basue kuamba ntshinyi? Mbambe ne: “Muaku wa Mvidi Mukulu udi pabuipi nebe. Udi mukana muebe, ne mu muoyi webe.[66]” Muaku awu ke dilongesha ditudi tulongesha ne: nuitabe.

⁹Paudi ujadika mukana muebe ku mesu kua bonsu ne: Yezu udi Mfumu, paudi witaba mu muoyi webe ne: Mvidi Mukulu mmumubishe ku bafue, neupande.

¹⁰Bualu padi muntu witaba mu muoyi wende, Mvidi Mukulu udi umubingisha kumpala kuende. Padi muntu utonda mukana muende, Mvidi Mukulu udi umusungidila.

¹¹Ke padi Mukanda wa tshijila wamba ne: “Yonsu udi umuitaba, kakufua bundu.[67]”

¹²Nanku kakuena dishilangana pankatshi pa bena Yuda ne bantu ba bisamba bikuabu. Bonsu badi ne Mfumu wa momumue, udi upesha bonsu badi bamubikila bilenga biende.

¹³Ke padi Mukanda wa tshijila wamba ne: “Yonsu udi ubikila Mfumu, nebamusungidile.[68]”

¹⁴Kadi mudibu mua kumubikila kabayi banji kumuitaba mmunyi? Mudibu mua kumuitaba kabayi banji kumvua bamutela mbishi? Mudibu mua kumvua bamutela, muntu kayi umumanyisha, mmunyi?

¹⁵Mudibu mua kumumanyisha, kakuyi bantu badibu bafuma bua kuenza nanku, mbishi? Ke padi Mukanda wa tshijila wamba ne: “Disanka kaayi dia kumona bantu bafika, batutuadila Lumu lua Disanka![69]”

¹⁶Kadi kabavua banyishe bonsu Lumu lua Disanka to. Ke padi Yeshaya wamba ne: “Maweja-Nangila, uvua muitabe bituvua bambe nnganyi?[70]”

¹⁷Nenku ditaba didi difuma ku diteleja dia Lumu ludibu batumanyisha. Lumu alu ludi lufuma ku muaku uvua Kristu mene muambe.

¹⁸Nanku ndi nkonka ne: Kabena bumvue Lumu alu anyi? Eyowa, mbalumvue! Mukanda wa tshijila udi wamba ne: “Diyi diabu divua diumvuike pa buloba bujima, miaku yabu mmifike too ne ku ntengu ya buloba.”

¹⁹Ndi nkonka kabidi ne: Bena Izrayele kabavua bajingulule Lumu alu anyi? Ndi ngandamuna bangabanga bidi Moshe wamba ne: “Mvidi Mukulu udi wamba ne: Nenjule lubabu luenu, bua nubabe bantu badi kabayi tshisamba mene. Nenjule tshiji tshienu, bua nufikile tshisamba tshia bantu badi kabayi ne lungenyi munda.”

²⁰Ke padi muambi Yeshaya ukimina kuamba ne: “Mvidi Mukulu udi wamba ne: Tuamonanganyi ne bantu bavua kabayi bankeba. Ndi mudileje kudi bavua kabayi bangebeja bualu.”

²¹Kadi bua bena Izrayele, muaba mukuabu mbafunde ne: “Dituku dijima mvua muolole bianza kudi bantu bavua bambenga, bantombokela.[71]”