Read Tshiluba Rome 11 Bible Online

Rome 11 - Tshiluba bible

Rome 11

¹Nanku ndi ngebeja ne: Mvidi Mukulu mmubenge bantu bende anyi? Nansha kakese! Bualu meme mene ndi muena Izrayele, wa ku ndelanganyi ya Abrahame, muena tshisamba tshia Binyamine.[72]

²Mvidi Mukulu kena mubenge bantu bende, bavuaye mudianze kudisunguila.[73] Nudi bamanye bidibu bafunde mu Mukanda wa tshijila. Pavua Eliya ufunda bena Izrayele ku tshilumbu kudi Mvidi Mukulu,

³uvua wamba ne: “Maweja-Nangila, bena Izrayele mbashipe bambi bebe, bashimbule kabidi bilambuilu biebe. Meme nkayanyi ndi mushale ne muoyi. Kadi badi bakeba kunshipa.”

⁴Kadi Mvidi Mukulu uvua mumuandamune tshinyi? Kumuandamunaye ne: “Ndi mudilamine bantu binunu muanda mutekete, bavua kabayi batendelela nwidie Baale.[74]”

⁵Momumue kabidi matuku aa, kasumbu ka bantu badi Mvidi Mukulu nkayende mudisunguile, muleje luse luende, katshidiku.

⁶Uvua mubasungule, bualu uvua mubanange. Kavua mubasungule bua midimu ivuabu benze nansha. Tshianana, luse luende kaluvua luse menemene to.

⁷Nanku tudi mua kuamba bishi? Bena Izrayele ki mbapete bivuabu bakebe nansha. Amu bavua Mvidi Mukulu musungule, ke bavua babipete. Bakuabu bavua bapapishe muoyi wabu, bua kabumvu.

⁸Ke padi Mukanda wa tshijila wamba ne: “Mvidi Mukulu mmututubije lungenyi luabu. mMupangishe mesu abu bua kaamonu, matshi abu bua kaateleji, too ne lelu.”

⁹Davide kabidi udi wamba ne: “Ubateye, ubele mu bukondu, padibu basomba ku mesa, badishinde panshi, bapete dinyoka.

¹⁰Upofamije mesu abu, kabamonyi kabidi tshintu. Nyongoboja nyima yabu kashidi.[75]”

¹¹Nanku ndi ngebeja kabidi ne: diba divua bena Yuda balenduke, bavua badishinda bua kulala panshi kashidi anyi? Nansha kakese! Kadi bua tshilema tshivuabu benze, bantu ba bisamba bikuabu kupeta lupandu, bua bena Yuda babakuatshile lubabu,

¹²Pakadi tshilema tshivua bena Yuda benze, tshipetesha bantu ba pa buloba bubanji kudi Mvidi Mukulu, pakadi ntupakanyi yabu yelesha bisamba bikuabu lupemba kudiye, nanku dituku diapinganabu muabu muonsu mu njila wa ditaba, nebapeteshe ba pa buloba bilenga bipite!

¹³Mpindiewu ndi nnuambila nuenu bantu ba bisamba bikuabu ne: ndi mupostolu udibu bafundile mudimu wa kulongesha bantu badi kabayi bena Yuda. Ndi nsanka bua mudimu wanyi ewu.

¹⁴Bualu ndi ntekemena kujula lubabu kudi bena kuetu, bua nansha bamue ba kudibu bamone mua kupeta lupandu.

¹⁵Bualu pavuabu babateke ku luseke, bantu ba pa buloba kupingana mu diumvuangana ne Mvidi Mukulu. Nanku dituku didibu babakidila, nebienzeke bishi? Diba adi nebikale bu bantu badi bumuka ku lufu, babuela mu muoyi.

¹⁶Pikalabu balambula Mvidi Mukulu bia tshianyi bia ntete ya kuenza bukula, ntete mikuabu yonsu idi kabidi ya tshijila.[76] Pikalabu balambula Mvidi Mukulu miji ya mutshi, matamba onsu neikale ende a tshijila.

¹⁷Bena Izrayele badi bu mutshi wa olive, udibu balame mu budimi. Kukosabu matamba makuabu a mutshi awu. Wewe muntu wa ku bisamba bikuabu, udi bu ditamba dia mutshi wa olive uvua muitu. Wewe ke ditamba divuabu bakose ku mutshi wa olive awu, bua kudilamika ku mutshi wa olive uvuabu balame mu budimi, pa muaba wa matamba avuabu bakose. Ditamba adi mpindiewu didi dinua mayi ku miji ya mutshi uvuabu bakune mu budimi.

¹⁸Nanku kuena mua kupepeja matamba avuabu bakose nansha. Wewe kuena wambula miji to. Miji idi ikuambula wewe. Nanku udi mua kuditemba bishi?

¹⁹Kadi neungambile ne: “Bayua bakose matamba a mutshi aa, bua bandamike meme pa muaba wawu!”

²⁰Eyowa, bavua bumushe matamba awu, bualu avua apanga ditaba. Bayua bakulamike wewe pa muaba wawu, bualu bua ditaba diebe. Kadi kuditambishi nansha! Wikale ne buowa!

²¹Bualu pavua Mvidi Mukulu mukose bena Yuda, matamba avua muaba wawu ku mutshi wa olive uvuabu bakune mu budimi, kena mua kukukosa ne wewe kabidi anyi?[77]

²²Tangilayi mudi Mvidi Mukulu ne luse, kabidi ne disu dikole. Udi ne disu dikole kudi bavua balenduka, ukufuila wewe luse. Kadi wewe udi ne bua kunanukila ne dimunanga. Tshianana udi mua kukukosa ne wewe kabidi, kukumusha ku mutshi.

²³Pikala bena Yuda balekela kubenga Mvidi Mukulu, nebabalamike tshiakabidi ku mutshi muaba uvuabu kale. Bualu Mvidi Mukulu udi ne bukole bua kubalamika tshiakabidi ku mutshi.

²⁴Wewe muntu wa tshisamba tshikuabu, udi ditamba divua muaba wadi ku mutshi wa olive uvua muitu. Bavua bakose ditamba adi, badilamika ku bukole pa muaba uvua kauyi wadi, ku mutshi wa olive uvuabu bakune mu budimi. Bena Yuda ke matamba avua muaba wawu ku mutshi wa olive uvuabu bakune mu budimi. Nanku mudimu wa kubalamika tshiakabidi ku mutshi ukavua wabu mmutekete menemene.

²⁵Bana hetu, telejayi bualu bulelela busokome, bundi musue kunumanyisha, bua kanudiangatshi bu bena meji. Bena Izrayele bakuabu mbapapishe muoyi wabu. Kadi bualu ebu nebatungunuke amu too ne padi bisamba bikuabu bionsu bimane kupeta lupandu.

²⁶Ke muasungidilabu bena Izrayele bonsu. Bualu Mukanda wa tshijila udi wamba ne: “Mupikudi neafume mu Siyone. Neumushe buntomboji kudi ndelanganyi ya Yakobe.

²⁷Ke ndondu undi ntua nabu, pandi ngumusha mibi yabu.[78]”

²⁸Patudi lutangila mushindu uvua bena Yuda babenge Lumu lua Disanka, badi baluishi ba Mvidi Mukulu, kadi amu bua nuenu kutuuta dikasa dimpe. Kadi patudi bitangila mushindu uvua Mvidi Mukulu musungule bankambua babu, badi bashala bantu badiye unanga.

²⁹Bualu Mvidi Mukulu kena unyenga tshintu tshidiye mumane kufila. Kena ukudimuna meji avuaye nawu pambidi pa ba-vuaye mubikile.

³⁰Kale nuenu bena bisamba bikuabu, nuvua batombokele Mvidi Mukulu. Kadi lelu Mvidi Mukulu mmunufuile luse, bualu bena Yuda bavua bamutombokele.

³¹Momumue kabidi bena Yuda bavua batombokele Mvidi Mukulu mpindiewu, bua amone mua kunufuila luse, kadi bua amone mua kutuila ne bobu kabidi luse mene alu mpindiewu.[79]

³²Bualu Mvidi Mukulu uvua mubueje bantu bonsu mu buntomboji, bua amone mua kubafuila bonsu luse.

³³Bubanji bua Mvidi Mukulu mbunene be! Meji ende ne dimanya diende mbiondoke! Udi mua kumvuija bidiye wenza nnganyi? Udi mua kujingulula meji adiye nawu, udiku anyi?[80]

³⁴Ke mudi Mukanda wa tshijila wamba ne: “Udi mumanye meji a Maweja-Nangila nnganyi? Udi mua kuikala mufidi wende wa ngenyi, udiku anyi?

³⁵Ukadi mudianze kumupa tshintu, bua Yeye amufute, amupingajile tshikuabu nnganyi?[81]”

³⁶Bualu bionsu bidi bifuma kudiye. Bionsu bidiku ku bukole buende, kabidi bualu buende. Mvidi Mukulu atumbe kashidi tshiendelele! Amene.