Read Tshiluba Rome 16 Bible Online

Rome 16 - Tshiluba bible

Rome 16

¹Ndi nnusengelela bua nuakidile bimpe muanetu wa bakaji Febe, udi ukuatshila Tshisumbu tshia bena ditaba badi mu Kenkreya mudimu.[101]

²Numuakidile mu dina dia Mfumu, mudi bena tshisamba tshia Mvidi Mukulu ne bua kuakidilangana. Numuambuluishe mu malu onsu adiye mua kuikala nenu dijinga. Yeye mene uvua muambuluishe bantu bavule, nangananga meme.

³Elayi Priskila ne Akuila muoyi. Ke bantu batudi tukuatshila nabu Kristu mudimu.[102]

⁴Bavua babuele mu njiwu ya lufu bua kusungidila. Ki mmeme nkayanyi udi ne bua kubela tuasakidila nansha. Bisumbu bionsu bia bena ditaba ba mu bisamba bikuabu bidi ne bua kubela tuasakidila.

⁵Elayi kabidi bena ditaba badi basangile kumbelu kuabu muoyi. Elayi Epayinete, mulunda wanyi musuibue, muoyi. Yeye ke muntu wa kumpala wa mu buloba bua Aziya uvua muitabe Kristu.

⁶Elayi Mariya, uvua munukuatshile mudimu bikole, muoyi.

⁷Elayi Andronikuse ne Yuniyase muoyi. mBana hetu,[103] bavua nanyi mu lukanu. Bapostolu badi babanyisha bikole. Bavua babuele mu Tshisumbu tshia bena Kristu, meme tshiyi muanji kubuelamu.

⁸Elayi Ampliyatuse, mulunda wanyi munda mua Mfumu, muoyi.

⁹Elayi Urbene, utudi tukuatshila nende Kristu mudimu, muoyi. Kabidi ne Stakise wanyi musuibue.

¹⁰Elayi Apelese muoyi. Uvua muleje muende muonsu mudiye witaba Kristu. Elayi bena diku dia Aristobule muoyi.

¹¹Elayi muanetu Erodiyone muoyi. Elayi bena diku dia Narsise badi bitaba Mfumu muoyi.

¹²Elayi Trifene ne Trifose, badi bakuatshila Mfumu mudimu, muoyi; kabidi ne Persida wanyi musuibue, uvua mukuatshile pende Mfumu mudimu bikole.

¹³Elayi Rufuse,[104] muena mudimu musunguluke wa Mfumu, muoyi; kabidi ne mamuende, udi kabidi mamu wanyi meme.

¹⁴Elayi Asinkrite, Flegone, Ermese, Patrobase, Ermase, ne bana hetu bakuabu badi nabu, muoyi.

¹⁵Elayi Filoloke ne Yuliya, Nereya ne muanabu wa bakaji, Olimpase, kabidi ne bena tshisamba tshia Mvidi Mukulu bonsu badi nabu, muoyi.

¹⁶Elanganayi muoyi, nupukilangana ne dinanga bu bantu ba Mvidi Mukulu. Bisumbu bionsu bia bena ditaba ba Kristu bidi binuela muoyi.

¹⁷Bana hetu, ndi nnulomba ne: nudimukile bantu badi bajula ditapulukangana, bakeba kupambula bena ditaba mu njila, babenga bivuabu banulongeshe. Numuke kudi bantu ba nanku.

¹⁸Bualu bantu ba mushindu ewu kabena bakuatshila Kristu Mfumu wetu mudimu, kadi amu difu diabu![105] Badi bamanye mua kuakula bimpe, balongesha ne miaku ya lubombu. Ke mudibu badinga bantu badi ne lungenyi lutekete.

¹⁹Bantu bonsu mbamanye munudi nutumikila Mfumu. Nanku ndi nsanka bualu buenu, njinga bua nuikale bantu ba meji, badi benza amu malu mimpe, babenga malu mabi onsu.

²⁰Mvidi Mukulu, udi utupa bupole, neaboze amu mpindiewu diabolu muinshi mua makasa enu. Dinanga dia Mfumu wetu Yezu Kristu dishindame munda muenu![106]

²¹Timote, utudi tukuata nende mudimu,[107] udi unuela muoyi, kabidi ne Lukiyuse, Yazone ne Sosipatere, bana hetu.

²²Meme kabidi, Tertiyuse, uvua mufunde mukanda ewu,[108] ndi nnuela muoyi munda mua Mfumu, udi utusanga pamue.

²³Ngayuse, muena ku nzubu kundi, muaba udi bena ditaba bonsu basangile, udi unuela muoyi. Eraste, mulami wa mpeta wa mu tshimenga, ne muanetu Kuartase, badi banuela muoyi.[109] [

²⁴Dinanga dia Mfumu wetu Yezu Kristu dikale nenu bonsu. Amene.[110]]

²⁵Tutumbishayi Mvidi Mukulu! Yeye udi mua kunuenza bantu bakole mu ditaba, bilondeshile lumu lua disanka lundi ndongesha. Ke Lumu ludi lutangila Yezu Kristu, ludi lutumanyisha meji masokome avua Mvidi Mukulu nawu, avuaye musokoke kale bidimu bia bungi.

²⁶Kadi mpindiewu bavua baaleje patoke. Mikanda ya bambi idi ijadika nanku. Mvidi Mukulu mmufume diyi bua bamanyishe bisamba bionsu meji masokome aa, bua bitabe Lumu lua Disanka, bitamikile Mvidi Mukulu.

²⁷Mvidi Mukulu, udi nkayende muena meji, utudi bamanye kudi Yezu Kristu, atumbe kashidi tshiendelele! Amene.[111]