Read Tshiluba 1 Korente 10 Bible Online

1 Korente 10 - Tshiluba bible

1 Korente 10

¹Bana hetu, ndi musue bua nuvuluke bivua bienzekele bankambua hetu bayua baya ne Moshe. Divuba divua dibalama bonsu. Ke mutotabu basabuke mayi manene Makunze kakuyi bualu.[45]

²Bu muvuabu bapitshile mu divuba ne mu mayi manene, mbamane kubatua bonsu mu mayi, bua bikale balongi ba Moshe.

³Bayua badia bonsu biakudia bia momumue bidi kabiyi bimueneka.

⁴Bavua banua bonsu biakunua bia momumue bidi kabiyi bimueneka. Bualu bayua banua mayi a ku lubuebue kaluyi lumueneka, luvua luenda nabu.[46] Lubuebue alu ke Kristu.

⁵Kadi nansha bobu benze nanku, bavule ba kudibu kabavua balengelela Mvidi Mukulu. Ke muvuabu bafuile mu tshipela.[47]

⁶Bilejilu ebi bidi bitudimuja, bua katujingi malu mabi, muvua bantu abu baajinge,[48]

⁷kabidi bua kanutendeledi mvidie, muvua bamue ba kudibu benze. Mukanda wa tshijila udi wamba ne: “Bantu aba kusomba mu tshibilu bua kudia ne kunua; pashishe kujukabu bua kuenza malu mabi.[49]”

⁸Katuena ne bua kuenza malu a bundu, muvua bamue ba kudibu benze. Bantu binunu makumi abidi ne bisatu kufua dituku dimue.[50]

⁹Katuena mua kuteta Mfumu, muvua bamue ba kudibu benze. Ke nyoka kubasuma, bobu kufua.[51]

¹⁰Kanuena ne bua kujana Mvidi Mukulu, muvua bamue ba kudibu benze. Mutumibue, uvuabu batume ne lufu, kubashipa.[52]

¹¹Makenga awu avua mabakuate bua kutulongesha bualu. Bayua batufundilewu bua kutubela. Bualu tudi mu tshikondu tshia nshikidilu.

¹²Nanku muntu udi wela meji ne: ndi muimane kulu, adimuke bua kaponyi panshi.

¹³Bualu matetshibua onsu anuvua nawu, ke adibu bateta nawu bantu misangu yonsu. Mvidi Mukulu udi ukumbaja malaya ende. Kakuanyisha bua matetshibua anupite bukole. Kadi diba didibu banuteta, yeye neanupe bukole bua kutua nkanana, kabidi bua kupatuka nabu mu matetshibua.

¹⁴Nanku, balunda banyi bananga, lekelayi kutendelela mvidie.

¹⁵Nudi bantu ba lungenyi. Jingululayi bindi ngamba ebi.

¹⁶Vulukayi dikopu ditudi tuela nadi Mvidi Mukulu tuasakidila, tumutumbisha. Patudi tunuinamu, katuena tudisanga ne mashi a Kristu anyi? Vulukayi diampa ditudi tukosa, diabanyangana. Patudi tudidia, katuena tudisanga ne mubidi wa Kristu anyi?[53]

¹⁷Diampa didi amu dimue epele. Nanku nansha tuetu bikale bavule, tudi tuenza mubidi amu umue, bualu tudi tudisanga bonsu mu diampa dimue adi.

¹⁸Tangilayi bena Izrayele: badi badia bidi bantu balambula, badi badisanga ne Mvidi Mukulu udibu balambula bintu abi.[54]

¹⁹Nudi nuela meji ne: pandi ngamba nanku, ndi ngangata mvidie, nansha munyinyi udibu balambula mvidie, ne mushinga anyi?

²⁰“Nansha kakese! Kadi ndi ngamba ne: bidi batendeledi ba mvidie balambula, kabena babilambula Mvidi Mukulu, kadi amu mikishi mibi.[55] Nanku tshiena musue bua nudisange ne mikishi mibi.

²¹Kanuena mua kunuina mu dikopu dia Mfumu, kunuina kabidi mu dikopu dia mikishi mibi. Kanuena mua kudila ku mesa a Mfumu, kudila kabidi ku mesa a mikishi mibi nansha.

²²Tudi basue kujula Mfumu mukawu anyi?[56] Nudi nuela meji ne: tudi bamupite bukole anyi?

²³Bamue badi bamba ne: “Tudi mua kuenza muonsu mutudi basue.[57]” Eyowa, kadi bionsu kabiena bimpe to. “Tudi mua kuenza muonsu mutudi basue,” kadi bionsu kabiena bilengelela Tshisumbu tshia bena ditaba to.

²⁴Muntu nansha umue kakebi bidi bimulengelela yeye nkayende, kadi akebe bidi bilengelela bakuabu.

²⁵Nudi mua kudia munudi basue munyinyi onsu udibu basumbisha mu tshisalu, kanuyi nupampakana, kanuyi nudiebeja mu kondu kenu ka munda ne: mmifume penyi.

²⁶Bualu Mukanda wa tshijila udi wamba ne: “Buloba ne bionsu bidipu mbintu bia Mfumu.[58]”

²⁷Pikala muntu udi kayi muena ditaba munubikile bua kudia kuende, nuenu banyishe bua kuyamu, nudie bionsu bidibu banulambila, kanuyi nupampakana. Kanuebeji mu kondu kenu ka munda ne: minyinyi eyi mmifume penyi?

²⁸Kadi pikala muntu unuambila ne: “Munyinyi ewu ngwa ku nyama uvuabu balambule mvidie,” kuudi to! Kadi unemeke muntu udi ukuambila nanku, unemeke kabidi kondu ka munda,

²⁹tshiena ngamba ne: kondu kenu ka munda kadi kanupisha; kadi ka muntu mukuabu awu kadi kamupisha yeye. Bumue nenunkonke ne: “Kadi mudi kondu ka bakuabu kankandika mua kuenza mundi musue mbishi?

³⁰Pandi ndia, ngela Mvidi Mukulu tuasakidila, mudibu mua kungasa tshilumbu, pandi ndia bindi ngela nabi Mvidi Mukulu tuasakidila, mmunyi?”

³¹Ke mundi ngamba ne: nansha nudia, nansha nunua, nansha nuenza bualu bukuabu, nuenze bionsu bua kutumbisha Mvidi Mukulu.

³²Kadi kanulenduishi nansha muena Yuda, nansha muntu wa mu tshisamba tshikuabu, nansha Tshisumbu tshia bena ditaba.

³³Ngidikijayi! Ndi ndibamba bua kusankisha bantu bonsu mu malu onsu. Tshiena nkeba bidi bindengelela meme, kadi bidi bilengelela bonsu, bua bapete lupandu.