Read Tshiluba 1 Korente 11 Bible Online

1 Korente 11 - Tshiluba bible

1 Korente 11

¹Ngidikijayi, mundi ngidikija Kristu.

²Ndi nnuela kalumbandi, bualu nudi numvuluka diba dionsu, nukumbaja kabidi bimvua munulongeshe, muvuabu bando-ngeshebi kumpala.

³Kadi ndi musue bua nujingulule ne: Kristu udi Mfumu wa muntu mulume yonsu. Mulume yonsu udi musele, udi mfumu wa mukajende. Mvidi Mukulu udi Mfumu wa Kristu.

⁴Pikala muntu mulume utendelela munkatshi mua bantu, ne tshifulu ku mutu,[59] nansha ubamanyisha malu avua Mvidi Mukulu mumuambile, udi uluisha Kristu bundu.

⁵Kadi pikala mukaji utendelela munkatshi mua bantu ku mutu kutupu, nansha ubamanyisha malu avua Mvidi Mukulu mumuambile, udi ufuisha bayende bundu, bualu udi bu mukaji udibu bakungule mutu.

⁶Pikala mukaji kayi usuika tshitambala ku mutu, mbimpe bamukungule mu mutu! Kadi bu mudi mukaji ufua bundu, padibu bamukungula, nansha bamukosa nsuki, asuike tshitambala ku mutu.

⁷Nanku muntu mulume kena mua kuvuala tshintu ku mutu, bualu udi tshimfuanyi tshia Mvidi Mukulu, tshidi tshileja butumbi buende. Kadi mukaji udi uleja butumbi bua bayende.

⁸Bualu kabavua bafuke mulume mufume kudi mukaji. Kadi bavua bafuke mukaji mufume kudi mulume.

⁹Kabavua bafuke mulume bua mukaji, kadi amu mukaji bua mulume.[60]

¹⁰Bualu bua batumibue,[61] mukaji udi ne bua kusuika tshitambala ku mutu, bua kuleja mudiye ku bumfumu bua bayende.

¹¹Kadi patudi badisange ne Mfumu, mukaji kena mua kuikalaku kakuyi mulume, mulume kena mua kuikalaku kakuyi mukaji.

¹²Bualu, bu mudibu bafuke mukaji mufume kudi mulume, ke mudibu balela mulume kudi mukaji. Kadi bonsu babidi badi bafume kudi Mvidi Mukulu, udi Mufuki wa bionsu.

¹³Dikoselayi tshilumbu nkayenu: mbimpe bua mukaji atendelele Mvidi Mukulu munkatshi mua bantu ku mutu kutupu anyi?

¹⁴Ku bantu, bidi bienza bundu, padi mulume wenda ne nsuki mile,

¹⁵kadi bidi lumu padi mukaji ne nsuki mile, bualu mukaji mmupete nsuki mile bua kudibuikila nayi bu tshitambala.

¹⁶Kadi pikala muntu musue kutontolola bindi ngamba, tshintu tshimuepele tshindi musue kuamba tshidi amu ne: nansha tuetu, nansha Bisumbu bia bena ditaba, katuena ne tshibidilu tshikuabu, patudi tutendelela Mvidi Mukulu.

¹⁷Bua bindi mua kunulongesha mpindiewu, tshiena mua kunuela kalumbandi to. Bualu bisangilu bienu bia ditendelela kabiena binulengelela, kadi bidi binuenzela bibi.

¹⁸Bualu bua kumpala: bayua bangambila ne: panudi nusangila, nudi nuabulukangana mu bisumbu bidi bifuilakana. — Ndi ngitaba bualu ebu tshitupa.

¹⁹(Matapuluka adi ne bua kuenzeka munkatshi muenu, bua badi balama ditaba dilelela, bamueneke patoke.)

²⁰Panudi nudisangisha, kanutshiena nudia didia dia Mfumu.

²¹Bualu diakamue panudi nusomba ku mesa, muntu yonsu udi udia lukasalukasa bidiye mufike nabi, mushindu udi bamue bashala ne nzala, banga bakuatshika maluvu.

²²Kanuena mua kudila ne kunuina ku mbanza yenu anyi? Nudi nupetula Tshisumbu tshia bena ditaba bua tshinyi? Nudi nuluisha badi bianza bitupu bundu bua tshinyi? Nudi basue nmuambile tshinyi? Bua nnuele kalumbandi anyi? Nansha kakese! Tshiena mua kunuela kalumbandi bua malu a nanku nansha!

²³Telejayi bimvua mupete kudi Mfumu, kabidi bimvua munulongeshe. Mfumu Yezu, butuku buvuabu ne bua kumukuata, uvua muangate diampa.

²⁴Kuelaye Mvidi Mukulu tuasakidila. Pashishe kukosololaye diampa, wamba ne: “Etshi mmubidi wanyi, undi ndambula bualu buenu. Enzayi nunku bua kumyuluka.”

²⁵Momumue, bobu bamane kudia, kuangataye dikopu, wamba ne: “Dikopu edi didi ndondu mupiamupia wa Mvidi Mukulu, udi mashi anyi ajadika. Misangu yonsu inudi nunuinamu, nuenze nanku bua kumvuluka.[62]”

²⁶Nenku misangu yonsu inudi nudia diampa edi, nunuina mu dikopu edi, nudi numanyisha bantu lufu lua Mfumu too ne pafikaye.

²⁷Kadi padi muntu udia diampa dia Mfumu, unuina mu dikopu diende, kayi mubiakanyine, nebamuase tshilumbu tshia mubidi ne mashi bia Mfumu.

²⁸Nanku muntu yonsu adikonkonone, pashishe adie diampa, anuine mu dikopu edi.

²⁹Bualu padi muntu udia diampa, nansha unuina mu dikopu edi, kayi mujingulule mubidi wa Mfumu, udi udikebela tshilumbu padiye udia, nansha unua.

³⁰Ke padi ba bungi ba kunudi basama, kabayi ne bukole, bafue kabidi ba bungi.

³¹Bu tuetu mua kudikonkonona kumpala, Mvidi Mukulu kavua mua kutunyoka nanku.

³²Kadi Mfumu udi utulumbuluisha, utunyoka, bua kabavu kutupisha pamue ne bantu bakuabu ba pa buloba dituku dia tshilumbuluilu.

³³Nanku, bana hetu, panudi nudisangisha ku didia dia Mfumu, indilanganayi.

³⁴Pikala muntu ne nzala, adile kuende. Tshianana bisangilu bienu nebinubueje mu tshilumbu kudi Mvidi Mukulu. Kadi bua malu makuabu, nengalongolole pangikala mufike kuenu.