Read Tshiluba 1 Korente 16 Bible Online

1 Korente 16 - Tshiluba bible

1 Korente 16

¹Ndi ngandamuna kabidi ku nkonku inuvua bela pa bintu bidibu basangishila Tshisumbu tshia bena ditaba badi mu Yerushalayime.[86] Nulonde mikenji imvua muelele Bisumbu bia bena ditaba ba mu Ngalatiya.

²Dia lumingu dionsu, yonsu wa kunudi ateke ku luseke tshitupa tshia makuta ende, bilondeshile bungi buvuaye mupete. Atshilame mu nzubu, bua diba dindi mfika, kaditatshishi bua kukeba makuta.

³Pangafika, nentume bantu banuikala basungule, nembapeshe mikanda ya dianyisha, bua bafikishe binudi bafile ku Yerushalayime.

⁴Patuamona ne: mbikumbane bua tuetu kuya nabu, netuye.

⁵Meme mumane kupitshila mu buloba bua Masedoniya, nemfike kuenu aku, (bualu ndi ndonda njila wa Masedoniya.[87])

⁶Bumue nenshale nenu matuku, nansha muvu mujima wa mashika. Nenungambuluishe, bua tufike kuonsu kundi ne bua kuya.

⁷Bualu tshiena musue kunusamba kulukulu. Ndi musue kushala nenu matuku, bu Mfumu mua kuanyisha.

⁸Kadi ndi muele meji a kushala munu mu Efeze too ne ku dituku dia Pentekostese.

⁹Bualu tudi tshikondu tshimpe tshia meme kuenza mudimu munene, nansha bantu bavule banduisha.[88]

¹⁰Pikala Timote mufike,[89] numuakidile bimpe muenu. Bualu udi ukuatshila Mfumu mudimu, mundi ngenza meme.

¹¹Muntu kamupetudi. Numuambuluishe bua atungunuke ne luendu luende bimpe, apingane kundi. Bualu meme ne bena ditaba bakuabu tudi bamuindile.

¹²Mvua musengelele muanetu Apolose bikole, bua afike kuenu aku pamue ne bena ditaba netu bakuabu.[90] Kadi kena musue kuvua mpindiewu. Neafike papetaye diba.

¹³Tabalayi, shindamayi bikole mu ditaba. Kolayi muoyi. Nuikale ne bukitu.

¹⁴Enzayi bionsu ne dinanga.

¹⁵Nudi bamanye Stefanaze,[91] ne ba mu nzubu muende. Bobu ke bantu ba kumpala mu Akaya bavua bitabe, bakuatshile Tshisumbu tshia bena ditaba nabu mudimu. Bana hetu, ndi nnulomba ne:

¹⁶nutumikile bantu ba nenku, nutumikile bonsu badibu bakuate nabu mudimu.

¹⁷Ndi musanke bua difika dia Stefanaze, Fortunatuse ne Akayukuse. Bavua bangambuluisha pa mutu penu, bualu kanuvuapu.

¹⁸Bavua bankolesha mu maboku muyuabu banukolesha nuenu. Nudi ne bua kuangata bantu ba nenku ne mushinga.

¹⁹Bisumbu bia bena ditaba bidi mu Aziya bidi binuela muoyi. Akuila ne Priskila[92] pamue ne Tshisumbu tshia bena ditaba tshidi tshidisangisha ku nzubu kuabu badi banuela mioyi mivule munda mua Mfumu udi utusanga.

²⁰Bena ditaba bonsu badi kunu badi banuela muoyi. Elanganayi muoyi, nupukilangane bu bana ba muntu.

²¹Meme Polu ndi mfunda miaku eyi ne tshianza etshi ne: Muoyi wenu awu.

²²Pikala muntu kayi unanga Mfumu, ikale mutshipa! Maranatha — Mfumu wetu vuakunu![93]

²³Dinanga dia Mfumu Yezu dishindame munda muenu.

²⁴Mu Yezu Kristu ndi mununange buonsu buenu.