Read Tshiluba 1 Korente 4 Bible Online

1 Korente 4 - Tshiluba bible

1 Korente 4

¹Nudi ne bua kututangila bu bantu badi bakuatshila Kristu mudimu, badi ne bujitu bua kulongesha malu masokome a Mvidi Mukulu.

²Kadi tshidibu batekemena kudi muntu udibu bafundile mudimu ntshinyi? Badi bajinga amu ne: aukumbaje pa wowu!

³Nuenu kanuena mua kundumbuluisha bua mushindu undi ngenza mudimu wani. Nansha bantu bakuabu bonsu, bakoshi ba nsambu, kabena mua kundumbuluisha. Meme mene tshiena ndilumbuluisha.

⁴Bulelela kondu kanyi ka munda kakena kampisha nansha kakese. Kadi ebi kabiena bijadika ne: ndi mubinge to. Mfumu ke mukoshi wanyi wa nsambu.

⁵Nanku kanulumbuluishi muntu, diba kadiyi dianji kufika. Indilayi Mfumu. Afike! Yeye nealeje patoke bidibu basokoka mu miidima. Neasokolole bidi bisokome mu mioyi ya bantu. Diba adi muntu yonsu neapete kudi Mvidi Mukulu lumu ludiye ne bua kupeta.

⁶Bana hetu, mu bionsu ebi mvua mutele Apolose, muditele kabidi, amu bu bilejilu bua kunulongesha. Mvua musue bua nujingulule tshidi lusumuinu elu luamba ne: “Nuitabe amu bidibu bafunde.[21]” Muntu nansha umue wa kunudi kena mua kutumbisha mulongeshi umue, kudiwula mukuabu.

⁷Kadi muudi mua kuditemba bu udi mupite bakuabu mmunyi? Bionsu biudi nabi, kuena mubipete kudi Mvidi Mukulu anyi? Kadi muudi mua kuditemba bua bionsu abi, bu muntu udi mudipetelebi mmunyi?

⁸Nudi nuela meji ne: nukadi ne bionsu binudi nujinga anyi? Nukadi bena biuma anyi? Nuenu nukadi bakalenga, tuetu tushala bantu ba patupu anyi? Mvua musue bua nuikale bakalenga bushuwa, bua tuetu kabidi tudie nenu bukalenga!

⁹Bualu ndi mumone ne: Mvidi Mukulu mmututeke tuetu bapostolu muaba wa ku ndekelu. Tudi bu bena tshibawu, bua batushipe, bonsu batangile. Mbatuele mu tshialu bu bena manaya, bua bonsu bautangile, batumibue ba Mvidi Mukulu ne bantu kabidi.

¹⁰Tudi bantu bapale bualu bua Kristu, kadi nuenu nudi ne meji badisange ne Kristu. Tuetu katuena ne bukole, kadi nuenu nudi nabu. Badi batupenda, kadi nuenu badi banunemeka!

¹¹Too ne ku lelu ewu, tudi tukenga, tufua nzala ne nyota, katuyi ne bilamba bikumbane. Badi batutuuta, tutua eku tutua kuaka.

¹²Tudi tukuata mudimu, tupungila bua kudipetela biakudia,[22] Badi batupenda, tudi tubela lupemba. Padibu bankengesha, tudi tulama lutuulu.

¹³Badi batushiminyina malu, tudi tubandamuna ne miaku mimpe. Nansha mpindiewu kabidi, badi batutangila munkatshi mua bantu bu bintu bidibu bakomba bua kubiela ku diala.

¹⁴Ndi nnufundila nenku, ki mbua kunufuisha bundu, kadi amu bua kunubela bu bana banyi bandi nnanga.

¹⁵Bualu, nansha nuenu bapete balongeshi binunu dikumi, badi banuludika mu njila wa Yezu Kristu, kadi tatuenu udi anu umue. Bualu bu mumvua munutuadile Lumu lua Disanka, ndi mudienze tatuenu mu njila unudi nulonda badisange ne Yezu Kristu.

¹⁶Ke pandi nnusengelela ne: ngidikijayi.

¹⁷Ke mundi nnutumina Timote,[23] muananyi munanga, wa diyi dimue munda mua Mfumu. Yeye neanuvuluije bindi ngenza mu didisanga dianyi ne Yezu Kristu. Neanulongeshe malu andi ndongesha miaba yonsu mu Bisumbu bionsu bia bena ditaba.

¹⁸Bamue ba kunudi bayua badiela mulu, bela meji ne: Polu kakufika kuetu bua kumonangana netu.

¹⁹Kadi pasua Mfumu, nemfike kuenu aku lukasa. Diba adi tshiakumanya amu miaku ya badi badiela mulu abu, kadi nenjingulule kabidi bidibu mua kuenza.

²⁰Bualu Bukalenga bua Mvidi Mukulu kabuena bualu bua miaku nansha, kadi bua bukole budi Mvidi Mukulu uleja.

²¹Tshinudi nusungula ntshinyi? Mfike kuenu aku ne lukodi, anyi ne muoyi wa dinanga, kabidi ne miaku mimpe?