Read Tshiluba 1 Korente 8 Bible Online

1 Korente 8 - Tshiluba bible

1 Korente 8

¹Tuyayi ku lukonku lunuvua bangele bua minyinyi ivuabu balambule mvidie:[36] Ndi ngitaba binudi nuamba ne: “Bonsu tudi bamanye malu.” Kadi dimanya edi didi diela muntu mulu. Amu dinanga didi dibakolesha mu ditaba.

²Muntu udi wela meji ne: ndi mumanye, kena muanji kumanya mudiye ne bua kumanya.

³Amu muntu udi unanga Mvidi Mukulu, ke udi Mvidi Mukulu mumanye.

⁴Nuvua bangebeje ne: tudi mua kudia minyinyi ivuabu balambule mvidie anyi? Tudi bamanye bimpe ne: mvidie mikuabu kayenaku to. Mvidi Mukulu udi amu umue.

⁵Bushuwa mu diulu ne pa buloba mudi bintu bidi bantu banemeka ne: mmvidie. — Ke mutudi mua kuamba ne: “mvidie” ne “bamfumu” bidi bia bungi.[37] —

⁶Kadi buetu tuetu kudi Mvidi Mukulu amu umuepele, Tatu, Mufuki wa bionsu. Tudi ne muoyi panu, bua kuya kudiye. Kudi kabidi Mfumu umuepele, Yezu Kristu. Bionsu bidiku ku bukole buende. Tudi bapete muoyi amu kudiye.

⁷Kadi bantu bonsu kabena bamanye bualu ebu to. Bamue badi bibidile ditendelela mvidie. Nanku too ne ku lelu, padibu badia minyinyi eyi, badi amu bela meji ne: tudi tunemeka mvidie ayi. Ke mudi kondu kabu ka munda kabapisha, padibu badia tshiakudia tshia nanku.

⁸Kadi tshidi tshitusemeja pabuipi ne Mvidi Mukulu ki ntshiakudia nansha. Tuetu katuyi badie minyinyi ayi, katuena dijimija tshintu. Tuetu bayidie, katuena tupeta tshintu.[38]

⁹Kadi dimukayi! Bualu panudi nuenza nanku, nudia bionsu binudi basue, bumue nudi mua kulenduisha badi batekete mu ditaba.

¹⁰Bualu muntu udi ne ditaba ditekete, udi mua kukumona wewe, udi wamba ne: ndi mumanye malu, udia mu nzubu wa kutendelela mvidie. Diba adi kuena umusaka bua adie munyinyi uvuabu balambule, udi kondu kende ka munda kabenga anyi?

¹¹Nenku muntu udi kayi ne ditaba dikole awu, neajimine, bualu wewe udi wamba ne: ndi mumanye malu! Yeye mene ke muanenu udi Kristu mufuile!

¹²Panudi nuenzela bana benu bibi, nushipa kondu kabu ka munda kadi katekete, nudi nuenzela Kristu mene bibi.

¹³Nanku pikala biakudia bilenduisha muanetu, kashidi tshiena mua kudia kabidi munyinyi, bua tshifikishi muanetu ku bubi.