Read Tshiluba 1 Korente 9 Bible Online

1 Korente 9 - Tshiluba bible

1 Korente 9

¹Tshiena mua kuenza mundi musue anyi? Tshiena mupostolu anyi? Tshiona mumone Yezu Mfumu wetu anyi?[39] Nuenu kanuena tshipeta tshia ku mudimu undi mukuatshile Mfumu anyi?

²Nansha bakuabu kabayi bitaba ne: ndi mupostolu, kadi buenu nuenu ndi mupostolu. Nanku dijadika dia ne: ndi mupostolu, ke nuenu mene, bualu nudi badisange ne Mfumu.

³Umvuayi mundi ndilumbuluila, mpisha badi banjana:

⁴Pandi nkuata mudimu, kabena ne bua kundisha, kabidi kunnuisha anyi?

⁵Tshiena mua kuya mu luendu ne mukaji muena ditaba, mudi bapostolu bakuabu, Petro ne bana babu ne Mfumu, benza anyi?

⁶Nanku amu meme ne Barnabase,[40] ke badi ne tshilumbu tshia kukuata mudimu ne bianza, bua kupeta tshiakudia tshietu anyi?

⁷Katshia nukadi bumvue bamba ne: musolayi udi mua kudifuta bua mudimu udiye wenza mu mvita anyi? Muntu udi ne budimi bua mvinyo, kena mua kudia tumuma tua mu budimi abu anyi? Udi ulama mikoku, kena mua kunua mabele ayi anyi?

⁸Tshiena njadika bindi ngamba ebi amu ne bilejilu bidi bantu bonsu bamanye to. Mikenji ya Moshe kabidi idi ilongesha bualu bua momumue.

⁹Bualu mbafunde mu mikenji eyi ne: “Ngombe udi ukuata mudimu ushipula miepu, kabena mua kumuela nkata ku mbanga nansha.[41]” Mvidi Mukulu udi bualu ne ngombe anyi?

¹⁰Bionsu bidi Mvidi Mukulu wamba, kena ubiamba bualu buetu anyi? Bushuwa, mukenji awu mmutufundila tuetu. Nansha udi udima, nansha udi ushipula ntete, bonsu mbatekemene kupeta bia ku dinowa.

¹¹Tuvua bamiamine munda muenu maminu a Lumu lua Disanka, adi kaayi amueneka ku mesu. Mutudi katuyi mua kunowa kunudi bia panu bitudi tukengela mbishi?[42]

¹²Padi bakuabu mua kupeta bia nanku kunudi, tuetu katuena mua kubipeta anyi? Tudi bashadile kudibu anyi? Kadi katuvua balombe bituvua mua kulomba nansha. Pa mutu pa kuenza nanku, tuoua tuditatshisha bua kupeta bituvua tukengela, bua katujikidi Lumu lua Disanka ludi lutangila Kristu njila.

¹³Nudi bamanye bimpe ne: badi benza mudimu mu nzubu wa Mvidi Mukulu, badi bapeta biakudia biabu ku bidi bantu bela mu nzubu amu. Badi balambula milambu pa tshilambuilu, badi bapeta tshiabu tshitupa tshia milambu eyi.[43]

¹⁴Ke pavua Mfumu muele mukenji ne: badi balongesha Lumu lua Disanka, bapete biakudia ku mudimu ewu.[44]

¹⁵Kadi meme tshivua mulombe bimvua mua kulomba nansha. Tshiena nnufundila nanku, bua mbipete mpindiewu. Ndi njinga kufua pa mutu pa kubilomba! Muntu nansha umue kena mua kunnyenga lumu luanyi pa bualu ebu to!

¹⁶Tshiena mua kuditemba, bua pandi mmanyisha bantu Lumu lua Disanka nansha. Bualu mbujitu budi bungomekela. Tshiyi ntangalaja Lumu lua Disanka, ndi muena diakabi.

¹⁷Bu meme mudisunguile mudimu ewu, mvua mua kutekemena bua bamfute. Kadi pandi tshiyi ngenza mudimu awu ku disua dianyi, ndi nkumbaja amu bidibu bamfundile.

¹⁸Nanku difutu dindi mpeta ndifutu kaayi? Ke disanka dindi nadi, pandi mua kulongesha Lumu lua Disanka patupu, tshiyi nkeba ne: bamfute, tshiyi ndomba bidi muambi wa Lumu lua Disanka mua kulomba.

¹⁹Ndi mua kuenza mundi musue. Tshiena mupika wa muntu to. Kadi ndi mua kudienza mupika wa bonsu, bua kufikisha kudi Kristu bonsu bandi mua kufikisha.

²⁰Pandi nkuata mudimu munkatshi mua bena Yuda, ndi ndienza muena Yuda, bua kubafikisha kudi Kristu. Nansha meme tshiyi ne bua kulama mikenji ya Moshe, pandi nkuata mudimu munkatshi mua bantu badi bayilama, ndi nyilama kabidi, bua kubafikisha kudi Kristu.

²¹Momumue kabidi, pandi muaba udi bantu kabayi bamanye mikenji ya Moshe, ndi nsomba mudibu basomba bobu, tshiyi ndama mikenji, bua kufikisha bantu aba kudi Kristu. Kadi tshiena musue kuamba ne: ndi mbenga mikenji ya Mvidi Mukulu to. Mikenji indi ndama meme nya Kristu.

²²Pandi ne bantu badi batekete mu ditaba, ndi nsomba amu mudibu basomba bobu, bua kubafikisha kudi Kristu. Ndi nditeka mulongu umue ne muntu yonsu, bua mmone mua kupandisha nansha bamue ba kudibu.

²³Ndi ngenza bionsu ebi bua Lumu lua Disanka, bua mmone mua kupeta bidi Lumu alu lutulaya.

²⁴Nudi bamanye bimpe ne: mu manaya bonsu badi banyema, kadi amu umue udi upeta nsala wa kalumbandi. Nanku nyemayi bikole, bua numupete.

²⁵Bonsu badi banaya nanku, badi badikengesha, bajila bintu bivule. Badi benza nanku bua kupeta nsala wa kalumbandi wa matuku makese. Kadi tuetu tudi tunyema bua kupeta nsala wa kalumbandi udi ushala kashidi.

²⁶Ke pandi nnyema, ntangila tshindi ngipatshila. Tshiena bu mututshianganyi udi wela dinkomu kua patupu.

²⁷Ndi ndituuta bikole, nkengesha mubidi wanyi mujima. Tshianana ndi bu muntu udi ubikila bakuabu bua bipatshile nsala wa kalumbandi, meme mene tshiyi mua kumupeta, mpangila mu njila.