Read Tshiluba 2 Korente 11 Bible Online

2 Korente 11 - Tshiluba bible

2 Korente 11

¹Eyowa ndi musue bua nungitabe, nunganyishe, nansha meme mudileje mutatakane kakese!

²Ndi mununange, munukuatshile mukawu, mudi Mvidi Mukulu mununange, munukuatshile mukawu. Bualu nudi bu mukaji utshidi kamama, umvua mufile kudi bayende umuepele, ke Kristu.

³Nyoka,[43] uvua mupambule Eva ne budimu buende, ke undi ntshina. Bualu meji enu adi mua kupambuka mu njila, nuenu kulekela kunanga Kristu, kulekela kumuitaba ne muoyi umue.

⁴Bualu nudi nuitaba pa lukasa muntu udi unulongesha Kristu mushilangane ne utuvua banulongeshe. Nudi basue kuakidila diakamue mueyelu mushilangane ne unuvua bapete, nuanyisha kabidi Lumu lua Disanka lushilangane ne lutuvua banulongeshe.

⁵Kadi ndi muele meji ne: tshiena mushadile kudi bapostolu benu ba kalanda musenga banudi nuditemba nabu!

⁶Bumue tshiena mumanye mua kuakula bimpe. Kadi bua dimanya, ndi nadi. Ke bimvua munuleje patoke matuku onsu, kabidi mishindu yonsu.

⁷Pamvua munulongeshe Lumu lua Disanka, tshivua mulombe difutu. Mvua mudipuekeshe bua kununemesha. Pamvua muenze nanku, mvua muenze bibi anyi?

⁸Pamvua nkuata mudimu kuenu, mvua muanyishe bua bamfute kudi Bisumbu bikuabu bia bena ditaba. Tuambe ne: mvua mubashiye bianza bitupu, bua mmone mua kunuambuluisha nuenu![44]

⁹Matuku amvua mulale kuenu aku, pamvua nkengela makuta, muntu nansha umue kavua muambule bujitu buanyi. Bana hetu bayua bumukila ku Masedoniya, ke bayua bantuadila bionsu bimvua nkengela.[45] Tshivua musue kunuomekela bujitu buanyi ku kalu nansha kamue. Ke mungenza kabidi mu matuku atshidi kumpala.

¹⁰Mu dina dia bulelela bua Kristu budi munda muanyi, ndi mujadike ne: muntu nansha umue mu ditunga dijima dia Akaya, kena mua kunnyenga lumu luanyi elu.

¹¹Ndi muambe nanku bua tshinyi? Bualu tshiena mununange anyi? Mvidi Mukulu mmumanye mundi mununange!

¹²Nengenze amu mundi ngenza mpindiewu. Bualu tshiena musue bua bapostolu benu ba kalanda musenga abu bambe ne: “Tudi tukuata mudimu mushindu wa momumue ne Polu.”

¹³Bantu abu mbapostolu ba dishima, badi badinga bantu, ba-disokoka[46] badileja bu bapostolu ba Kristu.

¹⁴Katuena ne bua kukema nansha. Diabolu kabidi udi mua kudisokoka, kudileja ne bukenke bu mutumibue wa Mvidi Mukulu.

¹⁵Nanku katuena mua kukema bua padi badi bakuatshila diabolu mudimu, badisokoka, badileja bu bantu badi bakuatshila Mvidi Mukulu mudimu. Kadi ku ndekelu nebabanyoke bilondeshile mudimu uvuabubakuate.

¹⁶Ndi ngambulula ne: muntu kantangidi ne: ndi mupale. Kadi panudi basue kuntangila nanku, nuanyishe bua ngenze bu muntu mupale, bua mmone mua kuditambisha kakese.

¹⁷Bushuwa bindi ngamba mpindiewu, ki mbidi Mfumu musue bua meme kuamba nansha. Pandi ne bua kuditemba nanku, ndi ngakula amu bu muntu mupale.

¹⁸Bu mudi bantu bavule baditemba bua malu a panu, ndi mua kuditemba kabidi.

¹⁹Bu munudi ne meji, nenulengulule ne mimuemue bupale bua bakuabu!

²⁰Nudi nuanyisha bua banutumine diyi, mudibu batumina bapika, bua banunyenge bintu bienu, banudinge, banupetule, banukume minu mu mpala.

²¹Bu mumvua tshiyi ne bukole bua kunukengesha nanku, ndi ngumvua bundu be! Kadi pikala muntu ukimina kuditambisha, — ndi ngakula bu muntu mupale — ndi mua kuditambisha ne meme kabidi.

²²Badi bena Ebrewu menemene anyi? Meme kabidi! Badi bena Izrayele anyi? Meme kabidi! Badi bantu ba ku ndelanganyi ya Abrahame anyi? Nansha meme![47]

²³Badi bakuatshila Kristu mudimu anyi? Nanku, — ndi ngakula bu muntu mujimije lungenyi — meme kabidi ndi mukuatshile Kristu mudimu, mubapite bonsu! Bayua bankengesha bipite muyuabu babakengesha bobu. Bayua bangela mu lukanu misangu ya bungi. Bayua bantuuta bipite. Meme kubuela mu njiwu ya lufu misangu ne misangu.

²⁴Bena Yuda bayua bankuma mfimbu makumi asatu ne tshitema misangu itanu.[48]

²⁵Bena Rome bayua bampiande mfimbu misangu isatu. Bayua bangase mabue musangu umue bua kunshipa.[49] Mvua mudine mu mayi ne buatu misangu isatu. Musangu umue mvua mushale meba makumi abidi ne anayi amu munkatshi mua mayi manene.

²⁶Mu ngendu yanyi kayiyi kubala, mvua mupete njiwu mu misulu, pavua mayi mapasalale. Mvua mupete njiwu kudi banyenganganyi ba bintu, kudi bana hetu bena Yuda, ne kudi bantu ba bisamba bikuabu.[50] Mvua mu njiwu mu bimenga ne mu bipela, pa mayi manene kabidi. Mvua muyipete ne kudi bana hetu ba dishima.

²⁷Mvua mukuate midimu mikole ya dipungi. Mvua mutshishe butuku misangu ne misangu. Mvua mufue ne nyota. Mvua mupange biakudia matuku mulongulongu. Mashika avua mantonde, bualu tshivua ne bilamba bikumbane.

²⁸Mvua mua kutela bikuabu bia bungi. Kadi ntshidi ntela amu tshimue: ke bujitu bundi nabu matuku onsu, ntatshila Bisumbu bionsu bia bena ditaba.

²⁹Padi muntu kayi ne bukole, meme kabidi ndi ndiumvua ne: tshiena nabu. Padi muntu udishinda mu bubi, bidi bimbungamija bikole.

³⁰Bu meme ne bua kuditambisha, nenditambishe bua butekete buonsu bundi nabu.

³¹Mvidi Mukulu, Tatuende wa Mfumu Yezu, mummanye ne: tshiena nshima to. Atumbe kashidi tshiendelele!

³²Pamvua ku Damase, mulombodi wa ditunga, uvua ukuatshila mukalenga wa ditunga Aretase mudimu, uvua muteke basolayi ku biibi bia tshimenga bua kunkuata.

³³Kadi bayua bampatuile ku madidishi a ku tshimana tshia tshimenga. Kuntuluilabu mu tshisaka. Ke mumvua mupanduke mu bianza bia mulombodi awu nanku.[51]