Read Tshiluba 2 Korente 2 Bible Online

2 Korente 2 - Tshiluba bible

2 Korente 2

¹Ke pamvua tshiyi musue kupingana kuenu aku, bua tshinubungamiji tshiakabidi.

²Bualu, bu meme nnubungamija, badi mua kunsankisha kabidi mbanganyi? Amu nuenu bandi mbungamija!

³Ke pamvua munufundile mukanda wanyi awu![9] Tshivua musue kufika kuenu aku, bualu tshivua musue bua bambungamije kudi bantu bavua ne bua kunsankisha. Bualu ndi ngitaba ne: pandi nsanka, nuenu bonsu nudi nusanka.

⁴Eyowa, mvua munufundile mukanda awu ne kanyinganyinga kakole, kabidi ne dipampakana, ne binsonji bivule. Kadi tshivua musue kunubungamija nansha. Mvua musue kunuleja mundi mununange bikole.

⁵Padi umue wa kunudi mubungamije mukuabu, kena mumbungamije meme to. Tuambe ne: mmunubungamije nuenu bonsu, — nansha bamue ba kunudi, bualu tshiena musue kukolesha malu.[10]

⁶Bantu ba bungi ba kunudi mbamunyoke, mbikumbane.

⁷Kadi mpindiewu, nudi ne bua kumufuila luse, kumukolesha ku muoyi, bua kumuepula ku kanyinganyinga kakole kapite, kadi mua kumutekesha mu mikolu kashidi.

⁸Ke pandi nnulomba ne: munuenzele bimpe, numuleje munudi bamunange.

⁹Bualu pamvua munufundile mukanda wanyi, mvua musue kunuteta kabidi, bua mmone ne: nutshidi amu basue kuitaba bindi nnufundila anyi?

¹⁰Panudi nufuila muntu luse bua tshilema tshivuaye muenze, meme kabidi ndi mmufuila luse. Bualu pandi mfuila muntu luse — pandi ne tshilumbu tshia kufuila muntu luse — ndi mmufuila bualu buenu kumpala kua Kristu.

¹¹Bualu tshiena musue bua diabolu atutshimune. Bualu tudi bamanye meji mabi adiye nawu.

¹²Pamvua mufike mu Trowase, bua kumanyisha bantu Lumu lua Disanka lua Yezu Kristu, mvua musangane ne: Mvidi Mukulu, bualu bua dinanga didiye utunanga nadi, mmunzuluile njila muimpe wa meme kuenza mudimu.

¹³Kadi mvua mupampakane bikole, bualu tshivua musangane muanetu Tite. Ke mumvua mulayangane ne bena mu Trowase, bua kuya ku Masedoniya.[11]

¹⁴Kadi tutumbishayi Mvidi Mukulu, bualu misangu yonsu udi utubueja mu mulongu wa badi batshimuna, patudi badisange ne Kristu. Udi utuangata bu bena mudimu bende, bua tumanyishe Kristu miaba yonsu, mudi dipembu dia manananshi ditangalaka miaba yonsu.

¹⁵Bushuwa, tudi bu mulambu wa manananshi udi Kristu ulambula Mvidi Mukulu; tudi dipembu diawu[12] didi ditangalaka kudi badi mu njila wa lupandu, ne kudi badi babutuka.

¹⁶Bua badi bajimina, dipembu adi didi diumvuika mupuya mubi udi ufila lufu. Bua badi mu njila wa lupandu, dipembu adi didi diumvuika mupuya muimpe udi ufila muoyi. Nanku udi ne bukole bua kukumbaja mudimu wa mushindu ewu nnganyi?

¹⁷Tuetu katuena bu bantu bakuabu ba bungi badi batangila muaku wa Mvidi Mukulu bu bintu bia kuenda nabi mushinga. Kadi tuetu tudi tunumanyisha muaku wa Mvidi Mukulu, katuyi tukeba kudisankisha muinshi muinshi. Mvidi Mukulu mmututume. Ke patudi tuvuluka mudiye uditangila, tukuata mudimu badisange ne Kristu.