Read Tshiluba 2 Korente 7 Bible Online

2 Korente 7 - Tshiluba bible

2 Korente 7

¹Bana hetu basuibue, ke bivuabu batulaye tuetu. Nanku tudilongololayi, tumushe manyanu onsu adi pambidi, tuditokeshe kabidi mu muoyi wetu. Tuikale bantu ba tshijila menemene, badi benza bidi Mvidi Mukulu musue.

²Tunzuluilayi mioyi yenu! Katuena benzele muntu nansha umue bibi. Katuena banyenge muntu bivuaye nabi. Katuena bakengeshe muntu.

³Tshiena ngamba nanku bua kunudiwula. Bualu nkadi mumane kunujadikila ne: tudi banunange bikole. Ke mutudi nenu matuku onsu kaba kamue, nansha tuetu ne muoyi, nansha tufua.

⁴Ndi nnuambila malu onsu patoke! Ndi nditemba bualu buenu! Mu makenga etu onsu ndi mukoleshe amu muoyi, mumvue kabidi amu disanka dipite.

⁵Nansha patuvua bafike ku Masedoniya,[28] katuvua ne dikisha nansha dikese. Tuvua bapete ntatu nseke yonsu: baluishi bavua batutatshisha; tuvua kabidi ne dipampakana mu muoyi.

⁶Kadi Mvidi Mukulu udi usamba badi batekete mu maboku, kutukolesha ku muoyi diba divua Tite mufike.

⁷Katuvua amu bakole muoyi bua difika diende nkayadi, kadi nangananga bua bivuaye mutuambile bua mushindu unuvua bamukoleshe kabidi ku muoyi. Uvua mutulondele munudi nujinga bikole kumonangana nanyi, munudi nubungama bua bivua bienzeka, munudi basue kutua ku tshianyi. Ke padi disanka dianyi dipita kuvulangana lelu.

⁸Bualu mukanda wanyi umvua munutumine,[29] uvua munubungamije. Kadi lelu tshiena nnyingalala bua bimvua munufundile nansha. Pamvua mumvue muvua mukanda wanyi munubungamije, mvua muanji kunyingalala.

⁹Kadi lelu ndi ne disanka. — Tshiena nsanka bua pamvua munubungamije, kadi bua padi dibungama dienu dinupetesha bukole bua kudilengeja.[30] Mvidi Mukulu uvua mukuate mudimu ne dibungama dienu adi. Ke pamvua katuyi banuenzele bibi nansha.

¹⁰Padi Mvidi Mukulu ukuata mudimu ne dibungama dietu, udi utuambuluisha bua tudilengeje, tupete lupandu. Ke patudi katuyi mua kunyingalala nansha. Kadi patudi tubungama tujinga bia panu, tudi tukeba lufu.

¹¹Monayi muvua Mvidi Mukulu mukuate mudimu ne dibungama dinuvua nadi! Mpindiewu nukadi nutua tshilumbu atshi tshiadi. Nukadi nukeba kuleja munudi babinge! Nudi bafikile muena tshibawu munda. Nudi nutshina tshiji tshianyi, nujinga kumonangana nanyi! Nudi ne disuminyina, nukeba kunyoka badi benza bibi! Ke munudi baleje muenu muonsu munudi babinge mu tshilumbu atshi.

¹²Tshivua munufundile mukanda, bualu bua muntu uvua muenze bibi, nansha bualu bua muntu uvuabu benzele bibi[31] to. Kadi mvua musue kunuleja patoke ku mesu a Mvidi Mukulu, munudi nujinga kutua ku tshianyi.

¹³Ke munuvua benze! Ke munuvua batukoleshe ku muoyi! Kadi katuvua bakole amu muoyi. Tuvua kabidi bumvue disanka dipite bunene, patuvua bamone Tite usanka bikole bua mushindu unuvua bonsu bamusambe.

¹⁴Mvua muanji kuditemba kakese bualu buenu ku mesu kuende. Nanku kanuena bamfuishe bundu. Bualu bu mutuvua banuambile misangu yonsu amu malu malelela, nansha pamvua muditembe bualu buenu ku mesu a Tite, tshivua mushime to.

¹⁵Mpindiewu udi mununange bipite muvuaye muenze kumpala, bualu udi uvuluka munuvua bonsu bajinge kumutumikila, kabidi munuvua bamuakidile ne kanemu, kabidi ne luzakalu.

¹⁶Ndi musanke bua pandi mua kutekemena muanyi muonsu kunudi.