Read Tshiluba 2 Korente 9 Bible Online

2 Korente 9 - Tshiluba bible

2 Korente 9

¹Tshiena ne bua kunutumina mukanda bua kunulomba, bua nuambuluishe pamue netu bantu ba Mvidi Mukulu badi mu Yudeya.

²Bualu ndi mumanye munudi basue kuambuluisha. Ke mumvua muditambishe bualu buenu, ngambila bena Masedoniya ne: “Bana hetu ba mu Akaya bakadi babange kusangisha bintu kukadi tshidimu tshijima.” Nanku disuminyina dienu divua disonsola ba bungi ba kudibu.[38]

³Kadi ndi nnutumina bana hetu aba, bua diditemba dietu bualu buenu kadikadi dia patupu. Ndi musue bua banusangane nuenu bamane kusangisha bintu, mumvua muambe.

⁴Kadi bu tuetu mua kufika ne bena Masedoniya banusangane kanuyi basangishe bintu, bundu nebutukuate tuetu bavua batekemene bikole kunudi! Kadi nangananga nebunukuate nuenu!

⁵Ke pamvua muele meji ne: ndi ne bua kusengelela bana hetu aba, bua badianjile kuenu aku kumpala kuanyi. Basangishe muaba umue binuvua balaye ne muoyi wa kalolu. Nanku pangafika, nembisangane. Ke munudi mua kuleja bantu munudi nubifila ne muoyi wenu mujima, kabayi banuenzeja malu ku bukole.

⁶Vulukayi ne: udi umiamina bikese, neanowe bikese; udi umiamina bia bungi, neanowe bia bungi.

⁷Muntu yonsu afile mudiye muele meji, kayi ne muoyi mujoboke, kabayi bamuenzeje malu ku bukole. Bualu Mvidi Mukulu udi unanga udi upa ne disanka.

⁸Mvidi Mukulu udi ne bukole bua kunuvudijila bintu bilenga bia mishindu yonsu, bua nupete matuku onsu bionsu binudi nukengela, nushale ne bikuabu bipite bungi bua kuambuluisha nabi bakuabu.

⁹Ke padi Mukanda wa tshijila wamba ne: “Udi upesha bakengi matuku onsu, kayi ubatompuela, ubaleja muoyi wa kalolu kashidi tshiendelele.[39]”

¹⁰Mvidi Mukulu udi upesha tshidime maminu ne biakudia,[40] neanupeshe maminu onsu anudi nukengela. Neaameneshe kabidi. Nanku muoyi wenu wa kalolu neukuame bimuma bimpe.

¹¹Diba dionsu neavudije biuma bienu, bua numone mua kuambuluisha bakuabu ne muoyi wa kalolu. Nanku bantu ba bungi nebele Mvidi Mukulu tuasakidila, bua bintu bienu bitudi mua kubapesha.

¹²Bualu mudimu unudi nukuata awu kawena wambuluisha amu bena tshisamba tshia Mvidi Mukulu. Kadi netupete kabidi tshipeta tshikuabu tshipite bimpe, bualu bantu ba bungi nebele Mvidi Mukulu tuasakidila.

¹³Panudi nukumbaja mudimu ewu ne muoyi umue, bantu ba bungi nebatumbishe Mvidi Mukulu bualu buenu. Nebanuele tuasakidila, bua panudi nuitaba Lumu lua Disanka lua Kristu muenu muonsu, kabidi bua muoyi wa kalolu unudi nuabanyangana nabu, kabidi ne bantu bakuabu bonsu, bintu bienu.

¹⁴Nebanulombele kudi Mvidi Mukulu. Nebanunange bikole, padibu bamona mudi Mvidi Mukulu mupite kunuenzela bimpe.

¹⁵Tuelayi Mvidi Mukulu tuasakidila bua mapa ende, adi mapite bionsu bitudi mua kuela meji.