Read Tshiluba Ngalate 1 Bible Online

Ngalate 1 - Tshiluba bible

Ngalate 1

¹Meme Polu, udi unufundila mukanda ewu, ndi mupete mudimu wa bupostolu ki nkudi bantu, nansha ku diambuluisha dia muntu, kadi kudi Yezu Kristu, ne kudi Mvidi Mukulu Tatu, udi umubisha ku lufu.

²Meme ne bana hetu bonsu badi kunu, tudi tunuela muoyi, nuenu badi mu Bisumbu bia bena ditaba bia mu Ngalate,[1] tunujingila ne:

³Dinanga ne bupole bia kudi Mvidi Mukulu Tatu wetu, ne bia kudi Yezu Kristu, bishindame mu mioyi yenu.

⁴Kristu mmudifile bua kutusungidila ku mibi yetu, kutupikula ku tshikondu tshibi tshia lelu etshi. Ke muvuaye mukumbaje bivua Mvidi Mukulu Tatu wetu musue.

⁵Mvidi Mukulu atumbe kashidi tshiendelele! Amene.

⁶Nudi bankemeshe bikole! Mvidi Mukulu, uvua munubikile ku luse lua Kristu, nuenu kumushiya lukasa nanku, kulonda Lumu lua Disanka lukuabu![2]

⁷Bushuwa, kakuena Lumu lua Disanka lukuabu nansha! Kudi amu bantu bakuabu badi banudinga, basue kushintulula Lumu lua Disanka lua Kristu.

⁸Kadi pangikala meme, nansha muntu mukuabu, nansha mutumibue mene wa Mvidi Mukulu, tunulongesha Lumu lua Disanka bishilangane ne lutuvua banulongeshe, tuasangana bena tshibawu kuenza anyi? Tuenza!

⁹Tukavua bamane kunuambila kale bindi ngambulula lelu ne: muntu udi unulongesha Lumu lua Disanka lushilangane ne lutuvua banulongeshe, mmuena tshibawu!

¹⁰Nudi nuela meji ne: ndi nkeba bua bantu banganyishe anyi? Nansha! Ndi musue amu bua Mvidi Mukulu anganyishe! Ndi nkeba kusankisha bantu anyi? Bu meme nkeba kusankisha bantu, tshi vua mua kuikala muena mudimu wa Kristu to.

¹¹Bana hetu, ndi nnujadikila ne: Lumu lua Disanka lundi ndongesha kaluena lufume kudi bantu to.

¹²Tshivua mulupete kudi muntu. Kabavua bandongeshe lumu elu nansha. Kadi anu Kristu uvua mudileje kundi, ke uvua mulummanyishe.

¹³Nudi bamanye mumvua musuminyine kale malu a Mvidi Mukulu adi bena Yuda balongesha, nkengesha ne tshikisu Tshisumbu tshia bena ditaba ba Mvidi Mukulu, nkeba kutshibutula.

¹⁴Mvua mukumbaje bimpe bitambe malu a ditaba dia bena Yuda, mupite bena mulongu wanyi bavule. Mvua musuminyine bibidilu bia bankambua, kakuyi wa kufuanangana nanyi.[3]

¹⁵Kadi bu mudi Mvidi Mukulu munnange, ukavua mudianze kunsungula, kabayi banji kundela, bua meme kumukuatshila mudimu.

¹⁶Diba divuaye musue kutumanyisha Muanende, bua meme kumanyisha bantu ba bisamba bikuabu Lumu luende lua Disanka, tshivua muye kulomba meji kudi muntu.[4]

¹⁷Tshivua nansha muye ku Yerushalayime, bua kumonangana ne bakavua bapete mudimu wa bupostolu kumpala kuanyi. Kadi diakamue mvua muye ku Arabiya. Pashishe meme kupingana ku Damase.

¹⁸Amu kupita bidimu bisatu, meme kushisha kuya ku Yerushalayime, bua kumonangana ne Petro. Tuvua nende mbingu ibidi bulubulu.[5]

¹⁹Kadi tshivua mumone mupostolu mukuabu nansha umue, pa kumusha Yakobe, muanabu ne Mfumu.[6]

²⁰Bindi nnufundila ebi mbilelela. Ndi njadika ku mesu a Mvidi Mukulu ne: tshiena nshima.

²¹Pashishe meme kuya mu buloba bua Siriya ne bua Silisiya.

²²Tshikondu tshijima atshi, bena ditaba ba mu Bisumbu bia bena Kristu bia mu Yudeya kabavua banji kutumona to.

²³Bavua anu bamanye bivua bantu bamba ne: “Muntu ewu uvua mutukengeshe kale, ukadi ulongesha ditaba divuaye ukeba kubutula.”

²⁴Ke muvuabu bela Mvidi Mukulu tuasakidila, bua bivuaye mungenzele.