Read Tshiluba Ngalate 2 Bible Online

Ngalate 2 - Tshiluba bible

Ngalate 2

¹Kupita bidimi dikumi ne binayi, tuvua bapingane ne Bamabase ku Yerushalayime. Meme kuangata kabidi Tite, bua aye netu.[7]

²Mvidi Mukulu mene uvua mundeje mumvua ne bua kuyaku. Patuvua nkayetu mu tshisangilu ne balombodi ba Tshisumbu, mvua mubumvuije Lumu lua Disanka lundi ndongesha bantu ba bisamba bikuabu. Tshivua musue bua mudimu umvua nkuata kale, nansha undi nkuata lelu, wikale wa tshianana.

³Nanku Tite, utudi tukuata nende mudimu, nansha yeye muena Ngreke, ki mbambe bua bamuteke panshi.

⁴Bushuwa bena ditaba bakuabu, bena mpala ibidi,[8] bavua babuelakane netu, bavua basue kumutekesha panshi. Bantu aba mbabuele mu Tshisumbu tshietu bua kututentekela, kumona mutudi tudienzela bitudi basue, bualu tudi tuitaba Yezu Kristu. Nanku bavua basue kutupingaja mu bupika.

⁵Kadi tuetu, katuena bitabe nansha kakese bivua bantu aba balombe, bua numone mua kuitaba Lumu lua Disanka pa lolu.

⁶Kadi bantu bavua balombodi ba Tshisumbu kabavua bangambile malu makuabu a meme kuenza. — Tshivua bualu ne bulombodi buabu to. Mu bualu ebu Mvidi Mukulu mmutuangate bonsu ne mushinga.[9] —

⁷Kadi bavua bamone ne: Mvidi Mukulu mmumpeshe mudimu wa kulongesha bantu ba bisamba bikuabu Lumu lua Disanka, amu muvuaye mupeshe Petro mudimu wa kubilongesha bena Yuda.

⁸Bualu Mvidi Mukulu mmuenze, bua ngikale mupostolu bua bisamba bikuabu, amu muvuaye muenze bua Petro ikale mupostolu bua bena Yuda.

⁹Yakobe, Petro, ne Yowanane,[10] bavua bantu banemeka bu balombodi banene, bavua bitabe ne: Mvidi Mukulu mmumpeshe mudimu ewu wa pa buawu. Nanku meme ne Bamabase, bavua batuele muoyi, batukuate ku tshianza, bua kuleja mutudi tukuata nabu mudimu wa momumue. Ke tuetu bonsu pamue kumvuangana nabu ne: meme ne Bamabase, netuye kukuatshila bisamba bikuabu mudimu, bobu nebakuatshile bena Yuda mudimu.

¹⁰Bavua batulomba amu, bua tuvuluke bakengi ba mu Tshisumbu tshiabu bavua mu Yerushalayime. Ke tshimvua muenze muanyi muonsu.[11]

¹¹Kadi Petro mumane kufika mu Antiyokiya,[12] meme kumubela, bantu bonsu bumvue, bualu uvua muenze bibi.

¹²Bantu bavua Yakobe mutume kabayi banji kufika, Petro uvua udia pamue ne bena ditaba ba bisamba bikuabu. Kadi bantu abu bamane kufika, yeye kusesuka, kayi musue kudia kabidi ne bantu ba bisamba bikuabu. Uvua utshina bena Yuda badi balongesha mudibu ne bua kuteka bantu panshi.

¹³Bamue bena ditaba ba mu tshisamba tshia bena Yuda, bakavua baleja bukata, bidikija Petro. Bamabase mene ukavua ulonda tshilejilu tshiabu tshibi.

¹⁴Pamvua mumone mu wabu benza malu mabi, adi abengangana ne Lumu lua Disanka, meme kubela Petro kumpala kua bantu bonsu, kunuambila ne: “Wewe, muena Yuda, uvua usomba munemu amu bu bantu ba bisamba bikuabu, kuyi ulonda mikenji ya bena Yuda. Kadi mmunyi muudi musue mpindiewu, bua bantu ba bisamba bikuabu balonde bibidilu bia bena Yuda?”

¹⁵Tuetu mene mbatulele bena Yuda. Katuena benji ba malu mabi ba mu bisamba bikuabu.

¹⁶Kadi tudi bamanye ne: Mvidi Mukulu udi ubingisha muntu, amu bua padiye witaba Yezu Kristu, ki mbua padiye ulonda mikenji ya Moshe nansha. Ke patuvua bitabe Yezu Kristu, tuetu kabidi bena Yuda, bua Mvidi Mukulu atubingishe bualu bua ditaba dietu mu Kristu, ki mbua patuvua bakumbaje mikenji. Bualu Mvidi Mukulu kakubingisha muntu nansha umue, bua padiye ukumbaja mikenji.[13]

¹⁷Nanku patudi tuitaba Kristu, bua Mvidi Mukulu atubingishe petu, bidi bimueneka se: tuetu bena Yuda kabidi, tudi benji ba malu mabi, amu bu bantu ba bisamba bikuabu. Nanku Kristu mmuanyishe malu mabi anyi? Nansha kakese!

¹⁸Kadi meme mulongeshe tshiakabidi ne: nulonde mikenji, imvua mukandike ne: kanuyilondi, ndi ndienza mushipi wa mikenji.

¹⁹Kadi bua bidi bitangila mikenji, ndi mufile lufu lunkebela kudi mikenji mene, bua ngikale ne muoyi bualu bua Mvidi Mukulu. Ndi mulue pamue ne Kristu ku mutshi mutshiamakane.

²⁰Nanku udi ne muoyi ki mmeme to. Kadi Kristu udi ne muoyi munda muanyi. Muoyi undi nawu mpindiewu panu, ndi nawu, bualu ndi ngitaba Muana wa Mvidi Mukulu, uvua munnange, mufue kabidi bualu buanyi.

²¹Tshiena mubenge bua Mvidi Mukulu annange nansha. Kadi pikala Mvidi Mukulu utubingisha, bualu tudi tukumbaja mikenji, nanku Kristu kavua ne bua kufua nansha.