Read Tshiluba Filipe 2 Bible Online

Filipe 2 - Tshiluba bible

Filipe 2

¹Nukadi nuitaba Kristu, bakolelamu. Kristu udi ununanga, unukolesha ku muoyi. Nudi badisange ne Mueyelu wa Tshijila.[8] Nudi nuenzelangana bimpe, nufuilangana luse.

²Nanku ndi nnulomba bua nukumbaje disanka dianyi: umvuanganayi, nanganganayi, nuikale ne muoyi umue, kabidi ne lungenyi lumue.

³Kanuenji bualu nansha bumue ne meji a lubabu, nansha a kuditemba patupu. Kadi nudipuekeshe kudi bakuabu. Muntu yonsu atangile bantu bakuabu bu badi bamupite.

⁴Muntu kakebi tshidi tshimusankisha amu yeye. Kadi elayi bonsu meji ku bidi bisankisha bakuabu.

⁵Ikalayi ne muoyi uvua nawu Kristu[9]:

⁶Konsu eku uvua anu mulongu umue ne Mvidi Mukulu. Kadi kavua muuminyine ku bu-Mvidi Mukulu buende.[10]

⁷Kadi uvua mudibengele bionsu bivuaye nabi, muitabe bua kuikala mupika.[11] Kudienzaye mufuanangane ne bantu, umueneka bu muntu mene.

⁸Uvua musue kudipuekesha. Kutumikilaye too ne ku lufu, too ne ku lufu lua ku mutshi mutshiamakane.

⁹Ke padi Mvidi Mukulu mumuzangike, mumuinyike dina didi kumpala kua mena makuabu onsu.

¹⁰Nanku bonsu badi mu diulu, badi pa buloba, nansha badi munda mua buloba,[12] batue binu, banemeke dina dia Yezu,

¹¹batonde patoke ne: Yezu Kristu udi Mfumu! Ke mudibu batumbisha Mvidi Mukulu Tatu.[13]

¹²Bana hetu bananga, pamvua munkatshi muenu, nuvua bantumikile misangu yonsu. Kadi nupite kuntumikila lelu, pandi tshiyipu! Nukuate mudimu, nutshine Mvidi Mukulu, numuzakele, bua nupande.

¹³Bualu Mvidi Mukulu udi ukuata mudimu diba dionsu munda muenu, bua nujinge tshidiye musue, nutshikumbaje kabidi.

¹⁴Enzayi bionsu, kanuyi nudiabakena, kanuyi nutontolola.

¹⁵Ke munudi mua kuikala bantu bimpe, ba munda mutoke. Nenusombe panu munkatshi mua bantu babi, bapambuke,[14] bu bana ba Mvidi Mukulu, badibu kabayi mua kudiwula. Nudi ne bua kukenka munkatshi muabu bu mitotu ya mu diulu,

¹⁶diba dinudi nubalongesha muaku udi utupetesha muoyi. Nuenu benze nanku, nemmone mua kuditemba bualu buenu, dituku diafika Kristu. Bualu dituku adi nebimueneke ne: mudimu wanyi, ne lutatu luanyi, kabivua tshianana to.

¹⁷Ndi kumpala kua Mvidi Mukulu bua kumulambula ditaba dienu. Pamue apa nebasakidile muoyi wanyi ku mulambu wenu.[15] Nansha biobi bienzeka nanku, nensanke, nnubueje bonsu mu disanka adi.

¹⁸Nuenu kabidi nudi ne bua kusanka, kumbueja mu disanka dienu.

¹⁹Pasua Mfumu Yezu, ndi ntekemena kunutumina Timote lukasa, bua papinganaye, antuadile ngumu ya kuenu, ankoleshe ku muoyi.

²⁰Yeye nkayende ke udi utata pamue nanyi, unutatshila ne nuenu kabidi.

²¹Bantu bakuabu bonsu badi batata anu bua bidi bibalengelela bobu nkayabu. Kabena bakeba bidi bilengelela Kristu.

²²Nudi bamanye muvua Timote muleje patoke mudiye muntu wa muoyi umue. Bu mudi muana wambuluisha tatuende, ke mudiye ungambuluisha mu mudimu wa kutangalaja Lumu lua Disanka.

²³Ndi mutekemene kunutuminaye, pangamona mudi tshilumbu tshianyi tshipita.

²⁴Munda mua Mfumu ndi mujadike ne: meme mene nemfike lukasa bua kunumona.

²⁵Ndi muele meji ne: mbimpe kunupingajila muanetu Epafrodite.[16] Uvua mukuate nanyi mudimu, muendakane nanyi mu mvita. Yeye ke unuvua bantumine bua angambuluishe mu dikenga dianyi.

²⁶mMunusamine bonsu muoyi, mulubakane kabidi, bualu nuvua bumvue ne: udi usama.

²⁷Bushuwa uvua musame bikole, muambe kufua. Kadi Mvidi Mukulu mmumufuile luse. Ki mmumufuile amu yeye nkayende luse; mmutufuile ne meme kabidi, bua tshipetshi dibungama dinene dipite.

²⁸Ke pandi musue kunutumina Epafrodite lukasa, bua nusanke panuamonangana nende, kabidi bua dibungama dianyi dijike.

²⁹Nanku numuakidile ne disanka dia bungi, bualu mmuanenu mu ditaba. Nudi ne bua kunemeka bantu ba nanku.

³⁰Bualu uvua wamba kufua bua mudimu wa Kristu. Uvua mudiele mu njiwu ya lufu, bua kungenzela mudimu unuvua nuenu kanuyi mua kunkuatshila.