Read Tshiluba Filipe 3 Bible Online

Filipe 3 - Tshiluba bible

Filipe 3

¹Nanku bana hetu, nusanke bua panudi badisange ne Mfumu. Kabiena bintonda bua kunufundila amu malu a momumue. Bualu malu awu adi anulengelela.

²Dimukilayi bantu badi benza bibi; dimukilayi mbua eyi.[17] Dimukilayi badi basue kutekesha bantu panshi diteka dia dishima.

³Bualu badibu bateka panshi menemene mu bulelela ntuetu, ki mbobu nansha. Bualu tuetu tudi tutendelela Mvidi Mukulu ku bukole bua Mueyelu wende. Tudi tuditemba amu bua Yezu Kristu. Katuena tutekemena ku bidi bantu benza.

⁴Kadi meme kabidi mvua mua kuditemba ku bivua bantu bangenzela. Pikala muntu musue kuditemba ku bia nanku, ndi mua kuditemba mumupite yeye.

⁵Bualu bavua banteke panshi, pamvua mukumbaje lumingu lujima. Ndi muena Izrayele mufukila. Ndi wa mu tshisamba tshia bena Binyamine. Ndi muena Ebrewu menemene. Bua bidi bitangila dikumbaja dia mikenji, mvua Muparushe.[18]

⁶Mvua ne disuminyina dipite, nkengesha Tshisumbu tshia bena ditaba.[19] Padibu batangila muntu udi ulama mikenji bu muntu muimpe, kakuvua muntu uvua mua kundiwula.

⁷Kadi bionsu abi bimvua mutangile bu bia mushinga, ndi mbitangila mpindiewu bu bia kuimansha bualu bua Kristu.

⁸Tshiena ngamba amu bua biobi abi to. Kadi nkadi ntangila bionsu bidi ne mushinga bu bintu bia kuimansha, bualu bua tshiuma tshipite buimpe etshi: kumanya Yezu Kristu, Mfumu wanyi. Bualu buende Yeye, ndi muimanshe bionsu bivua ne mushinga ku mesu anyi. Ndi mbitangila bu bintu bia kuela mu dyala, bua mmone mua kupeta Kristu,

⁹kudisanga nende tshishiki. Tshitshiena mudiele mulu ne: ndi muntu muimpe, bualu ndi ndama mikenji. Kadi ndi muimpe, bualu ndi ngitaba Yezu Kristu. Bualu Mvidi Mukulu ke udi utubingisha, patudi tuitaba.

¹⁰Tshindi njinga tshidi anu bua kumanya Kristu, kumvua bukole bua dibiika diende, kudisanga nende mu makenga, kudienza mufuanangane nende mu lufu,

¹¹ntekemena ne: Mvidi Mukulu neambishe meme kabidi ku lufu.

¹²Tshiena mua kudiamba ne: nkadi mupete tshindi ngipatshila; nansha ne: nkadi muakane tshishiki. Kadi ndi ngipatshila anu kuipatshila, ndibamba bua mpete nsala wa kalumbandi, bu mudi Yezu Kristu mumane kumpeta.

¹³Bana hetu, tshiena musue kuamba[20] ne: nkadi mupete nsala wa kalumbandi ewu to. Kadi ndi ngenza amu bualu bumue: malu onsu a kale, ndi ngapua muoyi, ngobokela bidi kumpala kuanyi.

¹⁴Nanku ntshidi mu njila, nyema lubilu, bua mpete nsala wa kalumbandi. Nsala awu ke muoyi mupiamupia udi Mvidi Mukulu mutubikidile, bua tuupetele mu diulu kudi Yezu Kristu.

¹⁵Tuetu bonsu bakadi bakulumpe mu bualu bua Mvidi Mukulu, ke meji atudi ne bua kuela. Kadi pikala bamue ba kunudi bela meji a mushindu mukuabu, Mvidi Mukulu neanujanduile bualu buonsu patoke.

¹⁶Nansha munyi ne munyi, tuye amu kumpala mu njila utukadi bamane kulonda too ne ku mpindiewu.

¹⁷Bana hetu, ndondayi bonsu mu makasa. Tuvua banuleje tshilejilu. Nanku tangilayi bikole badi bidikija tshilejilu etshi.

¹⁸Mvua mumane kunuambila misangu ne misangu, ndi nnuambuluila kabidi mpindiewu ne binsonji ku mesu ne: bantu ba bungi kabena balonda njila muimpe ewu to. Ke mudibu baluisha mutshi mutshiamakane wa Yezu Kristu.

¹⁹Kadi nebabutuke, bualu mvidie wabu ke difu diabu. Badi baditemba mu bivua mua kubafuisha bundu.[21] Badi bela meji anu ku bia panu.

²⁰Buetu tuetu, musoku wetu udi mu diulu. Tudi tuindila, tutekemena ne muoyi mujima, Musungidi wetu, Mfumu Yezu Kristu, udi ne bua kutuluka mu diulu.

²¹Yeye neakudimune mubidi wetu wa butekete, wa lufu, bua ufuanangane ne wende wa lumu, udiye nawu katshia wabiika ku lufu. Bualu udi ne bukenji bua kuteka bionsu ku bumfumu buende.