Read Tshiluba Filipe 4 Bible Online

Filipe 4 - Tshiluba bible

Filipe 4

¹Bana hetu basuibue, ke munudi mua kuikala bantu bashindame, badi badisanga ne Mfumu. Ndi njinga bikole kumonangana nenu. Nudi nunsankisha. Ndi nditemba kabidi bualu buenu.

²Wewe Evodiya, ne wewe Sintike, ndi nnulomba, nnusengelela bua numvuangane bu bana ba bakaji badi muntu umue mu ditaba.

³Wewe kabidi, Sizikuse, muena mudimu nanyi wa diyi dimue, ndi nkulomba ne: ubambuluishe. Bualu bobu bavua bangambuluisha bikole bua kutangalaja Lumu lua Disanka, pamue ne Kleman, kabidi ne bena mudimu nanyi bakuabu bonsu. Mena abu adi mu mukanda wa muoyi.[22]

⁴Sankayi matuku onsu, bualu nudi badisange ne Mfumu. Ndi ngambulula ne: sankayi.

⁵Lejayi bantu bonsu muoyi wa kalolu. Mfumu ukadi pa kufika.

⁶Kanusampakenyi bualu nansha bumue.[23] Kadi mu malu onsu nutendelele Mvidi Mukulu, nulombe bionsu binudi nabi dijinga. Nubilombe ne muoyi wa dianyisha.

⁷Bu munudi badisange ne Kristu, Mvidi Mukulu nealame mioyi yenu ne meji enu mu bupole buende, budi bupite bionsu bidi muntu mua kujingulula.

⁸Nanku bana hetu, nutambe kutabalela bionsu bidi bimpe, kabidi bidi bantu mua kupa lumu: ke bionsu bidi bia bulelela, bidi bantu mua kunemeka, bidi biakane, bidi kabiyi ne kalema, bidi bisankisha bantu, bidi bantu mua kutumbisha.

⁹Nukumbaje bimvua munulongeshe, binuvua bapete kundi, binuvua bumvue ngamba, binuvua bamone ngenza. Nanku Mvidi Mukulu, mutupi wa bupole, neikale nenu.

¹⁰Nuvua bapete mushindu tshiakabidi wa kundeja munudi bannange. Mvua mumvue disanka dia bungi, mmona bu dipa dia kudi Mfumu. Tshiena musue kuamba ne: nukadi balekele kusumpakana bualu buanyi. Kadi kanuvua bapete mushindu wa kuleja munudi bannange.

¹¹Kabidi tshiena ngamba nanku, bualu ndi nkengela tshintu. Ndi mulonge mua kusanka ne bindi nabi.

¹²Nkadi muibidilangane ne bupele, nansha ne biuma. Ndi mulonge mua kumvua bimpe miaba yonsu, kabidi ne bionsu bidi bingenzekela. Nansha meme ne biakudia bikumbane, nansha ngu-mvua nzala, nansha meme ne bintu bivule, nansha tshiyi nabi bikumbane, ndi ngumvua amu bimpe.

¹³Bu mudi Kristu unkolesha, ndi mua kupitshila mu bionsu amu bimpe.

¹⁴Kadi panuvua bangambuluishe mu dikenga dianyi, nuvua benze kabidi amu bimpe.

¹⁵Nudi bamanye ne: musangu umvua mumuke ku Masedoniya, tshikondu tshimvua mutuadije kulongesha Lumu lua Disanka, ku Bisumbu bionsu bia bena ditaba, anu nuenu nkayenu bena Filipe, ke bavua balambuluisha. Nuvua badisange nanyi mu bimvua mupete, ne mu bimvua mujimije.[24]

¹⁶Nukavua bantumine misangu mikuabu bintu bimvua nabi dijinga, pamvua mu Tesalonike.[25]

¹⁷Meme tshiena nkeba kupeta bintu. Kadi ndi njinga kusakidila ku binukadi nabi.

¹⁸Ndi nnujadikila ne: nkadi mupete bionsu binuvua bantumine. Bidi bikumbane bipite. Bu mudi Epafrodite muntuadile mpindiewu bimuma basue kumpesha, bionsu bindi nkengela, ndi nabi. Bintu bienu bidi bu mulambu wa dipembu dimpe, udi Mvidi Mukulu wanyisha, umusankisha.[26]

¹⁹Bilondeshile biuma biende ne butumbi buende, Mvidi Mukulu neanupeshe kudi Yezu Kristu bionsu binudi nukengela.

²⁰Mvidi Mukulu Tatu wetu atumbe kashidi tshiendelele. Amene.

²¹Bantu bonsu ba Mvidi Mukulu badi bitaba Yezu Kristu, belayi muoyi. Bena ditaba batudi nabu, badi banutumina muoyi.

²²Bantu bonsu ba mu Tshisumbu tshia bena ditaba ba Mvidi Mukulu badi kunu, nangananga badi bakuata mudimu mu nzubu wa Kezare,[27] badi banutumina muoyi.

²³Dinanga dia Mfumu Yezu Kristu dishindame munda muenu bonsu.