Read Tshiluba Kolose 1 Bible Online

Kolose 1 - Tshiluba bible

Kolose 1

¹Meme Polu, uvua Mvidi Mukulu musue bua ngikale mupostolu, mutumibue wa Yezu Kristu, ne muanetu Timote,

²tudi tunufundila mukanda ewu, nuenu bantu ba Mvidi Mukulu, badi basomba mu Kolose. Nudi badienze bana hetu mu ditaba, bualu nudi badisange ne Kristu. Dinanga ne bupole bia kudi Mvidi Mukulu Tatu wetu bishindame munda muenu.[1]

³Tudi tuela Mvidi Mukulu, Tatu wa Mfumu wetu Yezu Kristu, tuasakidila matuku onsu, patudi tutendelela bualu buenu.

⁴Bualu tudi bumvue lumu lua munudi nuitaba Yezu Kristu, nunanga bantu bonsu badi bitaba Mvidi Mukulu.

⁵Pavua Lumu lua Disanka, ludi lunuambila malu malelela, lufike kuenu musangu wa kumpala, batua banumanyishe ditekemena didilu lunupetesha. Nenku ditaba ne dinanga binudi nabi, bidi bishindamene pa binudi nutekemena,[2] bidibu banulamine mu diulu.

⁶Lumu lua Disanka ludi lutangalaka, lutuadila bantu ba buloba bujima diakalenga. Diakalenga edi ke divua Lumu elu lunutuadile nuenu kabidi, bituadije ku dituku divuabu banumanyishe musangu wa kumpala dinanga didi Mvidi Mukulu utunanga nadi. Nuenu kujadika bimpe mudi Lumu alu.

⁷Epafrase, udi wenzela Kristu mudimu pamue netu, ke uvua munulongeshe bualu abu. Mu mudimu udiye unukuatshila, udi ulamata Kristu ne muoyi umue.[3]

⁸Yeye ke uvua mutumanyishe dinanga divua Mueyelu wa Tshijila mujuule munda muenu.

⁹Ke patudi tunulombela amu kunulombola kudi Mvidi Mukulu, bituadije ku dituku ditudi banumanye. Tudi tutendelela Mvidi Mukulu, tulomba bua nujingulule bimpe bidiye musue. Anupe meji ne lungenyi bia kudi Mueyelu wende.

¹⁰Nanku nenumone mua kusomba mudi Mfumu musue, kuenza kabidi diba dionsu bidi bimulengelela. Nenuenze midimu mimpe ya mishindu yonsu. Nenuye kumpala mu dimanya dienu dia Mvidi Mukulu.

¹¹Tudi tulomba kudi Mvidi Mukulu bua anukankamike ne bukole bua butumbi buende, bua numone mua kumvua malu onsu ne lutuulu.

¹²Elayi Mvidi Mukulu[4] Tatu tuasakidila ne disanka. Bualu udi munuenze bantu badi mua kupeta bumpianyi budiye mutekele bantu bende mu Bukalenga buende bua butoke.

¹³Bualu mmutupikule ku bukole bua miidima,[5] mutubueje mu bukalenga bua Muanende munanga.

¹⁴Muanende ke udi mutupikule, mutujimijile mibi.[6]

¹⁵Kristu udi tshimfuanyi tshidi tshimueneka tshia Mvidi Mukulu udi kayi umueneka. Yeye udi Muanabute, udi mupite bionsu bidi Mvidi Mukulu mufuke.[7]

¹⁶Bualu kudiye Mvidi Mukulu mmufuke bionsu, bidi mu diulu ne bidi pa buloba, bidi bimueneka ne bidi kabiyi bimueneka, makole a mulu, makalenga, makokeshi, ne mamfumu.[8] Mvidi Mukulu uvua mufuke bionsu kudiye, kabidi bualu buende Yeye.

¹⁷Kristu uvuaku, bintu kabiyi bianji kuikalaku. Bintu bionsu bidi bishala muaba wabi, amu munda muende.

¹⁸Tshisumbu tshia bena ditaba tshidi mubidi, Yeye udi mutu watshi. Kudiye ke kudi muoyi mupiamupia wa mubidi awu utuadija. Bualu Yeye ke Muanabute, wa kumpala muabu babishe ku bafue, bua kuikalaye wa kumpala mu bionsu.

¹⁹Bualu Mvidi Mukulu mua mujadike bua kuikalaye mujima munda mua Muanende.

²⁰mMujadike kabidi bua bionsu bipingane kudiye, bitue nende ndondu munda mua Muanende awu. Ku lufu lua Muanende pa mutshi mutshiamakane,[9] Mvidi Mukulu mmubueje bupole pankatshi pende ne bionsu. Ke muvuaye mupingaje bionsu kudiye, mutue nabi ndondu, nansha ne bidi pa buloba, nansha ne bidi mu diulu.

²¹Ku kale nuenu kabidi nuvua kule ne Mvidi Mukulu. Nuvua baluishi bende, bua malu mabi onsu anuvua nuela meji, ne anuvua nuenza.

²²Kadi mpindiewu Mvidi Mukulu mmutue nenu ndondu,[10] ku lufu luvua Muanende mufue bu bantu bonsu. Ke muvuaye munuenze kumpala kuende bantu ba tshijila, bakane, kabayi kalema.

²³Kadi nudi ne bua kunanukila mu ditaba, bashindamemu, kanuyi nutenkakana. Kanujimiji ditekemena dinu-vua bapete, katshia banumanyisha Lumu lua Disanka. Ke Lumu lua Disanka luvuabu balongeshe bantu bonsu, kabidi lundi meme Polu ngenzela mudimu, muvua Mvidi Mukulu musue.

²⁴Mpindiewu ndi nsanka bua makenga adi mankuate bualu buenu. Bualu ku makenga anyi, ndi nkumbaja makenga adi Kristu kayi muanji kumvua bua mubidi wende, momumue ne bua Tshisumbu tshia bena ditaba.[11]

²⁵Ndi nkuatshila Tshisumbu tshia bena ditaba mudimu, bilondeshile mudimu udi Mvidi Mukulu mungimikile bualu buenu. Uvua mumpeshe mudimu wa kumanyisha Lumu lua Disanka amu mudilu.

²⁶Ke lumu luvuaye musokoke bantu bonsu mu bikondu bionsu, kadi ludiye musokoluele mpindiewu bantu bende.

²⁷Mvidi Mukulu uvua musue kubamanyisha meji masokome mimpe, a mushinga mukole, adiye nawu bualu bua bantu bonsu. Adi nunku: Kristu udi munda muenu. Bualu buende nudi mua kutekemena ne: netudisange ne Mvidi Mukulu mu butumbi buende.

²⁸Ke mutudi mmanyisha muntu yonsu Kristu. Tudi tudimuja bantu, tubalongesha ne meji onsu atudi nawu, bua muntu yonsu amueneke kumpala kua Mvidi Mukulu mukole mushindame mu didisanga diende ne Kristu.

²⁹Ke mudimu undi ntatshila, nduangana mvita ne bukole budi Kristu umpesha, bualu ke budi buenza mudimu munda muanyi.