Read Tshiluba Kolose 3 Bible Online

Kolose 3 - Tshiluba bible

Kolose 3

¹Bavua banubishe ku lufu pamue ne Kristu. Nanku kebayi bia mu diulu, mudi Kristu musombe ku diboku dia bukole dia Mvidi Mukulu.[19]

²Elayi meji ku bia kulu, kanuedi meji ku bia panu.

³Bualu nukadi bafue. Muoyi wenu udi musokome pamue ne Kristu munda mua Mvidi Mukulu.

⁴Muoyi wenu mulelela ke Kristu. Nanku diba diamuenekaye, nenumueneke kabidi pamue nende. Nenudisange nende mu butumbi buende.

⁵Nanku bengayi malu mabi onsu a pa buloba adi munda muenu: ke buendenda, malu a bundu, lukuka lua mubidi, majinga mabi, ne bukonkotu (bualu bukonkotu budi amu bu kutendelela mvidie).

⁶Bilema bibi ebi ke bidi bijuula tshiji tshia Mvidi Mukulu, bua anyoke badi babenga kumutumikila.[20]

⁷Ku kale nuvua benze malu mabi a nanku, bualu mioyi yenu ivua mijame mu bilema ebi.

⁸Kadi mpindiewu bengayi bionsu ebi: tshiji, difika munda, tshikisu. Kanupendi muntu, kanuakudi miaku mibi.

⁹Kanushiminyinyanganyi, bualu nuvua bavuule muntu mukulukulu ne bibidilu biende.

¹⁰Nuenu kulala muntu mupiamupia, udi udienzulula diba dionsu ku tshimfuanyi tshia Mvidi Mukulu, Mumufuki wende,[21] bua amone mua kumumanya menemene.

¹¹Nanku nansha wewe muena Yuda nansha muntu wa bisamba bikuabu, nansha bantu bakuteka panshi nansha kabayi bakuteka, nansha wewe muntu mushidimuke nansha mushadile ku bonsu,[22] nansha wewe mupika, nansha muntu udi udienzela malu mudiye musue, ebi bionsu kabiena ne bualu. Mudi amu Kristu, udi munda mua bonsu, ukuata mudimu mu bionsu.

¹²Nudi bena Tshisumbu tshia bantu ba Mvidi Mukulu. Mvidi Mukulu mmununange; mmunusungule bua nuikale bende. Nanku nudi ne bua kuikala ne muoyi wa luse, wa dinanga, wa bupuekele, wa bupole, ne wa lutuulu.

¹³Nulengululangane bilema, nufuilangane luse. Misangu yonsu idi muntu tshilumbu ne mukuabu, nulekelangane bilema, muvua Kristu munulekelebi.[23]

¹⁴Ikalayi nangananga ne dinanga. Ke mukaba udi unusuikakaja bonsu pamue.

¹⁵Bupole bunudi nupeta kudi Kristu, buludike meji enu, ne bionsu binudi nuenza. Ku bupole abu ke kudi Mvidi Mukulu munubikidile bonsu pamue, bua nuenze bidimba bia mubidi umue. Nuele Mvidi Mukulu tuasakidila bua bualu ebu.

¹⁶Muaku wa Kristu wase miji munda muenu muawu muonsu mudiwu. Longeshanganayi, belanganayi, ne meji onsu anudi nawu. Ne muoyi wenu mujima, imbilayi Mvidi Mukulu misambu, mitendu ne tusala, mudi Mueyelu wa Tshijila unusaka,[24] kabidi ne muoyi wa dianyisha.

¹⁷Bionsu binudi nuenza, nansha binudi nuamba, nubikumbaje mu dina dia Yezu Kristu. Nuele amu kuela Mvidi Mukulu tuasakidila kudiye.

¹⁸Nuenu bakaji, tumikilayi babayenu. Ke munudi ne bua kuenza kumpala kua Mfumu.

¹⁹Nuenu balume, nangayi bakaji benu. Kanubaleji mpala mubi.

²⁰Nuenu bana, tumikilayi bionsu bidi baledi benu bamba, bualu ke tshidi Mfumu muanyishe.

²¹Nuenu baledi, kanukifishi bana badi kumbelu kuenu munda, tshianana nebatekete mu maboku.

²²Nuenu bapika, tumikilayi bionsu bidi bamfumu benu ba panu bamba, ki ngamu bua kubasankisha padibu banumona. Kadi tumikilayi ne muoyi mulelela, bualu nudi nunemeka Mfumu.

²³Nansha mudimu kaayi unudi nawu, nuwenze ne muoyi mujima, bualu nudi nuwenzela Mfumu, kanuena nuwenzela bantu to.

²⁴Nuyuluke ne: Mfumu neanufute. Nenupete bidiye mulamine bena diende.[25] Bualu Mfumu unudi nuenzela mudimu ke Kristu.

²⁵Kadi muntu udi wenza malu mabi, neapete difutu dia malu mabi avuaye muenze, bualu Mvidi Mukulu udi ulumbuluisha bantu kayi ne kansungasunga.[26]