Read Tshiluba Kolose 4 Bible Online

Kolose 4 - Tshiluba bible

Kolose 4

¹Nuenu bamfumu, enzelayi bapika benu bilenga bionsu binudi ne bua kubenzela. Nuvuluke ne: nuenu kabidi nudi ne Mfumu mu diulu.

²Tendelelayi Mvidi Mukulu ne munanunanu. Mutendelelayi, numuele tuasakidila, kanuyi nupungila.

³Nutulombele kabidi kudi Mvidi Mukulu, bua atupeshe mushindu muimpe wa kulongesha muaku wende, wa kumanyisha bantu bualu busokome bua Kristu. Bualu mbangele mpindiewu mu nzubu wa lukanu, amu bua bualu busokome abu.

⁴Nanku lombayi bua mmone mua kulongesha bimpe bualu busokome abu, amu mushindu undi ne bua kuenza.

⁵Badi kabayi bena ditaba, sombayi nabu bimpe. Kanujimiji diba patupu.

⁶Miaku yenu ibasankishe, ibalengelele. Numanye mua kuandamuna muntu yonsu bimpe.

⁷Muanetu munanga Tishike[27] neanuambile malu onsu adi antangila. Ke yeye utudi tuenzela nende Mfumu mudimu, kabidi udi uukuata bimpe.

⁸Nanku ndi mmutuma nangananga bua anuambile mutudi kunu, kabidi bua anukoleshe ku muoyi.

⁹Badi bamufila kudi Onezime[28] muanetu munanga, wa muoyi umue. Yeye udi wa kuenu aku. Nebanumanyishe bionsu bidi bipitakana kunu.

¹⁰Aristarke, utudi nende mu lukanu, ne Marke, muanabu ne Barnabase,[29] badi banuela muoyi. (Bakadi bamane kunuambila munudi ne bua kuakidila Marke bimpe, padiye ufika kuenu.)

¹¹Yezu, udi dina dikuabu Yustuse, udi kabidi unuela muoyi. Ku bena Yuda amu bantu basatu aba, ke bavua bitabe Kristu. Tudi tukuata nabu mudimu wa kutantshisha Bukalenga bua Mvidi Mukulu. Bavua bakamba bikole be.

¹²Epafrase,[30] udi kabidi wa kuenu aku, udi unuela muoyi. Muena mudimu wa Yezu Kristu ewu kena upungila bua kunulombela kudi Mvidi Mukulu, bua nuikale bashindame mu ditaba, bantu bakole mu lungenyi, badi amu bakeba kukumbaja bidi Mvidi Mukulu musue.

¹³Ndi mujadike se: udi unutatshila bikole, utatshila kabidi bena mu Lawodikiya, ne bena mu Iyerapolise.[31]

¹⁴Luke, munganga ne mulunda wetu, ne Demase kabidi, badi banuela muoyi.[32]

¹⁵Elayi bana hetu ba mu Lawodikiya muoyi, kabidi ne Nimfa, ne Tshisumbu tshia bena ditaba badi basangile muende.[33]

¹⁶Panuikala bamane kubala mukanda ewu, nukebe bua baubale kabidi kudi bena ditaba ba mu Lawodikiya. Nuenu kabidi nubale mukanda wanutumina bena ditaba ba mu Lawodikiya.[34]

¹⁷Ambilayi Arshipe[35] se: “Enza muebe muonsu bua kukumbaja bimpe mudimu uvuabu bakuimikila, uudi ne bua kuenzela Mfumu.”

¹⁸Miaku indi nnuela nayi muoyi eyi, ndi nyifunda ku tshianza tshianyi. — Kanupu muoyi ne: ndi mu lukanu. Dinanga dia Mvidi Mukulu dishindame munda muenu.