Read Tshiluba Yoshuwa 1 Bible Online

Yoshuwa 1 - Tshiluba bible

Yoshuwa 1

¹Moshe, muntu wa Maweja-Nangila, mumane kufua, Maweja-Nangila kuambila Yoshuwa, muana wa Nune, uvua wambuluisha Moshe ne:

²— Moshe, muntu wanyi, mmumane kufua. Mpindiewu, wewe udi ne bua kusabuka musulu wa Yardene, pamue ne bena Izrayele bonsu, bua ubafikishe mu ditunga dindi mubapeshe.

³Ndi nnupesha miaba yonsu inudi nupitshila, bu mumvua mumane kulaya Moshe.

⁴Ditunga dienu nedialabale, biangatshile ku tshipela, kuinshi mu ditunga, too ne ku mikuna ya Lebanone ku mutu mu ditunga, biangatshile ku musulu munene wa Perate, luseke ludi diba dipatukila, dipitshila mu ditunga dia bena Iti, too ne ku Mayi manene a pankatshi pa matunga adi luseke ludi diba dibuelela.[1]

⁵Matuku onsu autshidi panu ne muoyi aa, muntu kena mua kukupita bukole to. Meme nengikale nebe, bu mumvua ne Moshe. Kashidi tshiendelele tshiena nkulekela. Nenkuambuluishe misangu yonsu.

⁶Kolesha muoyi, kutekeshi mu maboku to. Bualu wewe neulombole bena Izrayele, bua kukuatabu ditunga dimvua mulaye bankambua[2] babu.

⁷Wewe kolesha muoyi, kutshinyi to. Kumbaja bimpe mikenji yanyi yonsu ivua Moshe muntu wanyi mukuambile. Kulenguludi mukenji nansha umue. Nanku wewe muyikumbaje yonsu, neupete dikasa dimpe mu bionsu biudi wenza.

⁸Nanku ubalulule amu kubalulula malongesha adi mu mukanda wa mikenji. Udikonke, udiele meji bua malu awu, butuku ne munya, bua ukumbaje bionsu bidibu bafunda mu mukanda awu. Nanku, bionsu biudi muele meji a kuenza nebikumbane. Neupete dikasa dimpe.

⁹Ndi mumane kukuambila ne: kolesha muoyi, kutshinyi, kuzakadi, kutekeshi mu maboku. Bualu meme, Maweja-Nangila Mvidi Mukulu webe, nengikale nebe konsu kuudi uya.

¹⁰Yoshuwa kutumina balombodi ba bena Izrayele diyi,

¹¹bua bendakane mu mitanda, bambile bantu bua bakumbaje mikenji itudi tutela eyi: “Nuenu bena Izrayele, nulongolole biakudia. Bualu papita matuku asatu, nenusabuke Yardene bua kuya kukuata ditunga didi Maweja-Nangila Mvidi Mukulu wenu munupeshe bua kusomba.”

¹²Ke Yoshuwa kuyukila ne bantu balume ba bena Rubene, ba bena Ngade ne ba tshitupa tshia tshisamba tshia Menashe, ubambila ne:

¹³— Nuvuluke miaku ivua Moshe, muntu wa Maweja-Nangila, munumanyishe musangu uvuaye wamba ne: “Maweja-Nangila Mvidi Mukulu wenu mmuanyishe bua nuenu kuasa mu ditunga didiye munupeshe, didi luseke ludi diba dipatukila lua Yardene.”

¹⁴Nanku bakaji benu, bana benu, bimuna bienu, nebishale dishiya dia musulu wa Yardene, muaba udi Moshe munufikishe. Kadi nuenu, bantu balume badi ne makanda a kuluangana mvita, nuambule bia mvita, nupite kumpala kua bana benu, bua kusabuka Yardene. Nubambuluishe,

¹⁵too ne padi Maweja-Nangila Mvidi Mukulu wenu muanyishe bua bana benu bakuate ditunga, didiye mubapeshe bu muvuaye munuambuluishe nuenu bua nupete ditunga. Pashishe nenupingane bua kuasa mu ditunga divua Moshe, muntu wa Mvidi Mukulu, munuabanyine luseke ludi diba dipatukila lua musulu wa Yardene.[3]

¹⁶Bena bisamba ebi kuandamuna Yoshuwa ne: — Netukumbaje bionsu biudi mutuambile. Netuye muaba onsu uudi ututuma.

¹⁷Netutumikile diyi diebe menemene, bu mutuvua tutumikila dia Moshe. Maweja-Nangila Mvidi Mukulu webe neikale nebe bulelela, bu muvuaye ne Moshe.

¹⁸Muntu yonsu udi ukutombokela, ubenga mua kutumikila biudi wamba, nebamushipe. Kadi wewe kolesha muoyi. Kutekeshi mu maboku to!