Read Tshiluba Yoshuwa 19 Bible Online

Yoshuwa 19 - Tshiluba bible

Yoshuwa 19

¹Buloba buibidi buvua Yoshuwa mutshinke, uvua mubupeshe bena tshisamba tshia Shimeyone, bilondeshile muvua meku abu. Buloba ebu bavua babunyungulukila kudi buloba bua tshisamba tshia Yuda.

²Mu buloba abu muvua bimenga ebi: Bersheba, Sheba, Molada,

³Ashare-Shuwale, Baala, Esheme,

⁴Eltolade, Betule, Orma,

⁵Siklaje, Bete-Markabote, Ashare-Susa,

⁶Bete-Lebayote ne Sharuyene. Bimenga bionsu bivua dikumi ne bisatu. Muvua kabidi misoku ivua nabi mutumba.

⁷Kuvua kabidi bimenga ebi: Ayine, Rimone, Etere ne Ashane. Bimenga ebi bivua binayi. Muvua kabidi misoku ivua nabi mutumba.

⁸Ku bimenga ebi bavua bakusakidila misoku yonsu ivua nabi pabuipi, too ne ku Balate-Bere ne Ramote-Negebe. Bimenga bionsu ebi bivua bienza buloba bua bena Shimeyone, bilondeshile mudi meku abu.

⁹Bavua bangata buloba bua bena Shimeyone ku buloba bua bena Yuda. Bualu ndelanganyi ya Yuda ivua mipete buloba bupite bunene. Ke pavua tshisamba tshia bena Shimeyone munkatshi mua buloba buvuabu babanyine bena Yuda.

¹⁰Buloba buisatu buvua Yoshuwa mutshinke, uvua mubuabanyine tshisamba tshia bena Zebulone,[83] bilondeshile muvua meku abu. Buloba buabu abu buvua mu tshitupa tshia kuinshi tshia ditunga too ne ku Saride.

¹¹Kumukila ku Saride, mukalu wabu uvua ubandila ku luseke ludi diba dibuelela, utungunuka ne ku Marala. Pashishe uvua ulunguluka ufika kabidi ku Dabeshete, ne ku musulu udi ku luseke ludi diba dipatukila lua Yokneyame.

¹²Ku luseke lukuabu lua Saride, mukalu uvua uyila ku luseke ludi diba dipatukila, upitshila mu buloba bua Kislote-Tabore, usambukila ku Dabrate, ubanda ufika ku Yafiya.

¹³Pashishe uvua utungunuka, Dinemenene ku luseke ludi diba dipatukila, uya too ne ku Ngate-Efere ne ku Ete-Kashine, ufika ku Rimone, ubenda ku Neya.

¹⁴Ku mutu wa ditunga, mukalu uvua unyunguluka Anatone, ushikidila mu tshibandabanda tshia Ifta-Ele.

¹⁵Mu buloba ebu muvua bimenga dikumi ne bibidi, kabidi ne misoku ivua pabuipi ne bimenga abi. Bimenga bisunguluke bivua: Katate, Nakalale, Shimrone, Idala ne Betleyeme.[84]

¹⁶Misoku yonsu eyi bavua bayabanyine tshisamba tshia bena Zebulone, bilondeshile meku abu.

¹⁷Buloba buinayi buvua Yoshuwa mutshinke, uvua mubupeshe bena tshisamba tshia Isakare,[85] bilondeshile muvua meku abu.

¹⁸Mu buloba abu muvua bimenga ebi: Yizreyele,[86] Keshulote, Shuneme,

¹⁹Afarayime, Kiyone, Anakarate,

²⁰Rabite, Kishiyone, Ebese,

²¹Remete, Ene-Nganime, Ene-Ada ne Bete-Pashese.

²²Mukalu wabu uvua ufika ku Tabore, Shashayime, Bete-Shemeshe, ushikidila ku musulu wa Yardene.[87] Mu buloba ebu muvua bimenga dikumi ne bisambombu, muvua kabidi misoku ivua pabuipi ne bimenga ebi.

²³Bionsu ebi bivua mu buloba buvua bena Isakare bapeta, bilondeshile meku abu.

²⁴Buloba buitanu buvua Yoshuwa mutshinke, uvua mubupeshe bena tshisamba tshia Ashere,[88] bilondeshile meku abu.

²⁵Mu buloba abu muvua bimenga ebi: Elkate, Ali, Betene, Akeshafe,

²⁶Alameleke, Amade ne Mishale. Ku luseke ludi diba dibuelela, mukalu uvua ufika ku mukuna wa Karmele,[89] ulonda musulu wa Shikore-Libnate.

²⁷Ku luseke ludi diba dipatukila, mukalu uvua ubandila ku Bete-Dagone, ufika mu buloba bua bena Zebulone ne mu tshibandabanda tshia Ifta-Ele. Pashishe uvua uyila ku luseke lua ku mutu kua ditunga, ufika ku Bete-Emeke ne ku Neyiyele. Uvua utungunukila amu ku luseke alu, upitshila ku Kabule,

²⁸Abdone,[90] Rekobe, Amone ne ku Kana, bua kushikidila pabuipi ne tshimenga tshinene tshia Sidone.

²⁹Pashishe uvua ubendela muaba awu, utangila ku Rama ne ku tshidila tshia Tire,[91] tshidibu bakolesha ne bimana, uya ku Osha, upitshila ku Makalabe, Akzibe,

³⁰Uma, Afeke, Rekobe, bua kushikidila ku Mayi manene a pankatshi pa matunga. Mu buloba ebu muvua bimenga makumi abidi ne bibidi. Muvua kabidi ne misoku ivua nabi pabuipi.

³¹Bionsu ebi bivua mu buloba buvua bena Ashere bapeta, bilondeshile muvua meku abu.

³²Buloba basambombu buvua Yoshuwa mutshinke, uvua mubupeshe bena tshisamba tshia Naftali,[92] bilondeshile muvua meku abu.

³³Mukalu wabu uvua utuadijila kuinshi ku Elefe ne ku mutshi wa lusanga wa ku Sananime. Uvua upitshila ku Adami-Nekebe ne Yabneyele, ufika ku Lakume, ushikidila ku musulu wa Yardene.

³⁴Ku luseke ludi diba dibuelela, mukalu uvua ubenda uya ku Aznote-Tabore, ufika ku Ukoke, uyila kuinshi kua buloba bua bena Zebulone, pashishe luseke ludi diba dibuelela uvua ulonda buloba bua bena Ashere. Ku luseke ludi diba dipatukila, mukalu uvua anu musulu wa Yardene.[93]

³⁵Bimenga bivua ne bimana bikolesha bivua: Sidime, Sere, Amate, Rakate, Kinerete,

³⁶Adama, Rama, Ashore,

³⁷Kedeshe, Edreyi, Ene-Ashore,

³⁸Irane, Migdale-Ele, Oreme, Bete-Anate ne Bete-Shemeshe. Bimenga bionsu pamue bivua dikumi ne tshitema. Kuvua kabidi misoku ivua mutumba ne bimenga abi.

³⁹Bionsu ebi bivua mu buloba buvua bena tshisamba tshia Naftali bapete, bilondeshile muvua meku abu.

⁴⁰Buloba bua muanda mutekete buvua Yoshuwa mutshinke, uvua mubupeshe bena tshisamba tshia Dane,[94] bilondeshile muvua meku abu.

⁴¹Mu buloba abu muvua bimenga ebi: Sora, Eshetayole, Ire-Shemeshe,

⁴²Shalabine, Ayalone, Itla,

⁴³Elone, Timna, Ekrone,

⁴⁴Elteke, Ngibetone, Batate,

⁴⁵Yekude, Bene-Berake, Ngate-Rimone,

⁴⁶musulu wa Yarkone,[95] Rakone, ne buloba budi bunyungulula Yafa.

⁴⁷Tshikondu tshiyuabu bipata bena tshisamba tshia Dane mu buloba buabu, kuyabu kuluisha bena Lesheme. Kukuatabu tshimenga atshi, kushipa benatshi. Pashishe kuasabu mu tshimenga atshi tshijima. Nanku kukudimunabu dina dia tshimenga tshia Lesheme, kutshinyika nkambua wabu Dane.[96]

⁴⁸Bimenga bionsu ebi, ne misoku ivua pamue ne bimenga ebi, bivua mu buloba buvuabu babanyine bena Dane, bilondeshile muvua meku abu.

⁴⁹Bena Izrayele bamane kujikija diabanyangana dia ditunga, bavua bapesha pende Yoshuwa, muana wa Nune, tshitupa tshia buloba.

⁵⁰Bu muvua Maweja-Nangila mumane kuamba, kupeshabu Yoshuwa tshimenga tshia Timnate-Sera tshivuaye mulombe. Tshimenga atshi tshivua mu buloba bua mikuna bua Efrayime. Yoshuwa kuasulula tshimenga atshi, kusombamu.

⁵¹Mutuangaji Elazare,[97] Yoshuwa muana wa Nune, ne bamfumu ba meku a bisamba bia bena Izrayele, kutshinka bua kuabanya maloba onsu aa. Bavua babanyanganawu pavuabu mu Silo, muaba uvua Maweja-Nangila, mu mushiku wa ntenta wa kusambakena. Ke muvuabu bajikija mudimu wa diabanyangana ditunga nanku.