Read Tshiluba Yoshuwa 20 Bible Online

Yoshuwa 20 - Tshiluba bible

Yoshuwa 20

¹Maweja-Nangila kuambila Yoshuwa

²bua amanyishe bena Izrayele mikenji eyi ne: — Nusungule bimenga bia kunyemena,[98] bimvua mumane kumanyisha Moshe bua nusungule.

³Padi muntu wa munkatshi muenu, ushipa muntu mukuabu mu mpukapuka, kayi mumushipe ku bukole, udi mua kunyemena mu tshimenga tshimue tshia ku bimenga ebi, bua musombuedi kamushipi to.[99]

⁴Padi muntu uvua mushipangane awu mumane kufika mu tshimenga tshia kunyemena, udi wimanyina ku tshibuelelu, muaba udibu balumbuluishila bantu bonsu. Udi umvuija bakulu badi muaba awu, mushindu uvua njiwu mienzeke. Pashishe bakulu badi bamuanyisha bua abuele mu tshimenga, bamuleja muaba udiye mua kusomba.

⁵Padi musombuedianganyi ulondakaja uvua mushipangane awu, too ne mu tshimenga tshia kunyemena, bena mu tshimenga kabena mua kufila muntu awu kudi musombuedi to. Bualu uvua mushipangane awu uvua mushipe muntu mu mpukapuka; kabivua bua lukinu to.

⁶Nanku muntu uvua mushipangane awu, neashale mu tshimenga atshi too ne padibu bamulumbuluisha kudi bena Izrayele, kabidi too ne padi mutuangaji uvua wenza mudimu mu tshikondu atshi ufua. Pashishe uvua mushipangane awu udi upingana kuende, mu tshimenga tshivuaye munyeme.

⁷Bena Izrayele kusungula bimenga bia kunyemena: ke Kedeshe udi mu Ngalileya luseke lua mikuna ya Naftali; Shekeme luseke lua mikuna ya Efrayime; ne Kiriyate-Arba uvuabu binyika kabidi Ebrone, luseke lua mikuna ya Yuda.[100]

⁸Luseke ludi diba dipatukila lua tshimenga tshia Yeriko, dishiya dia musulu wa Yardene, bavua basungula tshimenga tshia Beshere tshidi mu mpata ya mu tshipeta ya mu buloba bua bena Rubene; tshimenga kabidi tshia Ramote tshidi mu Ngilaade, buloba budibu bapeshe bena Ngade; ne tshimenga tshia Ngolane mu Bashane, buloba budibu bapeshe bena Menashe.

⁹Bimenga ebi bavua babisungula bua bena Izrayele ne benyi badi munkatshi muabu banyemenemu. Nanku pavua muntu ushipangana mu mpukapuka, udi mushipangane awu uvua unyema mumusombuedi anu mushindu ewu. Nanku kabawa mua kushipa muntu awu, kabayi banji kumulumbuluisha kudi bena Izrayele to.