Read Tshiluba Yoshuwa 22 Bible Online

Yoshuwa 22 - Tshiluba bible

Yoshuwa 22

¹Pashishe Yoshuwa kubikila bantu balume ba mu tshisamba tshia Rubene, tshia Ngade, ne ba mu tshitupa tshia tshisamba tshia bena Menashe bavua luseke ludi diba dipatukila lua Yardene.

²Kubambilaye ne: — Nudi bakumbaje bionsu bivua Moshe, muntu wa Maweja-Nangila, muambe. Nudi benze amu mumvua meme kabidi munuambile.

³Matuku onsu aa too ne lelu, kanuena balekele bana benu bena Izrayele to. Ke munudi batumikile meyi a Maweja-Nangila Mvidi Mukulu wenu.

⁴Mpindiewu, Maweja-Nangila Mvidi Mukulu wenu mmumane kuitaba bua bana benu basombe mu buloba buabu, bu muvuaye mumane kubalaya. Nanku nuenu nudi mua kupingana kuenu. Nuye kusomba muaba uvua Moshe, muntu wa Maweja-Nangila, munuabanyine, luseke ludi diba dipatukila lua Yardene.

⁵Kadi nukumbaje bimpe mikenji yonsu ivua Moshe, muntu wa Maweja-Nangila, munuambile ne: nunange Maweja-Nangila Mvidi Mukulu wenu, nuenze bionsu bidiye musue, nukumbaje mikenji yende. Nuitabe amu Maweja-Nangila, numuenzele mudimu ne muoyi mujima, ne bukole buenu buonsu.

⁶Pashishe Yoshuwa kubela lupemba, kulayangana nabu, bua bapingane kuabu.

⁷Kubambilaye ne: — Pinganayi kuenu, ne bintu bionsu binudi bapete: bimuna, nkanu ya tshiamu tshitoke tshia mushinga mukole, biamu bia mpawungi, biamu bikunze, bifike, ne bilamba bipite bungi. Nanku nuabanyangane bintu bionsu, binudi banyenga baluishi betu ebi, ne bena bisamba bienu bakuabu. Bena tshitupa tshia tshisamba tshia Menashe,

⁸Moshe ukavua mumane kubapesha buloba bua Bashane, budi luseke ludi diba dipatukila lua Yardene. Kadi tshitupa tshikuabu tshia tshisamba tshia bena Menashe, Yoshuwa kubabanyina maloba awa luseke ludi diba dibuelela lua Yardene, anu bu muvuaye muabanyine bisamba bikuabu.

⁹Ke ndelanganyi ya Rubene, ya Ngade, ne ya mu tshitupa tshia tshisamba tshia bena Menashe tshivua luseke ludi diba dipatukila lua Yardene, kupingana kuabu. Kushiyabu bena Izrayele bakuabu mu Silo, mu ditunga dia Kenaane. Kupinganabu mu ditunga dia Ngilaade, divuabu bababanyine, bu muvua Maweja-Nangila mumane kuambila Moshe.

¹⁰Patshi wabu mu ditunga dia Kenaane, bafika ku muelelu wa Yardene, kuasabu tshilambuilu pabuipi ne musulu awu. Tshivua tshinene, tshikemesha bantu bonsu.

¹¹Bantu kuya kumanyisha bena Izrayele bakuabu ne: — Telejayi: bena Rubene, bena Ngade, ne bena Menashe badi basombe luseke ludi diba dipatukila lua Yardene, mbase tshilambuilu ku muelelu wa musulu, kadi luseke luetu, mu ditunga dia Kenaane!

¹²Bena Izrayele bumvue nanku, kudisangishabu bonsu ku Silo, bua kuya kuluisha bisamba bia bena Izrayele bivua ku luseke ludi diba dipatukila lua Yardene.[106]

¹³Bena Izrayele kutuma Pinase, muana wa mutuangaji Elazare, mu ditunga dia Ngilaade, bua kuyukila ne bena Rubene, bena Ngade, ne bena Menashe ba luseke ludi diba dipatukila lua Yardene.

¹⁴Kuyabu kumufila kudi balombodi ba bena Izrayele dikumi, mulombodi umue ku tshisamba tshionsu. Balombodi bonsu abu bavua bamfumu ba biota mu bisamba bia bena Izrayele.

¹⁵Kuyabu mu ditunga dia Ngilaade, muaba uvua bisamba bia bena Izrayele bivua luseke ludi diba dipatukila lua Yardene. Kuyukilabu nabu,

¹⁶mu dina dia bena Izrayele bonsu, babakonka ne: — Nudi benzele Mvidi Mukulu wa bena Izrayele tshilema tshinene nenku bua tshinyi? Mpindiewu, nudi balekele kutumikila Maweja-Nangila bua tshinyi? Panudi base tshilambuilu etshi mu dina dienu, nudi batombokele Maweja-Nangila.

¹⁷Ku Peyore, tuvua benze bibi, tuetu kupeta dinyoka dia buenzayi buetu. Maweja-Nangila kukengesha bena Izrayele bonsu ne tshipupu tshikole![107] Dikenga kadiena dianji kunutonda anyi?

¹⁸Monayi mpindiewu, nudi nubenga Maweja-Nangila! Panudi nutombokela Maweja-Nangila lelu, maloba neafikile bena Izrayele bonsu munda!

¹⁹Panudi bamone ne: Maweja-Nangila kena mua kusomba mu buloba buenu, nanku pinganayi mu ditunga dia Maweja-Nangila. Ke mudi muaba wende wa tshijila. Nuangate maloba munkatshi muetu. Kadi nangananga lekelayi kutombokela Maweja-Nangila, kututombokela ne tuetu, panudi nudiashila tshienu tshilambuilu, nubenga tshia Maweja-Nangila Mvidi Mukulu wetu.

²⁰Pavua Akane, wa ku ndelanganyi ya Zera, muenze tshilema tshinene, muangate bintu bikandika, Maweja-Nangila uvua mufikile bena Izrayele bonsu munda, mubakengeshe. Nuenu nudi bamanye bualu ebu![108] Kabidi, Akane kena mufue nkayende bua bubi buende to.

²¹Bena tshisamba tshia Rubene, tshia Ngade, ne bena Menashe ba luseke ludi diba dipatukila lua Yardene, kuandamuna bamfumu ba meku a bisamba bikuabu bia bena Izrayele ne:

²²— Maweja-Nangila ke Mvidi Mukulu wa bukole buonsu. Eyowa, anu Yeye ke Mvidi Mukulu wa bukole buonsu. Maweja-Nangila mmumanye tshitudi bashile tshilambuilu etshi. Bena Izrayele bonsu kabidi nebamanye bualu ebu. Patuikala batombokele Maweja-Nangila, bamuenzele tshilema bunene nanku, atushipe lukasa!

²³Patuikala babenge Maweja-Nangila, base tshilambuilu etshi mu dina dietu, bua kulambuilapu milambu ya kuosha, ya bintu bia mu madimi, nansha ya bobumue, anu Maweja-Nangila nkayende atunyoke![109]

²⁴Kadi katuvua ne meji awu to. Tshilambuilu etshi, katuvua batshiase tshianana to. Tudi batshiase, bualu tuvua ne bowa, tuela meji ne: matuku adi kumpala, ndelanganyi yenu neyikonke yetu ne: “Tshidi tshileja ne: nudi numvuangana ne Maweja-Nangila Mvidi Mukulu wa bena Izrayele, ntshinyi?

²⁵Bualu Maweja-Nangila nkayende mmumane kuteka Yardene bu mukalu pankatshi petu nenu. Nanku nuenu bena Rubene ne bena Ngade, kanuena ne tshinudi mua kuamba kumpala kua Maweja-Nangila to.” Diba adi ndelanganyi yenu idi mua kukandika yetu bua kayitendeledi Maweja-Nangila.

²⁶Ke patudi bashile tshilambuilu etshi muaba ewu. Kadi katuena batshiase bua kulambuilapu milambu ya kuosha, nansha ya mushindu mukuabu to.

²⁷Tudi tujinga bua tshilambuilu etshi tshikale tshimanyinu tshietu nenu ne ndelanganyi yalonda, tshijadike ne: tuetu tudi mua kutendelela Maweja-Nangila, tudi mua kulambula milambu ya kuosha, ya bobumue, nansha ya mushindu mukuabu. Nanku ndelanganyi yenu kayena mua kujadikila yetu ne: kanuena ne tshinudi mua kuamba kumpala kua Maweja-Nangila.

²⁸Tuvua bele meji ne: matuku adi kumpala, pikalabu mua kutuambila, nansha kuambila ndelanganyi yetu ne: kanuena ne tshinudi mua kuamba, nebandamune ne: “Monayi mudi bankambua betu base tshilambuilu etshi, anu mushindu umue ne tshilambuilu tshia Maweja-Nangila. Kadi kabavua batshiase bua kulambuilapu milambu ya kuosha, nansha milambu mikuabu. Bavua batshiase bua tshikale tshimanyinu pankatshi petu nenu.”

²⁹Nanku, katuena basue kutombokela Maweja-Nangila, nansha kumubenga. Katuena base tshilambuilu etshi bua kulambuilapu milambu ya kuosha, ya bintu bia mu madimi, nansha milambu mikuabu. Katuena basue kulambula milambu muaba mukuabu, kadi amu pa tshilambuilu tshia Maweja-Nangila Mvidi Mukulu wetu, tshidi kumpala kua muaba wende wa tshijila.

³⁰Mutuangaji Pinase, balombodi ba bena Izrayele, ne bamfumu ba meku a bena Izrayele, bavua ne disanka bua bionsu bivuabu babambile kudi bena Rubene, bena Ngade, ne kudi bena Menashe.

³¹Pinase, muana wa mutuangaji Elazare, kubambila ne: — Mpindiewu tudi bamanye ne: Maweja-Nangila udi nenu, bualu kanuena bamuenzele tshilema tshinene tshituvua tutshina. Nanku kanuena bakebele bena Izrayele dinyoka kudi Maweja-Nangila to.

³²Pashishe Pinase, muana wa mutuangaji Elazare, ne balombodi ba bena Izrayele, kushiyanganabu ne bena Rubene, ne bena Ngade. Kumukabu mu ditunga dia Ngilaade, bua kupingana mu dia Kenaane. Kuambilabu bena Izrayele bakuabu malu onsu awu.

³³Malu awu kusankisha bena Izrayele. Kuelabu Mvidi Mukulu tuasakidila. Kulekelabu meji avuabu nawu a kuya kuluisha bena Rubene, ne bena Ngade, bua kunyangakaja buloba buabu.

³⁴Pashishe bena Rubene ne bena Ngade kuamba ne: — Tshilambuilu etshi tshidi tshitujadikila tuetu bonsu ne: Maweja-Nangila ke Mvidi Mukulu! Nanku kutshinyikabu dina ne: “Mujadiki.”