Read Tshiluba Yoshuwa 3 Bible Online

Yoshuwa 3 - Tshiluba bible

Yoshuwa 3

¹Yoshuwa ne bena Izrayele kumuka mu Shitime ne dinda dionsu. Kupuekelabu ku muelelu wa Yardene. Kuasabu mitanda yabu muaba awu, bindile mua kusabuka.

²Kupita matuku asatu, balombodi ba bena Izrayele kuendakana mu mitanda,

³bambila bantu ne: — Panudi numona batuangaji ba bena Levi[7] bambule mushete wa ndondu wa Maweja-Nangila Mvidi Mukulu wenu, numuangale bonsu muaba awu, nubatue mu nyima.

⁴Ke munudi mua kumanya njila wa kulonda. Katshia kanuvua banji kupitshila muaba ewu to. Kadi kanusemenyi pabuipi ne mushete wa ndondu to. Nuikale bashilangane nawu misangu yonsu, mutantshi wa kilometre bu umue.

⁵Yoshuwa kuambila bena Izrayele ne: — Nujikije mikiya inudi nayi, bualu malaba Maweja-Nangila neenze bishima munkatshi muenu.

⁶Butshia, Yoshuwa kuambila batuangaji bua bambule mushete wa ndondu, bapita kumpala kua bena Izrayele. Batuangaji kuenza nanku.

⁷Maweja-Nangila kuambila Yoshuwa ne: — Biangatshile ku lelu, ndi njadika bumfumu buebe ku mesu kua bena Izrayele bonsu. Nebamanye ne: ndi nebe, bu mumvua ne Moshe.

⁸Kadi wewe ambila batuangaji badi bambula mushete wa ndondu ne: padibu bafika ku muelelu wa Yardene, babuele mu mayi, bimane.

⁹Ke Yoshuwa kuambila bena Izrayele ne: — Semenayi apa, nuteleje mudi Maweja-Nangila Mvidi Mukulu wenu wamba.

¹⁰Nenujadike ne: Mvidi Mukulu wa muoyi udi munkatshi muenu. Yeye neipate bantu badi kumpala kuenu: bena Kenaane, bena Iti, bena Ivi, bena Perizi, bena Ngirgashi, bena Amore ne bena Yebusa.

¹¹Nanku mushete wa ndondu wa Maweja-Nangila, Mukalenga wa buloba bujima, neusabuke Yardene kumpala kuenu.

¹²Nusungule bantu balume dikumi ne babidi, bilondeshile bungi bua bisamba bienu. Ku tshisamba tshionsu kuikala muntu umue.

¹³Padi batuangaji badi bambula mushete wa tshijila, babuela mu Yardene, diakamue mayi awu neakosoloke. Mayi a ku mutu neimane dibula.

¹⁴Bena Izrayele kumuangata mu mitanda, bua kusabuka musulu wa Yardene. Batuangaji bavua bambula mushete wa ndondu, bavua benda kumpala kuabu.

¹⁵Tshikondu atshi tshivua tshia kunowa biakudia. Ke tshivua musulu wa Yardene uwula bikole, mayi apita pa bibungubungu.[8] Nanku anu batuangaji batue makasa mu mayi,

¹⁶ke musulu kukosoloka. Mayi kuimana dibula kule ku mutu wa musulu mu tshimenga tshia Adame, tshidi pabuipi ne tshimenga tshia Sartane.[9] Mayi avua apueka kuinshi, aya kubuela mu Mayi manene a luepu, kujiminawu onsu butubutuu. Bena Izrayele kusabuka, balulamangane ne tshimenga tshia Yeriko.

¹⁷Batuangaji bavua bambula mushete wa tshijila, kuimana balulame mu lusenga lume, munkatshi mua musulu wa Yardene, too ne mudi bonsu basabuka bafika dia muamua ku makasa kume.