Read Tshiluba Yoshuwa 5 Bible Online

Yoshuwa 5 - Tshiluba bible

Yoshuwa 5

¹Bakalenga bonsu ba bena Amore, bavua base luseke ludi diba dibuelela lua Yardene, ne bakalenga ba bena Kenaane bavua base ku muelelu wa Mayi manene a pankatshi pa matunga, kumvuabu lumu ne: Maweja-Nangila mmumishe mayi a musulu wa Yardene, bua bena Izrayele basabuke. Nanku bobu kupampakana bikole, kutshinabu bena Izrayele, kabayi kabidi ne dikima dia kubaluisha to.

²Anu tshikondu atshi, Maweja-Nangila kuambila Yoshuwa ne: — Usonge tuele tua ntewula, bua uteke ndelanganyi mipiamipia ya bena Izrayele eyi panshi.

³Yoshuwa kusonga tuele tua ntewula, kuteka bena Izrayele panshi. Bionsu ebi bivua bienzekela muaba udibu babikila ne kakuna ka kutekela bantu panshi.

⁴Tshikondu tshivua bena Izrayele bapatuke mu Ejipitu, bantu balume bavua bamane kupeta bidimu bikumbane bia kuluangana mvita, bavua bamane kubateka panshi. Kadi bantu abu bonsu, bavua bafuila mu tshipela.

⁵Nanku bana ba balume bonsu ba-vuabu balelela mu tshipela kudi bena Izrayele, kabawa babateke panshi to. Ke pavua Yoshuwa ne bua kubateka panshi.

⁶Bena Izrayele bavua bapitshila mu tshipela bidimu makumi anayi. Ku ndekelu kua tshikondu atshi, bantu balume bavua ne bidimu bikumbane bua kuluangana mvita, mu tshikondu tshikavuabu bamane kumuangata mu Ejipitu, bakavua bamane kufua, bualu bavua batombokela Maweja-Nangila. Maweja-Nangila uvua mumane kuditshipa ne: bantu aba kabakufika mu ditunga dia biakudia bia bungi dimvua mulaye bankambua babu ne: nendipeshe bana benu.[13]

⁷Nenku Maweja-Nangila kubueja bana abu mu ditunga pa mutu pa baledi babu. Bana abuke bavua Yoshuwa mutekeshe panshi.

⁸Yoshuwa mumane kubatekesha bonsu panshi, bavua bashale amu mu mitanda too ne diba diumi mputa yabu.

⁹Pashishe Maweja-Nangila kuambila Yoshuwa ne: — Lelu ndi munumushe bundu, bunuvua bapatuke nabu mu Ejipitu. Ke padibu babikila muaba awu too ne mpindiewu ne: Ngilgale.[14]

¹⁰Bena Izrayele kuasa mitanda mu Ngilgale. Matuku dikumi ne anayi a ngondu,[15] dilolu, mu mpata udi pabuipi ne tshimenga tshia Yeriko, kuenzabu tshibilu tshia Dipita dia Maweja-Nangila.

¹¹Butshia kudiabu mampa kaayi mela buanga, kudiabu kabidi ntete mikanga. Bavua balamba bionsu ne biakudia bia mu ditunga.

¹²Biangatshile tshikondu atshi, bena Izrayele kabavua bapeta kabidi mana to. Amu tshidimu atshi, kutuadijabu kudia biakudia bivua bimena mu ditunga dia Kenaane.[16]

¹³Dituku dikuabu, Yoshuwa uvua pabuipi ne Yeriko. Diakamue kumonaye muntu muimane kumpala kuende. Muntu awu uvua ne muele mupatula mu tshibubu, mukuata ku tshianza. Yoshuwa kutantshila kudiye, umuebeja ne: — Udi ku luseke luetu anyi, udi ku lua baluishi betu?

¹⁴Muntu awu kuandamuna ne: — Ntshidi mfika amu mpindiewu. Tshiena wa ku luseke luenu, nansha wa ku lua baluishi benu to. Ndi mfumu wa tshikulu tshia Maweja-Nangila. Nanku Yoshuwa kudiela mpala panshi, umuambila ne: — Meme ndi muena mudimu webe. Tshiudi untumina diyi bua meme kuenza ntshinyi?

¹⁵Mfumu wa tshikulu tshia Maweja-Nangila kumuandamuna ne: — Kopola bisabata biebe ku makasa, bualu udi muimane muaba wa tshijila.[17] Ke Yoshuwa kuitaba.