Read Tshiluba Yoshuwa 6 Bible Online

Yoshuwa 6 - Tshiluba bible

Yoshuwa 6

¹Biibi bionsu bia ku tshimenga tshia Yeriko bivua binjila, bikanga bikole bua bena Izrayele kababuedi to. Muntu nansha umue kavua mua kubuela nansha kupatuka.

²Nanku Maweja-Nangila kuambila Yoshuwa ne: — Tangila mundi nkupesha tshimenga tshia Yeriko, mukalenga watshi ne bena mvita bende.

³Wewe ne bena mvita bonsu baudi nabu, nenuende nunyungulule tshimenga. Nutshinyungulule musangu umue ku dituku. Nuenze nanku matuku asambombu.

⁴Batuangaji muanda mutekete nebadianjidile kumpala kua mushete wa tshijila. Mutuangaji yonsu neikale ne mpungi. Kadi dituku dia muanda mutekete, nenunyungulule tshimenga misangu muanda mutekete. Batuangaji nebikale benda bela mpungi.

⁵Nanku diba didi mpungi udila amu kudila, bena Izrayele nebele bibingu bikole bia mvita. Diba adi bimana bia tshimenga nebiupuke. Nebabuele mu tshimenga, muntu yonsu uya anu buludi mutangile kumpala kuende.

⁶Yoshuwa, muana wa Nune, kubikila batuangaji, ubambila ne: — Ambulayi mushete wa ndondu wa Maweja-Nangila pa makaya. Bantu muanda mutekete ba kunudi badianjile kupita kumpala kua mushete wa ndondu, benda bela mpungi.

⁷Pashishe Yoshuwa kuambila bena Izrayele ne: — Jukayi, ndayi nunyungulule tshimenga. Bamue bena mvita bende kumpala kua mushete wa tshijila wa Maweja-Nangila.

⁸Bionsu bivua bienzeka amu muvua Yoshuwa muambe. Batuangaji muanda mutekete bavua benda bela mpungi yabu kumpala kua mushete wa tshijila.

⁹Bena mvita tshisumbu bavua benda kumpala kua mushete wa tshijila, bakuabu bavua benda baulonda. Pavuabu batungunuka, mpungi ivua idila amu kudila kayiyi ipuwa.

¹⁰Kadi Yoshuwa uvua muambile bena Izrayele bua banji kupuwa amu kupuwa too ne pawaye ubambila bua kuela bibingu bia mvita.

¹¹Yoshuwa kuambila bambudi ba mushete wa tshijila bua lunyunguluka tshimenga musangu umue. Pashishe bavua bapingane mu mitanda bua kulala.

¹²Yoshuwa kujuka ne dinda dionsu. Batuangaji kuambula kabidi mushete wa tshijila pa makaya.

¹³Batuangaji muanda mutekete bavua ne mpungi, kupita kumpala kua mushete wa ndondu. Kutuadijabu kabidi luendu, benda bela mpungi. Bamue bena mvita bavua kumpala kua batuangaji abu muanda mutekete, bakuabu bavua panyima, benda balonda mushete wa ndondu. Pavuabu benda, mpungi ivua idila amu kudila.

¹⁴Dituku adi dibidi, kunyungulukabu kabidi tshimenga musangu anu umue. Pashishe, kupinganabu mu mitanda. Kuenzabu nanku matuku asambombu.

¹⁵Kadi dituku dia muanda mutekete, kujukabu butuku bumane kutshia. Kunyungulukabu tshimenga misangu muanda mutekete anu mushindu uvuabu benza awu. Anu dituku adi, ke divuabu banyunguluka tshimenga misangu muanda mutekete.

¹⁶Kadi musangu wa muanda mutekete, pavua batuangaji bela mpungi, Yoshuwa kuambila bena Izrayele ne: — Elayi bibingu bia mvita! Bualu Maweja-Nangila mmumane kunupa tshimenga etshi.

¹⁷Tshimenga etshi netshibutuke ne bionsu bidimu, bualu mbintu bia kulambula Maweja-Nangila. Nulekele amu Rakabe, mukaji muena tshiendenda, ne muoyi, yeye ne bantu bonsu badi mu nzubu muende. Bualu uvua musokoke batentekedi betu batuvua batume.

¹⁸Kadi nudimuke! Kanuangatshi tshintu nansha tshimue tshia mu tshimenga etshi. Bualu nudi mua kudikebela diakabi. Bena Izrayele bonsu badi mu mitanda badi mua kubutuka.[18]

¹⁹Biamu bitoke bia mushinga mukole bionsu, bia mpawungi, bikunze, ne bikuabu bionsu, nebabijidile mu dina dia Maweja-Nangila, babiele mu diyeba diende.

²⁰Batuangaji kuela mpungi. Bena Izrayele bumvue mpungi ayi, kuelabu bibingu bikole bia mvita. Bimana bia tshimenga kupukabi panshi mbuu. Diakamue bena Izrayele kubanda ku tshimenga. Muntu yonsu kuya buludi ne muaba uvuaye mululamangane nawu. Kukuatabu tshimenga.

²¹Kushipabu bantu ba mu tshimenga atshi: balume, bakaji, bantu bakole ne bana batekete. Kushipabu too ne ngombe, mikoku ne mpunde.

²²Yoshuwa kuambila bantu babidi bavua batentekela tshimenga tshia Yeriko ne: — Ndayi kua Rakabe, mukaji muena tshiendenda. Numupatule mu nzubu amu ne bena diende bonsu, ne bapika, bu munuvua bamane kuditshipa kudiye.

²³Batentekedi kuya ku nzubu wa Rakabe. Kumupatulabu ne baledi bende, bana babu ba balume, ba bakaji, ne bena diku diabu bonsu. Kubalamabu muaba musunguluke uvua kauyi mu mitanda ya bena Izrayele to.

²⁴Pashishe bena Izrayele kuosha tshimenga tshia Yeriko ne bionsu bivuamu. Kabawa bosha biamu bitoke bia mushinga mukole, biamu bia mpawungi, biamu bikunze, nansha bikuabu. Bavua babiteka muaba wa tshijila wa Maweja-Nangila, bua bishale biende.

²⁵Yoshuwa uvua mulame Rakabe, mukaji muena tshiendenda, ne bonsu bavuaye nabu, ne muoyi. Bualu mukaji awu, uvua musokoke bantu bavua baye kutentekela tshimenga tshia Yeriko. Nanku Rakabe kusomba munkatshi mua bena Izrayele, ndelanganyi itshidi isombamu too ne mpindiewu.

²⁶Tshikondu atshi, Yoshuwa kuyukila ne bena Izrayele, ubadimuja bua tshimenga tshia Yeriko, wamba ne: “Muntu wibaka kabidi tshimenga tshia Yeriko, bamutshipe kudi Maweja-Nangila. Padiye umbula mikidi ya tshimenga etshi, muanende muanabute asangane kufua anyee? Afue! Padiye wela biibi ku tshimenga etshi, muanende muana mukala asangane kufua anyee? Afue![19]”

²⁷Maweja-Nangila uvua ne Yoshuwa. Lumu lua Yoshuwa luvua lutangalaka ditunga dijima.