Read Tshiluba 2 Tesalonike 3 Bible Online

2 Tesalonike 3 - Tshiluba bible

2 Tesalonike 3

¹Bana hetu, tulombelayi kudi Mvidi Mukulu, bua muaku wa Mfumu utante amu kutanta lubilu, bua bantu bawangate ne mushinga, bu munuvua nuenu benze.

²Lombayi kabidi bua Mvidi Mukulu atusungidile ku bianza bia bantu babi, ne bia bena malu mabi. Bualu bantu kabena basue bonsu kuitaba.

³Kadi Mfumu udi muena diyi dimue. Neanupe bukole. Neanuepule kudi Muena bubi.[11]

⁴Mu dina dia Mfumu, tudi tutekemena kunudi, tujadika mene ne: nansha lelu, nansha matuku atshidi kumpala, nudi amu nukumbaja bituvua banuambile.

⁵Mfumu unzulule mioyi yenu, bua nuakidile Mvidi Mukulu udi ununanga, nuakidile kabidi Yezu udi ufila lutulu.

⁶Bana hetu, tudi Umulomba mu dina dia Mfumu Yezu Kristu ne: umbukayi kudi bana hetu bonsu badi kabayi bakuata mudimu,[12]

⁷Nudi bamanye munudi mua kulonda tshilejilu tshietu. Bualu patuvua kuenu aku, katuvua bena lulengu to.

⁸Muntu kavua mutupe biakudia tshianana. Kadi tuvua bakuate mudimu, bapungile bikole. Tuvua benze mudimu munya ne butuku, bua muntu nansha umue wa kunudi kambudi bujitu buetu.[13]

⁹Tuvua benze nanku, ki mbua se katuvua ne bukokeshi bua kupeta diambuluisha kunudi. Kadi tuvua basue kunuleja tshilejilu tshia nuenu kulonda.

¹⁰Bualu patuvua kuenu aku, tuvua banuambile ne: “Udi kayi musue kukuata mudimu, alekele kudia![14]”

¹¹Tudi Umuambila nanku, bualu tudi bumvue ne: bamue ba munkatshi muenu kabena bakuata mudimu.[15] Badi basomba patupu, babuelakana amu mu malua bakuabu.

¹²Bantu abu tudi tubalomba, tubambila mu dina dia Mfumu Yezu ne: nukuate mudimu matuku onsu, bua nudipetele tshiakudia tshienu.

¹³Bana hetu, nuenu kabidi kanupungidi bua kuenza malu mimpe.

¹⁴Padi muntu kayi muitabe mikenji itudi bafunde mu mukanda ewu, numumanye. Kanuendakanyi nende, bua bundu bumukuate.

¹⁵Kadi kanumutangidi bu muena lukuna. Numubele amu bu muanenu.

¹⁶Mfumu udi ufila bupole, anupe ditalala diba dionsu ne mishindu yonsu. Mfumu ikale nenu bonsu.

¹⁷Miaku indi nnuela nayi muoyi, ndi nyifunda ku tshianza tshianyi. — Ke mundi ntua tshiala ku mikanda yanyi yonsu. Nutangile bimpe mundi mfunda.

¹⁸Dinanga dia Mfumu wetu Yezu Kristu dishindame munda muenu bonsu.