Read Tshiluba 1 Timote 5 Bible Online

1 Timote 5 - Tshiluba bible

1 Timote 5

¹Kubedi mukulumpe ne lonji nansha. Kadi uyukile nende, mumutangile bu tatuebe.[23] Uyukile ne bansonga, mubatangile bu bana benu.

²Uyukile ne bakaji bakulumpe, mubatangile bu bamamuebe; ne bansongakaji, mubatangile bu bana benu ba bakaji, baudi ne bua kunemeka.

³Ambuluisha bakaji bakamba, badi kabayi ne mubambuluishi,[24] ubanemeke.

⁴Kadi padi mukaji mukamba ne bana, nansha ne bikulu, bana aba badianjile kukumbaja tshidi bena ditaba ne bua kuenzela bena diku diabu. Nanku bakuatshile mamuabu, nansha kakuabu, mudimu, muvua bamamu babakuatshile kumpala. Ke tshidi Mvidi Mukulu musue.

⁵Mukaji mukamba menemene, udi kayi ne muntu wa kumulama, ke udi mutekemene anu kudi Mvidi Mukulu, umutendelela munya ne butuku, umulomba diambuluisha.

⁶Kadi mukaji mukamba utshidi ne milowu, nansha yeye ne muoyi, mmufue.

⁷Ke tshiudi ne bua kubambila, bua kabamonyi mua kubadiwula.

⁸Padi muntu kayi ulama bena diende, nangananga badiye nabu mu nzubu umue, mmuvile ditaba. Udi mupite ku bubi muntu udi kayi mumanye Mvidi Mukulu.

⁹Bua kufunda muntu mukaji ku tshisumbu tshia bakamba, amu yeye ne bidimu bipite makumi asambombu, muye mu dibaka musangu amu umue.[25]

¹⁰Bantu bajadike muvuaye muenze malu mimpe, muvuaye mukoleshe bana bende biakane, muvuaye muakidile benyi kuende, muvuaye muoweshe bena ditaba makasa, muvuaye muambuluishe bakengi, mukuate midimu mimpe yonsu.

¹¹Kufundi bakaji bakamba batshidi batekete mu mukanda wa bakaji bakamba to. Bualu padibu bumvua milowu ya kuya ku dibaka tshiakabidi, nebumuke kudi Kristu.

¹²Nebapie tshibawu, bualu mbupule ndondu wa kumpala muabu bafue ne Kristu.

¹³Kabidi bakadi bapeta tshibidilu tshia kuendakana ku nzubu ku nzubu, kujimija diba. Tshidi tshipite bubi: badi badienza bena biakulakula ne bena biambamba. Badi bakula malu adi kaayi abatangila.

¹⁴Ke pandi musue bua bansongakaji badi bafuishe balume, baye ku mabaka, balele bana, bakuate midimu ya mu nzubu, bua baluishi hetu kabamonyi pa kutujanyina.

¹⁵Bualu bakaji bakamba bakuabu bakadi bamane kupambuka mu njila mululame, balonda diabolu.

¹⁶Kadi mukaji muena ditaba muikale ne bana babu bakaji bakamba, abambuluishe, bua Tshisumbu tshia bena ditaba katshiditatshishi nabu. Nanku netshimone mua kuambuluisha anu bakaji bakamba menemene, badi kabayi ne mubalami.

¹⁷Bakulu badi balombola bimpe Tshisumbu tshia bena ditaba, mbakumbanyine mafutu misangu ibidi,[26] nangananga badi batata bua kumanyisha bantu muaku wa Mvidi Mukulu, kubumvuijawu.

¹⁸Mukanda wa tshijila udi ujadika ne: “Ngombe udi udiata ntete ya kuenza bukula bua kuyishipula, kabena mua kumuela nkata ku mbanga to.” Udi wamba kabidi ne: “Muena mudimu badi ne bua kumufuta.[27]”

¹⁹Kuena mua kuanyisha bua bafunde mukulu ku tshilumbu, amu padi bafundi babidi nansha basatu batshijadike.[28]

²⁰Badi benza malu mabi, ubakanyine ku mesu a bantu, bua bakuabu kabidi batshine.

²¹Ndi nkulomba, nkusengelela kumpala kua Mvidi Mukulu, kua Yezu Kristu, ne kua batumibue bende ba tshijila ne: ulame mikenji eyi, kuyi ne kansungasunga mu biudi wenza, kuyi wengeleka muntu, kuyi umukengesha patupu.

²²Kutenteki muntu bianza lukasalukasa bua kumupesha muanzu mu Tshisumbu tshia bena ditaba. Kubuelakanyi mu mibi idi bantu bakuabu benza. Wewe kabidi kuenji bibi.

²³Kuena mua kunua anu mayi nkayawu. Kadi wanuaku maluvu makese bua kusulakaja tshibi tshiebe, bualu udi upita kusama.

²⁴Mibi ya bamue bantu idi imueneka patoke, kabayi banji kubalumbuluisha. Kadi mibi ya bakuabu idi imueneka anu ku shoo.

²⁵Midimi mimpe kabidi idi imueneka patoke. Nansha midimu mimpe itshidi misokome, neimueneke pashishe.