Read Tshiluba 2 Timote 2 Bible Online

2 Timote 2 - Tshiluba bible

2 Timote 2

¹Muananyi, utantamane mu dinanga dia Mvidi Mukulu ditudi nadi patudi tudisanga ne Yezu Kristu.

²Biuvua mumvue meme mulongeshe, bantu ba bungi bavua babiumvue, babijadike. Nanku ubilongeshe bantu ba nsongu, badi bamanye mua kubilongesha bakuabu.

³Kenga nanyi, mudi musolayi wa muoyi umue wa Yezu Kristu wenza.

⁴Musolayi udi ku mudimu, kena ubuelakana mu malu a bantu bakuabu, padiye musue kusankisha mulombodi wa tshisumbu tshia basolayi.

⁵Muntu udi ubuela mu manaya a kunyema lubilu, udi mua kupeta nsala wa lumu, amu padiye ukumbaja mikenji ya manaya.[8]

⁶Tshidime udi ukuata mudimu mukole, ke udi udianjila kunowa bia mu budimi.

⁷Umvua bindi ngamba ebi. Mfumu neakuambuluishe bua ubijingulule bionsu.

⁸Mesu ebe ikale amu kudi Yezu Kristu, wa ku ndelanganyi ya Davide, uvuabu babishe ku lufu, mudi Lumu lua Disanka lundi ndongesha luamba.

⁹Ndi nkenga, mbansuike kabidi mu nkanu bu muena buenzavi, bualu ndi mmanyisha bantu Lumu lua Disanka elu. Kadi kabena mua kusuika muaku wa Mvidi Mukulu ne nkanu to.

¹⁰Ke pandi ngumvua bionsu ne lutuulu, bua diakalenga dia bantu badi Mvidi Mukulu musungule. Ke mudibu bapeta bobu kabidi lupandu kudi Yezu Kristu, ne butumbi bua kashidi.

¹¹Miaku eyi idi milelela: “Bituikala bafue nende, netuikale nende ne muoyi;

¹²Bituikala bumvue makenga ne lutuulu, netudie nende bumfumu; Bituamuvila, Yeye kabidi neatuvile;

¹³Bituamubenga, Yeye neatunange, bualu kena mua kudivila muende mudiye.[9]”

¹⁴Uvuluije bantu bonsu malu aa. Ubabele bikole kumpala kua Mvidi Mukulu ne: kanuedianganyi mpata ya pa miaku. Mpata ya nunku kayena ilengelela bantu, kadi idi amu ipambula badi bayiteleja.

¹⁵Ukuate mudimu bimpe, bua bakuanyishe kudi Mvidi Mukulu, bu muena mudimu udi kayi ne bua kufua bundu bua mudimu wende, bualu udi umanyisha muaku wa Mvidi Mukulu mu bulelela.

¹⁶Epuka ku biakulakula bia patupu bidi bibengangana ne ditaba. Bualu badi babiakula nebumbuke ku kakese ku kakese kudi Mvidi Mukulu.

¹⁷Bidibu balongesha bidi bu mputa mubole udi udiunda amu kudiunda. Mu bantu ba nanku mudi Imeneya,[10] ne Filete.

¹⁸Bavua bumuke mu njila wa bulelela, bualu badi balongesha ne: dibiika dietu dia ku lufu ndimane kuenzeka. Ke mudibu bapambuisha kabidi bantu bavule mu njila wa ditaba.

¹⁹Kadi tshitaku tshikole tshivua Mvidi Mukulu muase, kabena mua kutshinyungisha. Bavua bafundapu ne: “Mfumu udi mumanye bena diende.[11]” mBafundepu kabidi ne: “Muntu yonsu udi wamba ne: ndi muntu wa Mvidi Mukulu, udi ne bua kulekela kuenza malu mabi.”

²⁰Mu nzubu munene kamuena amu malonga a tshiamu tshia mpawungi, nansha a tshiamu tshitoke tshia mushinga mukole. Mudi kabidi a mitshi, ne a diima. A kumpala badi benza nawu mudimu mu bibilu. Makuabu mmateka bua midimu ya buatshiabuatshia.

²¹Padi muntu udilengeja ku malu mabi onsu andi ntela, nebamuangate bua midimu misunguluke. Bualu udi witaba Mfumu ne muoyi mujima, umulengelela. Ke mudiye mua kumuambuluisha ku midimu mimpe yonsu.

²²Epuka ku majinga mabi a mu bunsonga. Keba kuenza malu mimpe. Ikala ne ditaba, dinanga, ditalala. Udisange ne bonsu badi ne muoyi muimpe, batendelela Mfumu.

²³Kadi ubenge mpata ya bupale ne butshimbakane. Umanye ne: ndekelu wayi udi amu matandu.

²⁴Kadi muntu udi wenzela Mfumu mudimu, kena ne bua kutandangana to. Udi ne bua kusankidila muntu yonsu. Amanye mua kulongesha bimpe. Ikale kabidi ne lutuulu.

²⁵Udi ne bua kulongesha bantu badi bamuela mpata, kayi ufika munda. Bumue nebapete kudi Mvidi Mukulu mushindu wa kudilengeja,[12] ne wa kumanya bulelela.

²⁶Nanku nebapete tshiakabidi meji malenga. Nebumuke ku mateyi a diabolu uvua mubakuate, mubenzeje muvuaye musue.