Read Tshiluba 2 Timote 4 Bible Online

2 Timote 4 - Tshiluba bible

2 Timote 4

¹Ndi nkusengelela kumpala kua Mvidi Mukulu ne kua Yezu Kristu, walumbuluisha ba muoyi ne bafue, ndi nkulomba mu dina dia difika dia Yezu Kristu, ne dia Bukalenga buende, ne:

²longesha bantu Muaku wa Mvidi Mukulu. Amba amu kuamba, nansha mu tshikondu tshimpe, nansha mu tshikondu tshibi. Itabijija bantu. Ubabele, ubakoleshe ku muoyi, ubalongeshe ne lutuulu, kuyi upungila.

³Bualu tshikondu netshifike, tshiabenga bantu kuteleja badi balongesha malu malelela. Nebakebe amu tshidibu bajinga bobu. Nebadisangishile balongeshi bavule badi babalongesha amu bidibu basue kuteleja.

⁴Kabakuteleja kabidi malu malelela to. Nebaabenge bua kuteleja ne ntema yonsu mianu.

⁵Kadi wewe udilame, umanye bionsu biudi wenza. Wikale ne lutuulu mu dikenga. Ulongeshe bimpe Lumu lua Disanka. Ukumbaje muebe muonsu mudimu uudi wenzela Mvidi Mukulu.

⁶Diba dianyi dia kumfilabu bu mulambu diakukumbana. Tshikondu tshia meme kufua tshiafiki.

⁷Ndi muluangane mvita mimpe. Ndi mujikije mutantshi wonsu umvua ne bua kunyema. Ndi mulame ditaba too ne ku ndekelu.[17]

⁸Mpindiewu tshidi tshinshadile tshidi amu bua meme kupeta nsala wa lumu. Mfumu, udi ukosa nsambu pa yoyi, neangele ka lumbandi dituku dia Tshilumbuluilu. Kakungela amu meme nkayanyi. Kadi neele kabidi bantu bonsu badi bindila ne dinanga diba didiye mua kumueneka.

⁹Kolesha, bua umpete lukasa.

¹⁰Bualu Demase ukadi mundekele, muye ku Tesalonike, bualu udi mutambe kusua malu a panu. Kreshense mmuye ku Ngalate, Tite ku Dalmasiya.[18]

¹¹Anu Luke ke utudi nende. Wangate Marke, nufike nende, bualu udi mua kungambuluisha.[19]

¹²Nkadi mutume Tishike mu Efeze.[20]

¹³Diba diwafika, untuadile tshinkutu tshimvua mushiye mu Trowase kua Karpuse. Untuadile kabidi ne mikanda, nangananga ya biseba bivunga.[21]

¹⁴Aleksandre, nsenda wa biamu, mmungenzele bibi be. Mfumu neamufute bilondeshile tshivuaye muenze.[22]

¹⁵Wewe kabidi umudimukile, bualu uvua mubenge bikole bionsu bituvua balongeshe.

¹⁶Diba dimvua ndilumbuluila musangu wa kumpala,[23] muntu nansha umue kavua mutue ku tshianyi to. Bonsu bavua banshiye. Mvidi Mukulu kabashi tshilumbu atshi to!

¹⁷Kadi Mfumu uvua pabuipi nanyi. Uvua munkoleshe mu maboku, bua mmone mua kukobola Lumu lua Disanka amu mudilu, kulumvuija bantu bonsu ba bisamba bikuabu. Mvidi Mukulu mmumpandishe mukana mua nyama wa ntambue.

¹⁸Mfumu neansungidile ku malu mabi onsu. Neambueje buludi mu Bukalenga buende bua mu diulu. Butumbi buikale kudi Mfumu kashidi! Amene.

¹⁹Ela Priskila ne Akuila, ne bena diku dia Onesifore,[24] muoyi.

²⁰Eraste uvua mushale mu Korente. Mvua mushiye Trofime ku Milete, bualu uvua usama.[25]

²¹Kolesha, ufike lukasa, muvu wa mashika kauyi muanji kufika. Ebuluse, Pudense, Linuse, Klodiya, ne bena ditaba bakuabu bonsu, badi banutumina muoyi.

²²Mfumu ikale nebe. Dinanga dia Mvidi Mukulu dishindame munda muenu.