Read Tshiluba Tite 1 Bible Online

Tite 1 - Tshiluba bible

Tite 1

¹Meme Polu, muena mudimu wa Mvidi Mukulu, ne mupostolu wa Yezu Kristu, ndi mfunda mukanda ewu. Bavua bangimikile mudimu wa kufikisha ku ditaba bantu bavua Mvidi Mukulu musungule, ne wa kubamanyisha mudibu mua kunemeka Mvidi Mukulu mu bulelela bilondeshile ditaba diabu.

²Ke mudibu mua kutekemena muoyi wa kashidi, udi Mvidi Mukulu, udi kayi ushima, mudianze kutulaya kumpala kua bidimu bionsu.

³Mpindiewu tshikondu tshiakumbanyi tshidiye utumanyisha muoyi awu, mu Lumu lua Disanka lundi meme ne bua kukobola ku bukenji bupeta kudi Mvidi Mukulu, Musungidi wetu.

⁴Wewe Tite[1] udi muananyi mulelela mu ditaba didi didisanga nebe. Ndi nkufundila mukanda ewu, nkujingila ne: dinanga ne bupole bia kudi Mvidi Mukulu Tatu ne Yezu Kristu, Musungidi wetu, bishindame munda muebe.

⁵Mvua mukushiye mu tshidila tshia Kreta, bua wewe kulongolola bimvua meme tshiyi mujikije. Nanku mu tshimenga tshionsu uteke bakulu ku mutu kua Tshisumbu tshia bena ditaba. Uvuluke meyi ne mikandu bimvua mukushile.

⁶Mukulu ikale muntu udibu kabayi mua kudiwula, muena mukaji umue.[2] Bana bende bikale bena ditaba. Kabikadi ba lumu lubi, nansha bena tshishiku.

⁷Bualu mulombodi wa Tshisumbu tshia bena ditaba udi wenzela Mvidi Mukulu mudimu. Nanku bantu kabena mua kuikala ne mushindu wa kumudiwula ku bualu nansha bumue. Kaditembi muanzu wende. Kafiki munda lukasalukasa, kikadi munuavi, muena tshikisu, nansha muena mutshima udi ukeba kupeta biuma mu njila mubi.

⁸Amanye mua kuakidila bimpe benyi. Anyishe bilenga bidi bantu benza. Ikale muntu wa meji, muntu muimpe, wa tshijila, udi mumanye mua kudikokesha.

⁹Alongeshe malu a Mvidi Mukulu malelela, amu muvuabu bamulongeshewu. Nanku neamanye mua kukolesha bantu bakuabu ku muoyi. Alongeshe amu malu malelela. Aleje bantu badi babenga dilongesha diende ntupakanyi yabu.[3]

¹⁰Bualu kudi bantu bavule, nangananga munkatshi mua bena Yuda bavua babuele mu Tshisumbu tshia bena ditaba, badi bantomboji, bashima bantu ne biakulakula.

¹¹Nanku ubakandike, ubabuikidije mukana, bualu badi bajula bimvundu mu meku majima, balongesha malu adi kaayi makane, anu bua kupeta biuma mushindu mubi.

¹²Muena Kreta menemene, umue wa ku bambi babu, uvua wamba ne: “Bena Kreta badi amu bena dishima, nyama ya lonji, bena lulengu, basombela anu bua kudia.[4]”

¹³mMuambilemu! Ke paudi ne bua kubabela bikole bua bapingane mu ditaba dilelela.

¹⁴Kabalamatshi kabidi ku nsumuinu ya bena Yuda, nansha ku mikenji ivuabu bele kudi bantu badi babenga bulelela.

¹⁵Bionsu bidi biakane, bua bantu badi ne muoyi muakane. Kadi bua badi banyanguke, kabayi ne ditaba, kakuena tshintu tshimpe nansha tshimue. Bualu meji abu ne muoyi wabu mbinyanguke.

¹⁶Badi bajadika ne: tudi bamanye Mvidi Mukulu. Kadi malu adibu benza adi aleja ne: kabena bamumanye to. Badi bantu babi, bantomboji, kabayi mua kukumbaja mudimu muimpe nansha umue.