Read Tshiluba Tite 2 Bible Online

Tite 2 - Tshiluba bible

Tite 2

¹Kadi wewe ulongeshe Tshisumbu tshia bena ditaba malu malelela.

²Longesha bantu bakulakaje bua badilame bimpe, badinemeke, bikale bena meji, bashindame mu ditaba, mu dinanga ne mu lutuulu.

³Longesha kabidi bakaji bakulumpe bua benze malu makanyine bantu ba tshijila, kabayi bena bijanu, kabayi basombela amu maluvu. Balongeshe kabidi bakuabu amu malu adi mimpe.

⁴Baleje bansongakaji batshidi babuelelaku mu dibaka, mudibu mua kunanga babayabu, kunanga kabidi ne bana badibu balele.

⁵Babalongeshe mudibu mua kuikala bena meji, ba munda mutoke, badi bakuata midimu ya nzubu ne mankenda. Bikale kabidi bantu ba muoyi muimpe, badi batumikila babayabu, bua muntu kapendi muaku wa Mvidi Mukulu.

⁶Ubele kabidi bansonga bua bikale ne meji.

⁷Wewe mene wikale tshilejilu mu midimu mimpe yonsu. Wikale muambi wa nsongu, udi mushindike tshidiye ulongesha.

⁸Akula miaku amu milenga, idibu kabayi mua kudiwula. Nanku baluishi bebe nebafue bundu, bualu kabena bapeta bualu bubi bua kutujana nabu.

⁹Bapika badi ne bua kukokela bamfumu babu, kubasankisha mu bionsu, kubenga kuela mpata ku diyi diabu.

¹⁰Kabena ne bua kuiba bamfumu babu kantu nansha kamue. Kadi badi ne bua kubenzela bimpe ne munanunanu. Nanku bionsu bidibu benza abi nebinemeshe dilongesha didi ditangila Mvidi Mukulu, Musungidi wetu.

¹¹Bualu Mvidi Mukulu mmuleje mudiye unanga bantu, musue kubapandisha bonsu.

¹²Dinanga edi didi ditulongesha mua kuela nyima ku malu mabi, ne ku nkuka ya pa buloba, bua tuikale bena meji, tuenze bidi Mvidi Mukulu musue, tumuitabe.

¹³Ke mutudi mua kuindila dituku dia disanka ditudi tutekemena. Dituku adi butumbi bua Mvidi Mukulu wetu munene ne Musungidi Yezu Kristu[5] nebumueneke patoke.

¹⁴Yeye mene uvua mudifile buetu tuetu, bua kutupikula ku bubi buonsu, kutulengeja, kutuenza bantu bende badi bamuitaba amu Yeye, benza midimu mimpe ne disuminyina.[6]

¹⁵Ebi ke biudi ne bua kulongesha. Ke muudi ne bua kukolesha bantu ku muoyi, kubabela. Enza nanku ne bumfumu buonsu buudi nabu. Muntu nansha umue kakupepeji.