Read Tshiluba Ebrewu 1 Bible Online

Ebrewu 1 - Tshiluba bible

Ebrewu 1

¹Ku kale, Mvidi Mukulu uvua muambile bankambua hetu malu misangu ne misangu, kabidi mishindu ne mishindu kudi bambi.

²Kadi matuku a ndekelu aa, mmutuambidilewu kudi Muanende. Kudiye nkudi Mvidi Mukulu mufukile bintu bionsu.[1] Yeye ke udi Mvidi Mukulu musungule bua apiane bintu bionsu.

³Muanende ewu ke udi uleja bukole bua butumbi bua Mvidi Mukulu, ke udi uleja menemene mudi Mvidi Mukulu, kabidi udi ushindika bintu bionsu ku bukole bua muaku wende. Mumane kujimijila bantu bubi buabu, mmuye kusomba mu diulu ku tshianza tshia balume tshia Mvidi Mukulu,[2] muena bukole buonsu.

⁴Muana udi mupite batumibue ba Mvidi Mukulu, bualu Mvidi Mukulu mmumupeshe dina didi dipite diabu ku buneme.

⁵Katshia Mvidi Mukulu kena muanji kuambila nansha umue wa ku batumibue bende ne: “Wewe ke Muananyi, biangatshile ku lelu meme ndi Tatuebe.” Kena muanji kuambila kabidi mutumibue nansha umue ne: “Nengikale Tatuende, yeye neikale Muananyi.[3]

⁶Kadi tshikondu tshivua Mvidi Mukulu musue kutuma Muanende, muanabute pa buloba, kuambaye ne: “Batumibue bonsu ba Mvidi Mukulu bamukukuile.”

⁷Bua batumibue, Mvidi Mukulu uvua muambe ne: “Mvidi Mukulu udi wenza batumibue bende mueyelu, bena mudimu bende, ndimi ya kapia.[4]”

⁸Kadi bua Muana, Mvidi Mukulu uvua muambe ne: “Mvidi Mukulu, nkuasa webe udi mushindame kashidi, Neulombole bukalenga buebe mu buakane.

⁹Udi unanga bidi Mvidi Mukulu musue, ubenga bidiye ubenga. Ke pavua Mvidi Mukulu, Mvidi Mukulu webe mukujidile, mukuele manyi a tshijila a disanka pa mutu, mukusungule anu wewe, mubenge bena mulongu nebe.[5]”

¹⁰Kuambaye kabidi ne: “Maweja-Nangila, wewe ke udi mushindike buloba ku tshibangidilu, muenze diulu ne bianza biebe.

¹¹Bintu bionsu abi nebijimine, kadi wewe neushale. Diulu ne buloba nebisunsuke bu bilamba bia kale.

¹²Neubivunge mudibu bavunga kazaku, nebikudimuke bu bilamba. Kadi wewe udi ushala momumue, bidimu biebe kabiena bijika.[6]”

¹³Mvidi Mukulu katshia kena muanji kuambila nansha umue wa ku batumibue bende ne: “Somba ku tshianza tshianyi tshia balume, too ne pangateka baluishi bebe bu tshidiatshilu tshia makasa ebe.[7]”

¹⁴Batumibue ba Mvidi Mukulu mene mbanganyi? Buonsu buabu mmieyelu idi yenzela Mvidi Mukulu mudimu. Bobu ke badiye utuma bua kuambuluisha badi ne bua kupeta lupandu.