Read Tshiluba Ebrewu 10 Bible Online

Ebrewu 10 - Tshiluba bible

Ebrewu 10

¹Mikenji ya bena Yuda kayena ileja menemene malu malelela nansha, kadi idi amu mundidimbi wa malu atshidi kumpala. Mmunyi mudiyi mua kufikisha bantu badi basemena pabuipi ne Mvidi Mukulu ku bujima buabu, padibu balambula milambu amu ya momumue matuku onsu, ku tshidimu ku tshidimu, kabayi balekela?

²Bu bantu badi batendelela Mvidi Mukulu mushindu ewu bapeta dijimija dia mibi yabu musangu umue bua kashidi, kabavua mua kudiumvua kabidi ne: tudi bena tshibawu. Nenku kabavua mua kulambula kabidi mulambu to.

³Kadi, milambu eyi idi ivuluija bantu mibi yabu ku tshidimu ku tshidimu.

⁴Bualu mashi a ngombe milume ne a mbuji ya mpumbu kaena mua kujimija mibi.

⁵Nenku pavua Kristu mufike mu bantu, uvua muambile Mvidi Mukulu ne: “Kuena musue milambu nansha malambi, kadi uvua mundongoluele mubidi.[58]

⁶Kuena muanyishe nansha nyama miosha pa tshilambuilu, nansha milambu ya kukobolola nayi bantu.

⁷Ke meme kuamba ne: ‘Eyi, Mvidi Mukulu wanyi, ke meme ewu, ndi mfika bua kuenza tshiudi musue, bu mudibu bafunde bualu buanyi mu mukanda wa mikenji.’ ”

⁸Kumpala udi wamba ne: “Kuena musue milambu, nansha malambi, nansha nyama miosha pa tshilambuilu, nansha milambu ya kukobolola nayi bantu. Bionsu ebi kabiena bikusankisha.” Kadi numanye ne: badi bafila milambu eyi bua kukumbaja bidi mikenji yamba.

⁹Pashishe udi wamba kabidi ne: “Eyi, Mvidi Mukulu wanyi, ke meme ewu, ndi mfika bua kuenza tshiudi musue.” Ke mudi Mvidi Mukulu ubenga milambu yonsu ya kale, upingaja mulambu wa Kristu mu muaba wayi.

¹⁰Bu mudi Yezu Kristu mukumbaje tshivua Mvidi Mukulu musue, bavua batujimijila mibi, ku mulambu wa mubidi wende uvuaye mufile musangu umue bua kashidi.

¹¹Ku dituku ku dituku, mutuangaji yonsu uvua wimana kulu bua kuenzela Mvidi Mukulu mudimu wende. Udi ulambula misangu mivule milambu ya momumue idi kayiyi mua kujimija mibi musangu nansha umue.[59]

¹²Kadi Kristu uvua mufile mulambu anu umue bua mibi. Mulambu ewu udi ushala ne bukole kashidi. Pashishe udi muye kusomba ku dia balume dia Mvidi Mukulu.

¹³Mpindiewu ke muaba udiye windila bua Mvidi Mukulu ateke baluishi bende bu tshidiatshilu kuinshi kua makasa ende.[60]

¹⁴Nenku ku mulambu umue udi mufikishe tshisamba tshia bena ditaba ku bujima buatshi bua kashidi.

¹⁵Mueyelu wa Tshijila udi utujadikila kabidi bualu ebu. Bualu udi wamba bangabanga ne:

¹⁶“Maweja-Nangila udi wamba ne: ndondu ungatua nabu kunyima kua matuku aa udi nenku: Nemfunde mikenji yanyi mu mioyi yabu, neishale mu lungenyi luabu.”

¹⁷Pashishe udi wamba kabidi ne: “Tshiena mvuluka kabidi mibi ne bilema bidibu benza.[61]”

¹⁸Nenku, padibu bamane kujimija mibi, kabena balambula kabidi mulambu wa kuyijimija nansha.

¹⁹Nenku, bana hetu, ku bukole bua mashi a mulambu wa Yezu, tudi mua kubuela ne muoyi mushindame muaba wa tshijila menemene mutudi basue.

²⁰Yezu mmutunzuluile njila mupiamupia, njila wa muoyi, bualu uvua upitshila mu tshilamba, mmomumue ne: mu mubidi wende wa muntu.

²¹Tudi ne mutuangaji munene udibu bateka ku mutu kua nzubu wa Mvidi Mukulu.

²²Nenku tusemenayi kudi Mvidi Mukulu ne muoyi umue, bashindame mu ditaba dietu, bamane kulengeja muoyi wetu ku bilema bionsu bidi kondu ketu ka munda katupisha nabi, bamane kuowesha mubidi wetu ne mayi mimpe.[62]

²³Tulame bimpe ditekemena ditudi tuamba, bualu tudi bajadike ne: Mvidi Mukulu neakumbaje bivuaye mulaye.

²⁴Tuambuluishanganayi bua tumone mua kukoleshangana ku muoyi, tunangangane, tuenze malu mimpe.

²⁵Katulekedi bisangilu bietu bu bakuabu bakadi ne tshibidilu tshia kubenga kubuelamu. Kadi tukoleshangane ku muoyi, tuenze nanku nangananga lelu unudi numona mudi dituku dia Mfumu disemena pabuipi.

²⁶Bualu tuetu tukadi bamane kumanya bulelela. Nanku patudi tutungunuka ku bukole ku dienza malu mabi, kakuena mulambu mukuabu udi mua kujimija mibi.

²⁷Diba adi tshitudi mua kuenza kabidi ntshinyi? Amu kuindila ne bowa malu atshidi kumpala, momumue ne: Dikosa dia nsambu, ne kapia kakole kadi ne bua kubutula baluishi ba Mvidi Mukulu.[63]

²⁸Muntu yonsu udi ubenga kuitaba mikenji ya Moshe, pamanyabu ne: mmuenze bibi, badi bamushipa, kabayi bamufuila luse, bantu babidi nansha basatu bajadike bualu.[64]

²⁹Nenku muntu udi upetula Muana wa Mvidi Mukulu, umona mashi a ndondu wa Mvidi Mukulu a wabu bamukobolola nawu bu tshintu tshia tshianana, upenda Mueyelu wa Mvidi Mukulu udi mutunange, nebamuenzele tshinyi? Nudi mua kujadika ne: badi ne bua kumunyoka bikole bipite!

³⁰Bualu tudi bamanye uvua muambe ne: “Meme ke wasombola, meme ke wafuta,” kabidi ne: “Maweja-Nangila nealumbuluishe bantu bende.[65]”

³¹Kupona mu bianza bia Mvidi Mukulu wa muoyi, mbualu budi bukuatshisha bowa!

³²Nuvuluke munuvua kale. Amu nuenu bamane kupeta butoke bua Mvidi Mukulu, nuvua bakenga bikole, nuvua balame muoyi mushindame mu mvita.

³³Pamue apa, bavua banupenda, banukengesha ku mesu a bantu. Misangu mikuabu nuvua nuambuluisha, nukolesha ku muoyi bavuabu bakengesha nanku.

³⁴Bualu nuvua badisange ne bavua mu lukanu mu makenga abu. Pavuabu banunyenga bintu, nuvua bitabe ne disanka bua kubijimija. Bualu nuvua bamanye ne: tudi ne bubanji bupite buimpe budi bushala kashidi.

³⁵Nenku kanujimiji muoyi mushindame unudi nawu, neunupeteshe difutu dinene.

³⁶Nuikale ne munanunanu bua nukumbaje tshidi Mvidi Mukulu musue, nupete bidiye munulaye.

³⁷Bualu Mukanda wa tshijila udi wamba ne: “Indilayi, katupa kipi, kipi menemene, nenku udi ne bua kufika neafike. Kena ujingakana nansha.

³⁸Kadi, muntu udi wenza bindi musue, neikale ne muoyi, bualu udi witaba. Kadi padiye upingana tshianyima, tshiena nsanka kabidi bualu buende nansha.[66]”

³⁹Tuetu katuena bantu badi bapingana tshianyima. Kadi tudi tuitaba, tulonda njila wa lupandu.