Read Tshiluba Ebrewu 11 Bible Online

Ebrewu 11 - Tshiluba bible

Ebrewu 11

¹Muntu udi ne ditaba ukadi ne bidiye utekemena, ukadi mumanye bidiye kayi umona.

²Mvidi Mukulu uvua muanyishe bantu ba kale bualu bavua bitaba.

³Ku ditaba ke kutudi bajadike ne: bintu bionsu mbabifuke ku muaku wa Mvidi Mukulu. Nanku bitudi tumona mbifume ku bitudi katuyi tumona.[67]

⁴Amu bua ditaba, Ebele uvua mulambule Mvidi Mukulu mulambu mupite wa Kayine ku buimpe. Bua ditaba diende Mvidi Mukulu uvua mumubingishe bualu Mvidi Mukulu uvua muanyishe malambi ende. Amu bua ditaba diende, Ebele utshidi wakula nansha yeye mumane kufua.[68]

⁵Amu bua ditaba, bakambula Enoke baya nende kua Mvidi Mukulu kayi mufue. Muntu nansha umue kena mumumone kabidi, bualu Mvidi Mukulu uvua mumuambule bua ikale nende. Mukanda wa tshijila udi wamba ne: Enoke uvua musankishe Mvidi Mukulu kabayi banji kumuambula mulu.[69]

⁶Kadi muntu kena mua kusankisha Mvidi Mukulu padiye kayi ne ditaba. Bualu muntu udi usemena pabuipi ne Mvidi Mukulu udi ne bua kuitaba ne: Mvidi Mukulu udiku, udi ufuta badi bamukeba.

⁷Amu bua ditaba, Nowa kuteleja bivua Mvidi Mukulu mumuambile bua malu avua ne bua kuenzeka, avuaye kayi muanji kumona. Kuitabaye Mvidi Mukulu, kuenza buatu. Nanku yeye ne bena diku diende kupanda. Ke muvuaye udiwula bena panu, ubinga ku mesu a Mvidi Mukulu bualu uvua witaba.[70]

⁸Amu bua ditaba, Abrahame kutumikila Mvidi Mukulu uvua mumubikile. Kuyaye ku ditunga divua Mvidi Mukulu musue kumupesha bu bumpianyi. Kumukaye mu ditunga diabu, kayi mumanye kuvuaye ne bua kuya.

⁹Amu bua ditaba, kusombaye bu muenyi mu ditunga divua Mvidi Mukulu mumulaye. Kusombaye mu nzubu ya ntenta ne Izake kabidi ne Yakobe, bavua bapeta dilaya dia momumue kudi Mvidi Mukulu.[71]

¹⁰Bualu Abrahame uvua mutekemene tshimenga tshivua ne tshitaku tshishindame tshidi Mvidi Mukulu muase bilondeshile meji ende.[72]

¹¹Amu bua ditaba, Abrahame kupeta bukole bua kulela, nansha mukavuaye mukulakaje. Sara kabidi kavua mua kulela to. Abrahame[73] uvua mushindike ne: Mvidi Mukulu neakumbaje bivuaye mulaye.

¹²Nenku muntu umue ewu, uvua mumane kuikala bu mufue, kulela ndelanganyi ya bungi, bungi kabuyi kubala, bu mitotu ya mu diulu, bu lusenga lua ku muelelu wa mayi manene.[74]

¹³Bantu bonsu aba, mbafue mu ditaba. Kabavua bapeta bivua Mvidi Mukulu mubalaye. Kadi bavua babimone, bisankisha pa bule, bamba ne: tudi bena tshimuangi ne bena luendu pa buloba.[75]

¹⁴Bantu badi bakula nanku, badi baleja patoke mudibu bakeba ditunga diabu.

¹⁵Bu bobu banyingalala bua ditunga divuabu bashiye, batata ne mushindu wa kupinganamu.

¹⁶Kadi batata bajinga ditunga ditambe buimpe, mbuena kuamba ne: ditunga dia mu diulu. Ke padi Mvidi Mukulu kayi umvua bundu padibu bamubikila ne: mMvidi Mukulu wetu, bualu mmubalongoluele tshimenga.

¹⁷Amu bua ditaba diende, Abrahame kufila Izake bu mulambu, pavua Mvidi Mukulu mumutete. Uvua muitabe bua kulambula muanende mulela umue,[76]

¹⁸nansha muvua Mvidi Mukulu mumulaye, mumuambile ne: “Neupete ndelanganyi imvua mukulaye kudi Izake.”

¹⁹Abrahame uvua wela meji ne: Mvidi Mukulu udi ne bukole bua kubisha Izake ku lufu. Ke muvua Abrahame mupete tshiakabidi Izake bu muntu mubike ku bafue.

²⁰Amu bua ditaba diende kabidi, Izake utata muele Yakobe ne Esawu lupemba, bua matuku atshivua kumpala.[77]

²¹Amu bua ditaba, Yakobe utata muele bana bonsu babidi ba Yozefe lupemba pavuaye upunga ne lufu. Utata mueyemene ku lusongu lua dikombu diende, utendelela Mvidi Mukulu.

²²Amu bua ditaba, Yozefe pakavuaye pa kufua,[78] uvua umanyisha bena Izrayele muvuabu ne bua kupatuka mu Ejipitu. Utata ubaleja kabidi bivuabu ne bua kuenza ne mifuba yende.

²³Amu bua ditaba diabu, baledi ba Moshe bavua bamusokoke ngondu isatu kunyima kua diledibua diende. Bualu batata bamone ne: muana ewu mmulengele. Nanku kabavua batshina mukenji wa mukalenga nansha.[79]

²⁴Amu bua ditaba, Moshe mumane kukola, kavua musue bua bamubikile kabidi ne: mmuana wa muana wa bakaji wa mukalenga wa bena Ejipitu.

²⁵Utata muanyishe bua banukengeshe pamue ne bantu ba Mvidi Mukulu pa mutu pa kusankaye mu malu mabi.

²⁶Utata muele meji ne: bobu bampetule mutotabu bapetule Kristu, ndi mpeta tshiuma tshidi tshipite biuma bia mu Ejipitu. Bualu mesu ende avua atangila amu difutu divuaye muindile kumpala.

²⁷Amu bua ditaba, Moshe kumuka ku Ejipitu kayi utshina tshiji tshia mukalenga. Utata ne muoyi mukole, bu muntu udi umona Mvidi Mukulu udi kayi umueneka.[80]

²⁸Amu bua ditaba, kujadikaye bua kuenza tshibilu tshia Dipita dia Maweja-Nangila. Kutumaye diyi bua bamiamine mashi ku biibi, bua mutumibue wa lufu kashipi banabute ba bena Izrayele.

²⁹Amu bua ditaba diabu, bena Izrayele kusabuka Mayi manene makunze bu mudibu benda mu buloba buume. Kadi pavua bena Ejipitu batete mua kusabuka, kudinabu mu mayi.

³⁰Amu bua ditaba, bimana bia Yeriko kupona panshi pavua bena Izrayele banyungulukila tshimenga matuku muanda mutekete.[81]

³¹Amu bua ditaba, Rakabe, mukaji muena tshiendenda, kavua mufue pamue ne bena tshimenga bavua babenge Mvidi Mukulu, bualu mukaji awu uvua muakidile batentekedi ne muoyi muimpe.

³²Nengambe tshinyi kabidi? Tshiena ne diba dia kumvuija malu a Ngideyone, a Barake, a Shimeshone, a Yefete, a Davide, a Samuwele ne a bambi.[82]

³³Bua ditaba diabu, kukuatabu matunga, kuenzabu malu makane, kupetabu tshivua Mvidi Mukulu mulaye. Kubuikilabu mukana mua ntambue,[83]

³⁴kujimabu tupia tukole, kupandukabu ku muele wa mvita. Batua kabayi dikanda kupetabu bukole. Bavua bilobu bia mvita. Kutshimunabu bikulu bia bantu ba bisamba bikuabu.

³⁵Amu bua ditaba diabu, bakaji kumona muvuabu bapingaje bafue babu bamane kubabisha ku bafue. Bavua bakengeshe bakuabu too ne ku lufu. Kadi bavua babenga bua bantu kababasungididi bua bamone mua kubika ku lufu, bapeta muoyi mupiamupia udi mutambe buimpe.

³⁶Bavua baseka bakuabu, babakuma mikaba, bavua basuika bakuabu ne nkanu, babela mu nzubu wa lukanu.[84]

³⁷Bavua bashipe bamue ne mabue, bapanda bakuabu ne nsele bipesa bibidi, anyi babashipa ne muele. Bavua baya eku ne eku bavuale biseba bia mikoku anyi bia mbuji. Bavua bapele. Bavua babakengesha, babanyanga bibi.

³⁸Buloba kabuvua buakanyine bantu abu! Bavua bendakana mu bipeta ne mu mikuna, basomba mu mbuebue ne mu mena mu buloba.

³⁹Bantu bonsu aba, Mvidi Mukulu uvua mubanyishe bua ditaba diabu. Kadi ka-bavua bapete tshivua Mvidi Mukulu mulaye.

⁴⁰Nanku, bu muvua Mvidi Mukulu mudianjile kutulongoluela malu mapite buimpe, kavua musue bua bafike ku bujima buabu tuetu katuyi nabu.