Read Tshiluba Ebrewu 13 Bible Online

Ebrewu 13 - Tshiluba bible

Ebrewu 13

¹Nunangangane ne dinanukila bualu nudi bana babu ne Kristu.

²Nuvuluke ne: nudi ne bua kuakidila bimpe benyi badi bamvuila. Bualu bamue bavua benze nanku bavua bakidile batumibue ba Mvidi Mukulu kabayi bamanye.[97]

³Nuenzele badi mu nzubu wa lukanu bu munutota mua kujinga bua banuenzele mu lukanu. Nuvuluke badibu bakengesha bualu nudi penu ne mubidi.

⁴Banemeke dibaka kudi bantu bonsu. Bena dibaka balamatangane. Mvidi Mukulu nealumbuluishe benji ba malu a bundu ne bena buendenda.

⁵Mu nsombelu wenu, kanuikadi ne lukuka lua biuma. Nusanke ne binudi nabi, bualu Mvidi Mukulu mmuambe ne: “Tshiena nkulekela, tshiena nkushiya nkayebe nansha kakese.[98]”

⁶Ke patudi tujadika ne muoyi mushindame ne: “Maweja-Nangila udi ungambuluisha, tshiena ntshina tshintu nansha tshimue. Tshidi muntu mua kungenzela ntshinyi?[99]”

⁷Vulukayi balombodi benu ba kale, bavua banumanyishe muaku wa Mvidi Mukulu. Nuvuluke muvuabu basombe panu, nuvuluke lufu luabu.[100] Nuidikije ditaba diabu.

⁸Yezu Kristu udi momumue makelela, lelu ne tshiendelele.

⁹Kanumbuki mu njila mulelela, bua kuitaba malongesha mashilangane adi kaayi etu. Bidi bimpe bua dinanga didi Mvidi Mukulu utunanga nadi dikoleshe muoyi wetu, mikenji idi itangila biakudia kayena mua kuenza nanku. Badi bitabe mikenji ya mushindu ewu, katshia kabena mua kupeta kantu nansha kakese.[101]

¹⁰Batuangaji badi benza mudimu muaba wa tshijila wa bena Yuda kabena mua kudia bidibu balambula pa tshilambuilu tshietu.[102]

¹¹Mutuangaji munene wa bena Yuda udi ubuela ne mashi a nyama muaba wa tshijila menemene bua kualambula bu mulambu wa kujimija nawu mibi. Kadi nyama eyi badi bayoshela ku mpenga kua mitanda.[103]

¹²Ke pavua Yezu kabidi mufuile pa mpenga pa tshimenga,[104] bua enze bena tshisamba tshiende bantu ba tshijila ku mashi ende.

¹³Nenku tuyayi kudiye ku mpenga kua mitanda, batupepeje muvuabu bamupepeje yeye.

¹⁴Bualu katuena ne tshimenga panuapa tshidi tshishala kashidi. Kadi tudi tukeba tshimenga tshidi kumpala.[105]

¹⁵Nanku batumbishe Mvidi Mukulu diba dionsu. Ke wetu mulambu utudi tumulambula kudi Yezu. Mmomumue ne: tusamune dina diende mukana muetu katuyi tulekela.

¹⁶Kanupu muoyi bua kuenza malu mimpe, kabidi bua kuambuishangana, bualu milambu ya nenku ke idi isankisha Mvidi Mukulu.

¹⁷Nutumikile balombodi benu, nubakokele. Bualu diba dionsu badi balame mioyi yenu, bualu Mvidi Mukulu neabalumbuluishe, neabele nkonku pa mudimu wabu. Panuikala babatumikile nebakumbaje mudimu wabu ne disanka. Tshianana nebaukumbaje ne dibungama. Abi kabiena mua kunupetesha kantu.

¹⁸Nutulombele kudi Mvidi Mukulu. Bualu tudi bajadike mudi kondu ketu ka munda kakayi katupisha, bualu tudi tujinga kuenza bimpe diba dionsu.

¹⁹Ndi nnusengelela ne: nundombele nangananga kudi Mvidi Mukulu, anyishe bua meme kupingana kunudi pa lukasa.[106]

²⁰Mvidi Mukulu uvua mubishe ku lufu Mfumu wetu Yezu, udi mulami munene wa mikoku, ku mashi a mulambu wende, adi ajadika ndondu wa tshiendelele.

²¹Mvidi Mukulu wa bupole anupe bukole bua kuenza malu onsu adi mimpe bua nukumbaje tshidiye musue. Enze munda muetu malu adi amusankisha, kudi Yezu Kristu, udi ne butumbi mu nkama ne nkama ya bidimu. Amene.

²²Bana hetu, ndi nnulomba ne: nuteleje ne lutulu miaku eyi ya kunukolesha nayi ku muoyi, bualu malu andi munufundile mu mukanda ewu kaena matambe bule.

²³Ndi musue bua numanye ne: mbakopole muanetu Timote[107]’ mu lukanu. Pafikaye lukasa, netufike nende bua kunumona.

²⁴Nuele balombodi benu bonsu muoyi, kabidi ne bantu bakuabu bonsu ba Mvidi Mukulu. Bana hetu ba mu Italiya[108] badi banuela mioyi.

²⁵Dinanga dia Mvidi Mukulu dishindame munda muenu bonsu.