Read Tshiluba Ebrewu 4 Bible Online

Ebrewu 4 - Tshiluba bible

Ebrewu 4

¹Mvidi Mukulu uvua mutulaye ne: nenubuele muaba undi munulongoluele bua nuenu kuikisha. Nanku tudimukayi, bua muntu wa kunudi kapangi kupeta muaba wa dikisha awu.

²Bualu bavua batumanyisha Lumu lua Disanka bu muvuabu batumanyishe bavua mu tshipeta. Bavua bumvua Lumu elu kabavua baluitabe.[21]

³Tuetu badi bitaba, netupete muaba wa kuikishila udi Mvidi Mukulu wamba ne: “Meme kutshidipa ne tshiji ne: Bantu aba kashidi kabena babuela mu ditunga dimvua mubalongoluele bua kuikisha.[22]” Uvua muambe miaku eyi nansha muvua mudimu wende mumane kujika bituadijile ku tshikondu tshivuaye mufuke bionsu.

⁴Bualu mu Mukanda wa tshijila, kaba kakuabu, bua dituku dia muanda mutekete, badi bamba ne: “Mvidi Mukulu kujikija mudimu onsu, kuikisha dituku dia muanda mutekete.[23]”

⁵Kaba mene aka Mvidi Mukulu udi wamba kabidi ne: “Kashidi kabena babuela mu ditunga dimvua mubalongoluele bua kuikisha.[24]”

⁶Bantu bavua badianjila kumvua Lumu lua Disanka, kabavua babuele muaba wa kuikisha ewu, bualu kabavua bitabe. Nanku bakuabu batshidi ne mushindu wa kubuelamu.

⁷Ke padi Mvidi Mukulu mujadike tshiakabidi dituku didiye ubikila ne: “lelu.” Uvua muteke dituku edi kunyima kua bidimu bivule mukana mua Davide, mu miaku itukavua bamane kufunda kulu ne: “Lelu, panudi numvua diyi dia Mvidi Mukulu, kanupapiji mioyi yenu.[25]”

⁸Bualu, bu Yoshuwa mupeteshe bantu muaba wa kuikisha[26] ewu, Mvidi Mukulu kavua mua kutela kunyima kua bidimu dituku dikuabu.

⁹Nenku, dikisha difuanangane ne divua Mvidi Mukulu muikishe dituku dia muanda mutekete, ditshidi dindila bantu ba Mvidi Mukulu.

¹⁰Bualu muntu yonsu udi ubuela muaba udi Mvidi Mukulu mulongolole bua kuikisha, udi ujikija mudimu wende, wikisha, muvua Mvidi Mukulu mujikije mudimu wende, muikishe.

¹¹Nenku, tuenzayi muetu muonsu bua tupete muaba wa dikisha ewu. Tukuate mudimu bua muntu nansha umue wa Mvidi Mukulu kapangi kutumikila, muvua bantu ba mu tshipeta bapange. Bualu diba adi kakupeta muaba wa dikisha ewu.

¹²Bualu muaku wa Mvidi Mukulu udi muoyi kabidi ne bukole. Udi mutue mupite muele wa nkanza. Udi ubuela too ne muaba udi muoyi wa muntu ne mueyelu bipetangana, too ne muaba udi manungu ne bongu bua mu mifuba bilengangana. Udi upisha nansha ubingisha majinga ne meji adi mu muoyi wa muntu.

¹³Kakuena kantu nansha kamue kadi mua kusokoma Mvidi Mukulu. Bintu bionsu, bifukibua bionsu bisanga bidi bimueneka patoke ku mesu kuende. Yeye ke utudi ne bua kuambila malu etu onsu.

¹⁴Nenku, tulaminayi momu ditaba ditudi tutonda. Bualu tudi ne mutuangaji mupite bunene, uvua mufike too ne ku mesu kua Mvidi Mukulu mene: ke Yezu, Muana wa Mvidi Mukulu.

¹⁵Katuena ne mutuangaji munene udi mupange kukenga netu mu butekete buetu. Kadi mutuangaji wetu munene, bavua bamuteta mu bionsu mudibu batuteta tuetu. Kadi yeye kavua muenze bubi.

¹⁶Nenku tusemenayi ne ditekemena dionsu ku nkuasa wa butumbi wa Mvidi Mukulu, muaba udiye utuleja ditunanga diende. Netupeteku dijimija dia mibi. Neatulejeku mudiye utunanga, bua tupete diambuluisha diba dionsu ditudi tudikengela.