Read Tshiluba Ebrewu 5 Bible Online

Ebrewu 5 - Tshiluba bible

Ebrewu 5

¹Mutuangaji munene yonsu mmusungule munkatshi mua bantu, bua kuenzela Mvidi Mukulu mudimu ne bua kuakuila bantu. Udi ulambula malambi ne milambu bua kujimija mibi.

²Bu mudiye yeye mene ne butekete bua bungi, udi mua kumvuila bena dipanga ne bena ntupakanyi luse.

³Bu mudiye mene muena butekete, udi ne bua kulambula milambu, ya kayiyi amu bua kujimija mibi ya bantu bakuabu, kadi kabidi ne bua kujimija yende mene.[27]

⁴Muntu nansha umue kena mua kudipesha lumu lua kuikala mutuangaji munene. Muntu udi mua kuikala mutuangaji amu padi Mvidi Mukulu umubikila ku mudimu awu bu muvuaye muenze ne Arone.

⁵Mmomumue kabidi, Kristu kena mudipeshe nkayende lumu lua kuikala mutuangaji munene. Kadi Mvidi Mukulu mmumuambile ne: “Wewe udi muananyi, bituadije lelu meme ndi Tatuebe.”

⁶Kaba kakuabu uvua muambe kabidi ne: “Newikale mutuangaji kashidi bu muvua Melkisedeke.[28]”

⁷Patshivua Yezu pa buloba, uvua ulomba Mvidi Mukulu, umutendakena, wela mbila mikole, ne binsonji ku mesu, kudi uvua mua kumusungila ku lufu.[29] Mvidi Mukulu kumuteleja bualu Yezu uvuaumutumikila.

⁸Nansha muvuaye Muana wa Mvidi Mukulu, uvua mulonge butumike mu makenga onsu avuaye nawu.

⁹Bamane kumufikisha ku bujima buende, ukadi mpokolu wa lupandu lua tshiendelele bua bantu bonsu badi bamutumikila.

¹⁰Ke Mvidi Mukulu kumuteka mutuangaji munene mushindu uvua Melkisedeke.

¹¹Tudi ne malu a bungi a kulongesha pa bualu ebu. Kadi mbikole bua tuetu kunujinguluilawu, bualu nudi ne lujoku ku diumvua.

¹²Matuku a bungi mmamane kupita, nukavua mua kuikala balongeshi. Kadi nutshidi nukengela banulongeshe malu a kumpala a miaku ya Mvidi Mukulu. Pa mutu pa kudia biakudia bikole, nutshidi nukengela kunua mabele.

¹³Utshidi unua mabele mmuana. Kena mua kujingulula bualu budi buimpe nansha budi bubi.

¹⁴Kadi biakudia bikole mbifundile bantu bakole. Bobu bakadi bibidile kujingulula bidi bimpe ne bidi bibi mu malu amonamonabu.