Read Tshiluba Ebrewu 7 Bible Online

Ebrewu 7 - Tshiluba bible

Ebrewu 7

¹Melkisedeke ewu uvua mukalenga wa Saleme, kabidi mutuangaji wa Mvidi Mukulu Muena kulu. Pavua Abrahame ufuma ku mvita mumane kutshimuna bakalenga, Melkisedeke kuya kusambakena nende, kumuela kabidi lupemba.

²Abrahame kumupesha tshia dikumi tshia bintu bionsu bivuaye nabi. Bualu bua kumpala, dina dia Melkisedeke didi diumvuija ne: “Mukalenga wa malu mimpe,” pashishe uvua mukalenga wa Saleme, mbuena kuamba ne: “Mukalenga wa bupole.[36]”

³Kabena bamanye tatuende wa Melkisedeke, nansha mamuende, nansha umue wa ku bankambua bende. Kabena batela muaba nansha umue diledibua diende, nansha lufu.[37] Udi mufuanangane ne Muana wa Mvidi Mukulu. Udi ushala mutuangaji kashidi.

⁴Nuamanya ne: muntu awu mmunene! Abrahame, nkambua wetu uvua mumupeshe tshia dikumi tshia bintu bionsu bivuaye mupawule mu mvita.

⁵Ba ku ndelanganyi ya Levi badi batuangaji, badi ne bukenji bilondeshile mikenji, bua kulomba tshia dikumi tshia bintu bionsu kudi bena Izrayele.[38] Mbuena kuamba ne: badi batshilomba ne kudi bana babu, nansha bobu bikale kabidi ndelanganyi ya Abrahame.

⁶Melkisedeke kavua wa ku ndelanganyi ya Levi nansha. Kadi uvua muangate kudi Abrahame tshia dikumi tshia bintu bi vua-ye nabi. Muntu uvua Mvidi Mukulu mulaye dilaya, Melkisedeke uvua mumuele kabidi lupemba.

⁷Bushiwa, muntu udi wela lupemba mmupite udiye wela lupemba.

⁸Ndelanganyi ya Levi, idi yangata tshia dikumi tshia bintu, mbantu badi bafua. Kadi padi Melkisedeke, wangata tshia dikumi atshi, badi batshiangata kudi muntu udi ne muoyi, mudi Mukanda wa tshijila wamba.

⁹Mu tshikosu, tuambe ne: pavua Abrahame mufile tshia dikumi tshia bintu biende, Levi (muena ndelanganyi idi yangata tshia dikumi) uvua mutshifile ne yeye kabidi.

¹⁰Tshikondu tshivua Melkisedeke muye kusambakena ne Abrahame, Levi ukavua munda mua mubidi mua nkambua wende Abrahame, nansha kabayi banji kumulela.

¹¹Butuangaji bua bena Levi ke mfuki wa mikenji ivuabu bapeshe bena Izrayele.[39] Nanku bu batuangaji ba bena Levi bafike ku bujima buabu, katuvua tukengela mutuangaji mukuabu, mutuangaji wa mushindu wa Melkisedeke, kayi wa mushindu wa Arone.

¹²Padi butuangaji bushintuluka, mikenji kabidi idi ishintuluka.

¹³Kadi Mfumu wetu, muena malu adibu bamba aa, uvua wa tshisamba tshikuabu. Muena tshisamba tshiende nansha umue katshia kavua muenze mudimu wa butuangaji ku tshilambuilu.

¹⁴Tudi bamanye bimpe ne: bavua balela mfumu wetu mu tshisamba tshia Yuda.[40] Pavua Moshe mufunde mikenji idi itangila batuangaji, kavua mutele tshisamba etshi ku bualu nansha bumue.

¹⁵Bualu budi bumvuija bionsu ebi patoke, mbobu ebu: mutuangaji mukuabu mmupatuke mufuanangane ne Melkisedeke.

¹⁶Kabena bamuteke mutuangaji bilondeshile mikenji idi itangila ndelanganyi ya bantu. Kadi mmupete butuangaji ebu ku bukole bua muoyi udi kauyi ndekelu.

¹⁷Bualu Mukanda wa tshijila udi wamba ne: “Wewe newikale mutuangaji kashidi mushindu uvua Melkisedeke.[41]”

¹⁸Nenku mbashipe mukenji wa kale, bualu kauvua ne bukole, kauvua ulengelela bantu.

¹⁹Bualu mikenji ya Moshe kayivua ifikisha bualu nansha bumue ku bujima buabu. Kadi ditekemena dipite buimpe difikile kutudi. Diodi ke didi ditusemeja pabuipi ne Mvidi Mukulu.

²⁰Mvidi Mukulu kabidi mmuditshipe! Bantu bakuabu mbapete butuangaji, kakuyi mutshipu wa nanku.

²¹Kadi pavua Mvidi Mukulu muteke Yezu mu butuangaji, uvua muditshipe, bualu mbafunde ne: “Maweja-Nangila mmuditshipe, nanku kena uvila bivuaye muambe ne: ‘Wewe newikale mutuangaji kashidi.[42]’ ”

²²Nenku, Yezu ke muntu udi utujadikila ne: nudi batue ndondu mipite buimpe.

²³Mudi dishilangana dikuabu kabidi: batuangaji bakuabu bavua ba bungi, bualu bavua ne bua kufua, kabayi mua kutungunuka ne mudimu wabu.

²⁴Kadi Yezu udi ne muoyi kashidi. Nenku mudimu wende wa butuangaji kabena ne bua kuupiana kudi muntu mukuabu.

²⁵Ke padiye mua kusungidila, mpindiewu ne matuku onsu, bonsu badi bapitshila kudiye bua kusemena pabuipi ne Mvidi Mukulu. Bualu yeye udi ne muoyi kashidi bua kubakuila kudi Mvidi Mukulu.

²⁶Nenku Yezu udi mutuangaji munene utuvua tukengela. Udi wa tshijila. Munda muende kamuena bualu bubi nansha bumue. Kena muenze tshilema nansha tshimue. Uvua mutapuluke ne benji ba malu mabi. Kumubandishabu ku mutu kua diulu.

²⁷Yeye kena bu batuangaji banene bakuabu. Kena ne bua kulambula milambu ku dituku ku dituku, diambedi bua mibi yende, pashishe bua ya bantu bakuabu[43] to. Uvua mulambule mulambu musangu umue bua kashidi, pavuaye mudilambule yeye mene.

²⁸Mikenji ya Moshe idi iteka bantu badi ne bilema mulongu wa batuangaji banene. Kadi miaku ya mutshipu wa Mvidi Mukulu ivuaye muambe kunyima kua mikenji, mmiteke Muana udi mufike ku bujima buende bua kashidi bu mutuangaji munene.