Read Tshiluba Ebrewu 8 Bible Online

Ebrewu 8 - Tshiluba bible

Ebrewu 8

¹Bualu butambe bunene butudi tukeba kumvuija, mbobu ebu: tudi ne mutuangaji munene wa nanku udi musombe mu diulu ku dia balume dia nkuasa wa butumbi wa Mvidi Mukulu,[44] wa bukole buonsu.

²Udi wenza mudimu wa butuangaji muaba wa Tshijila, mbuena kuamba ne: mu ntenta mulelela uvuabu kabayi base kudi bantu, kadi kudi Maweja-Nangila.

³Mutuangaji munene yonsu mmuteka bua kulambula malambi ne milambu. Nanku bidi bimpe bua mutuangaji wetu munene kabidi ikale ne tshintu tshia kulambula.

⁴Bu yeye mutshikale pa buloba, kavua mua kuikala nansha mutuangaji to. Bualu pa buloba batuangaji badi balambula milambu mudi mikenji ya bena Yuda yamba.

⁵Kadi mudimu udi batuangaji aba benza udi amu tshidikijilu ne mundidimbi bia bidi mu diulu. Bidi bifuanangana ne bivua bienzekela Moshe. Pavuaye ne bua kuasa ntenta, Mvidi Mukulu kumuambila ne: “Wenze bionsu bilondeshile tshilejilu tshimvua mukuleje pa mukuna.[45]”

⁶Kadi mpindiewu, Yezu mmupete mudimu mupite wabu. Bualu Yezu udi mutuangaji wa ndondu mupite bunene, udi mushindame pa malaya mapite buimpe.[46]

⁷Bu ndondu wa kumpala[47] kayi ne tshilema, kabavua ne bua kupingaja ndondu muibidi pa mutu pende to.

⁸Kadi Mvidi Mukulu uvua udiwula bantu bende, padiye wamba ne: “Maweja-Nangila udi wamba ne: matuku adi kumpala, nentue ndondu mupiamupia ne bena Izrayele, kabidi ne tshisamba tshia bena Yuda.

⁹Kakuikala bu ndondu umvua mutue ne bankambua babu, dituku dimvua mubakuate ku diboku, bua kubapatula mu Ejipitu. Kabavua balame ndondu ewu umvua mutue nabu. Nanku meme kubalengulula. Ke mundi meme Maweja-Nangila njadika nanku.

¹⁰Maweja-Nangila udi wamba ne: ndondu ungatua ne bena Izrayele kunyima kua matuku awu, udi nenku: Nenteke mikenji yanyi mu lungenyi luabu. Nenyifunde mu mioyi yabu. Nengikale Mvidi Mukulu wabu, bobu nebikale bantu banyi.

¹¹Muntu nansha umue wa kudibu kakulongesha muena kuabu, nansha muanabu, umuambila ne: ‘Umanye Maweja-Nangila!’ Bualu bonsu nebamumanye, kubangila ku muana mutekete too ne ku muntu mukole.

¹²Nembajimijile bilema biabu. Tshiena mvuluka kabidi mibi yabu.[48]”

¹³Padi Mvidi Mukulu utela ndondu mipiamipia, udi wandamuna ndondu wa kumpala, ushala wa kale. Kadi tshintu tshidi tshishala tshia kale, tshikulakaja, tshikadi pa kujimina.