Read Tshiluba Yakobe 1 Bible Online

Yakobe 1 - Tshiluba bible

Yakobe 1

¹Meme Yakobe, muena mudimu wa Mvidi Mukulu ne wa Mfumu Yezu Kristu, ndi ngela bantu bonsu ba Mvidi Mukulu badi batangalake pa buloba bujima mioyi.[1]

²Bana hetu, nudimone bena diakalenga menemene, padi makenga a mishindu yonsu anukuata.

³Bualu nudi bamanye ne: padibu bateta ditaba dienu, nudilama bimpe, nedinufikishe ku dinanukila.

⁴Kadi dinanukila dienu edi didi ne bua kudileja patoke mu malu onsu, bua nuikale bantu ba malu mimpe tshishiki, badi kabayi bakenga kantu.

⁵Kadi padi muntu wa kunudi ubula meji, aalombe kudi Mvidi Mukulu. Neamupeshewu,[2] bualu Mvidi Mukulu udi upesha bonsu ne kalolo kabidi ne disanka.

⁶Kadi aalombe ne ditaba, kayi wela mpata. Bualu muntu udi wela mpata mmufuanangane ne mavuala a mayi manene adi lupepele lujula, lutuma eku ne eku.

⁷Muntu wa nanku kena mua kutekemena kantu kudi Mfumu.

⁸Bualu muntu udi wela mpata, udi wenda utetuka mu bionsu bidiye wenza.

⁹Muanetu mupele asanke, bualu Mvidi Mukulu udi umubandisha kulu.

¹⁰Muanetu muena biuma asanke, bualu Mvidi Mukulu udi umupuekesha panshi. Bualu muena biuma neafube lukasa, bu tshilongu tshia mu mpata.

¹¹Diba didi dibanda ne luya luadi, diumisha bisosa. Tshilongu tshidi tshipona panshi, bulenga buatshi budi bujika.[3] Ke mudi muena biuma ujimina munkatshi mua midimu yende.

¹²Muntu udi ulama ditaba padibu bamuteta, mmuena diakalenga. Yeye mumane kuleja muoyi mukole, neapete nsala wa kalumbandi. Nsala awu ke muoyi udi Mvidi Mukulu mulaye bonsu badi bamunanga.

¹³Padibu bateta muntu, kambi ne: “Mvidi Mukulu udi unteta.” Bualu kabena mua kuteta Mvidi Mukulu kudi bubi. Yeye mene kena uteta muntu nansha umue.

¹⁴Kadi badi bateta muntu, padi majinga ende mabi amulobesha, amukuata mu buteyi.

¹⁵Pashishe majinga mabi adi akidila bubi munda, alela bubi. Padi bubi bumane kukola, budi bulela lufu.

¹⁶Bana hetu bananga, kanudishimi to.

¹⁷Mapa malenga onsu ne bintu bimpe bionsu bidi bituluka mu diulu, mbifuma kudi Mvidi Mukulu, Mufuki wa miendu ya mulu. Mvidi Mukulu kena ushintuluka; munda muende kamuena miidima; butoke buende kabuena bukepa.

¹⁸Ku disua diende mmutupe muoyi ku muaku wende mulelela, bua tupete muaba wa kumpala munkatshi mua bifukibua biende bionsu.

¹⁹Bana hetu basuibue, vulukayi bimpe bindi ngamba: muntu yonsu ateleje lukasa, kadi kena mua kuakula pa lukasa nansha. Kabidi kafiki munda lubilu.[4]

²⁰Bualu muntu ne tshiji, kena wenza malu adi Mvidi Mukulu musue.

²¹Nanku bengayi bibidilu bibi bionsu, ne malu mabi a mishindu yonsu. Nuanyishe ne bupuekele muaku udi Mvidi Mukulu ukuna mu mioyi yenu, bualu udi mua kunusungidila.

²²Kanudidingi: kanuena mua kuteleja muaku wa Mvidi Mukulu patupu, kanuyi nuenza mene bidiwu unulomba.

²³Bualu muntu udi uteleja muaku wa Mvidi Mukulu, kayi wenza bidiwu umuambila, udi mafuanangane ne muntu udi uditangila mu lumuenu, udimona muende mudiye.

²⁴Kadi yeye mumane kudimona nanku katupa, udi uya, upua muoyi diakamue muvuaye.

²⁵Kadi muntu udi ukenketa ne ntema mikenji mimpe idi itupikula, kayi uyiteleja patupu amu bua kuyipua muoyi, kadi uyenza, muntu awu Mvidi Mukulu neamuele lupemba mu midimu yende.

²⁶Padi muntu wela meji ne: ndi nnemeka Mvidi Mukulu, kayi ulama ludimi luende, udi udishima. Dinemeka diende dia Mvidi Mukulu kadiena ne mushinga nansha mukese.

²⁷Bantu badi banemeka Mvidi Mukulu Tatu menemene, ke badi bambuluisha bana ba nshiya, ne bakaji bakamba, mu makenga abu,[5] badilama ku bubi buonsu budi bufuma panu.