Read Tshiluba Yakobe 2 Bible Online

Yakobe 2 - Tshiluba bible

Yakobe 2

¹Bana hetu, nuenu badi bitaba Yezu Kristu, Mfumu wetu wa butumbi, kanuena mua kusungulujangana.[6]

²Tutele tshilejilu: muntu mubanji udi ubuela mu tshisangilu tshienu, muele kakanu ka tshiamu tshia mpawungi ku munu, muvuale bilamba bimpe. Kadi mupele, muvuale bilamba bisunsuke, kabidi udi ubuelamu.

³Nudi nupita kunemeka muntu udi muvuale bilamba bimpe, numuamba ne: “Sombela apa mu nkuasa muimpe.” Kadi nudi nuamba mupele ne: “Wewe imana kulu; nansha somba panshi ku makasa kuanyi eku.”

⁴Panudi nuenza nanku, nudi nusungululangana, nuleja kasungasunga kadi kafuma ku meji mabi.

⁵Bana hetu basuibue, telejayi: Mvidi Mukulu mmusungule bapele ba panu, bua bikale bena biuma mu ditaba, bapete Bukalenga buvua Mvidi Mukulu mulaye badi bamunanga.

⁶Kadi nuenu nudi nupetula bapele! Badi banukengesha, banufila miaba idibu balambuluisha bantu, ki mbena biuma anyi?

⁷Bobu ke badi bapenda dina dimpe didi Mvidi Mukulu munupe.[7]

⁸Bushuwa, nudi nuenza bimpe, panudi nutumikila mikenji ya Bukalenga, mudi Mukanda wa tshijila uyilongesha ne: “Unange muntu nebe, bu muudi mudinange.[8]”

⁹Kadi panuikala nusungululangana, nudi nuenza bibi. Mikenji idi inupisha, bualu kanuena nuyitumikila.

¹⁰Bualu padi muntu utumikila mikenji mikuabu, ulekela umue, udi ushipa mikenji yonsu.

¹¹Bualu uvua muambe ne: “Kuenji malu a bundu,” ke uvua muambe kabidi ne: “Kushipi muntu[9]” Nanku paudi wepuka buendenda, kadi ushipa muntu, udi ushipa mikenji.

¹²Akulayi, enzayi malu, bu bantu badibu ne bua kulumbuluisha kudi mikenji idi itupikula ku bupika.

¹³Bualu muntu uvua kayi mufuile muanabu luse, Mvidi Mukulu neamulumbuluishe, kayi umufuila luse. Muntu uvua muleje luse, udi mua kutekemena luse kudi Mvidi Mukulu, mumukosedi wa nsambu.

¹⁴Bana hetu, padi muntu wamba ne: “Ndi ngitaba,” kayi uleja ditaba mu bidiye wenza, neapete tshinyi? Ditaba dia nanku didi mua kumusungidila anyi?

¹⁵Tutele tshilejilu tshia muanenu wa balume, nansha wa bakaji. Padiye ukengela bivualu, nansha kayi ne biakudia bikumbane,

¹⁶wewe mumuambile ne: “Waya bimpe, uye kuvuala bilamba bia kupeta luya, udie, ukute!” kuyi umupesha bidiye ukengela, miaku yebe idi imulengelela ku tshinyi?

¹⁷Ke mudi kabidi ditaba. Padidi nkayadi, kadiyi didileja mu bitudi tuenza, ndifue.

¹⁸Kadi padi muntu wamba ne: “Muntu umue udi ne ditaba, mukuabu udi wenza malu,” nemmuandamune ne: “Undeje mudi muntu mua kuitaba, kayi wenza malu. Nanku meme nenkuleje ku bindi ngenza mundi ngitaba.”

¹⁹Udi witaba ne: Mvidi Mukulu udi amu umue. Bidi bimpe. Mikishi mibi idi itaba kabidi nanku, izakala ne bowa.[10]

²⁰Kadi wewe udi muntu mubule lungenyi! Udi musue bua nkujadikile ne: ditaba, didi kadiyi didileja mu bitudi tuenza, didi tshianana anyi?[11]

²¹Nkambua wetu Abrahame, Mvidi Mukulu mmumubingishe bua tshinyi? mBua bivuaye muenze, bualu uvua mulambule muanende Izake pa tshilambuilu.[12]

²²Udi mumone ne: ditaba dia Abrahame ne bivuaye muenze bidi bienda pamue. Ditaba diende divua dienda dishindama tshishiki ku malu avuaye wenza.

²³Ke miaku ya mu Mukanda wa tshijila kukumbanayi ne: “Abrahame uvua mutekemene kudi Mvidi Mukulu. Ke muvua Mvidi Mukulu mumubingishe bua ditaba diende.” Ke Mvidi Mukulu kumuinyika ne: “Mulunda wanyi.[13]”

²⁴Nanku nudi numona ne: Mvidi Mukulu udi ubingisha muntu bua malu adiye wenza, ki mbua ditaba nkayadi to.

²⁵Ke muvua Mvidi Mukulu mubingishe kabidi Rakabe, mukaji muena tshiendenda, bua bivuaye muenze. Bualu uvua muakidile bimpe batentekedi ba bena Yuda,[14] mubanyemeshile ku njila mukuabu.

²⁶Bualu bu mudi mubidi ufua padiwu kauyi ne mueyelu wa muoyi, ke mudi ditaba difua, padidi kadiyi didileja mu bitudi tuenza.