Read Tshiluba Yakobe 5 Bible Online

Yakobe 5 - Tshiluba bible

Yakobe 5

¹Mpindiewu ndi nnubela nuenu, bena biuma! Dilayi, nutue mikemu, bualu makenga neanukuate!

²Biuma bienu mbibole. Misuasua neyidie bilamba bienu.

³Biamu bienu bia mpawungi, ne biamu bienu bitoke bia mushinga mukole mbikuate dimoma.[21] Dimoma edi nedinupishe, dioshe mubidi wenu bu kapia. Tukadi matuku a nshikidilu. Nutshidi amu nukungija biuma!

⁴Kanuena bafute bena mudimu badi bakuate mudimu mu madimi enu.[22] Nuteleje mudibu badila muadi! Mvidi Mukulu Maweja-Nangila wa bukole buonsu mmumvue mbila ya badi banowe biakudia bienu.

⁵Nuvua basombe pa buloba mu biuma ne masanka. Nudi nudia nuondoloka. Kadi dituku dia kunushipa dikadi pabuipi.

⁶Nuvua bapishe, bashipeshe bantu bavua kabayi ne bualu, kabayi nansha banutuila nkanana.[23]

⁷Bana hetu, ikalayi ne lutuulu too ne pafika Mfumu. Monayi mudi tshidime windila ne lutuulu biakudia bidibu nabi dikenga menemene, too ne diba didi buloba mua kubipatula. Udi utekemena mvulambedi ne wa ndekelu.[24]

⁸Nuenu kabidi nulame lutuulu, nukoleshe muoyi, bualu dituku didi Mfumu ufika dikadi pabuipi.

⁹Bana hetu, lekelayi kubipishangana, bua Mvidi Mukulu kayi unupisha. Mukoshi wa nsambu ukadi pabuipi, ukadi pa kumueneka!

¹⁰Bana hetu, vulukayi bambi bavua balongesha mu dina dia Mfumu. Nulonde tshilejilu tshiabu, bualu bavua balame lutuulu mu makenga.

¹¹Tudi tubamba ne: mbena diakalenga, bualu bavua bananukile. Nukadi bumvue muvua Yobe mulame lutuulu, kabidi muvua Mfumu mumusankishe ku ndekelu. Bualu Mfumu udi muena dinanga ne luse.[25]

¹²Nangananga, bana hetu, panudi nulaya bualu, kanuditshipi, nutela diulu, buloba, nansha tshintu tshikuabu. Panudi nuitaba, nuambe amu ne: “Eyowa.” Panudi nubenga, nuambe amu ne: “To,” bua Mvidi Mukulu kanupishi.[26]

¹³Padi umue wa kunudi ne dikenga, atendelele. Padiye ne disanka, imbe musambu, atumbishe Mvidi Mukulu.

¹⁴Padi umue wa kunudi usama, abikile bakulu ba Tshisumbu tshia bena ditaba. Bamulombele kudi Mfumu, bamufite manyi mu dina dia Mfumu.[27]

¹⁵Panudi ntendelela ne ditaba, Mvidi Mukulu neapandishe mubedi, amupingajile bukole bua mubidi, ajimije mibi yende.

¹⁶Tondelanganayi mibi yenu. Nulombelangane kudi Mfumu, nanku nenupande. Ditendelela dia muntu udi wenza mudi Mvidi Mukulu musue, didi ne bukole bua bungi.

¹⁷Eliya uvua muntu bu tuetu. Kutendelelaye ne munanunanu bua mvula kaloki. Mvula nansha kuloka bidimu bisatu ne tshitupa.

¹⁸Pashishe kutendelelaye kabidi. Diulu kulokesha mvula, buloba kutolokesha bia pa madimi.[28]

¹⁹Bana hetu, pikala umue wa kunudi mupambuke mu njila wa bulelela, mukuabu mumupingaje mu njila muimpe,

²⁰mmanye ne: muntu udi mupingaje muena bubi mu njila muimpe, neamusungidile ku lufu, kabidi mibi yende mivule neyijimine.[29]