Read Tshiluba 1 Petro 5 Bible Online

1 Petro 5 - Tshiluba bible

1 Petro 5

¹Bindi ngakula mpindiewu, bidi bitangila bantu ba munkatshi muenu badi bakulu ba Tshisumbu tshia bena ditaba. Meme kabidi ndi mukulu. Mvua mumone ne anyi abidi makenga a Kristu. Nendisange kabidi nende mu butumbi buende bukadi pa kumueneka. Nanku ndi ngambila bakulu ne:

²nuludike bu balami ba nsongu mikoku idi Mvidi Mukulu munupe.[32] Mvidi Mukulu udi musue bua nuyilame bimpe ne muoyi wenu mujima, kanuyi ne tshimfulamuoyi. Nuenze mudimu muenu muonsu, kabidi ne disanka, kanuyi nukeba biuma.

³Kanukengeshi ne bumfumu bunudi nabu bantu badibu banupeshe bua nubalame. Kadi nubaleje tshilejilu tshimpe.

⁴Nanku pamueneka Mfumu wa balami ba mikoku, nenupete nsala wa butumbi, udi kashidi kayi ututuka.

⁵Nuenu kabidi bansonga, nutumikile bakulumpe. Kadi nuenu bonsu nudipuekeshe, nuambuluishangane. Bualu mbafunde mu Mukanda wa tshijila ne: “Mvidi Mukulu udi uluisha bena ditambisha. Kadi udi wambuluisha ne disanka badi badipuekesha.[33]”

⁶Nanku nudipuekeshe mu tshianza tshia bukole tshia Mvidi Mukulu, bua anubandishe tshikondu tshidiye musue.[34]

⁷Muomekelayi ntatu yenu yonsu, bualu Yeye udi unulama.[35]

⁸Ikalayi batabale, nudimuke! Bualu muluishi wenu diabolu udi bu nyama wa ntambue, ukungula, ukeba wa kudiaye.

⁹Nuikale bashindame mu ditaba, numutuile nkanana. Numanye ne: bana benu bena ditaba badi batangalake mu buloba bujima, badi bumvua makenga amu munudi nuenu numvua.

¹⁰Mvidi Mukulu mmunubikile bua nudisange nende mu butumbi buende bua kashidi, panudi nudisanga ne Kristu. Nanku nuenu bamane kukenga tshitupa tshikese, Mvidi Mukulu, mpokolu wa dinanga dionsu, neanuenze bantu ba tshijila. Neanushindike, anukoleshe bua kanutenkakanyi.

¹¹Yeye udi ne bukole kashidi tshiendelele! Amene.

¹²Silase,[36] undi ntangila bu muena ditaba netu wa muoyi umue, mmungambuluishe bua kufunda mukanda mukese ewu. Ndi musue kunukolesha ku muoyi, kunujadikila kabidi ne: nenumvue mu makenga dinanga didi Mvidi Mukulu ununanga nadi. Nushindame mu dinanga diende adi.

¹³Bena ditaba ba mu Tshisumbu tshidi mu Babilone, bavua Mvidi Mukulu musungule bu nuenu, badi banuela muoyi. Muananyi Marke kabidi udi unuela muoyi.[37]

¹⁴Nuelangane mioyi, nupukilangane bu bena muntu. Nuenu bonsu badi badisanga ne Kristu, Mvidi Mukulu anupe bupole buende.