Read Tshiluba 2 Petro 1 Bible Online

2 Petro 1 - Tshiluba bible

2 Petro 1

¹Meme Simone Petro, mupostolu ne muena mudimu wa Yezu Kristu, ndi mfundila bonsu bavua bapete ditaba dia mushinga mukole dia mushindu umue ne ditudi nadi. Nudi badipete ku disua dilenga dia Mvidi Mukulu wetu ne dia Musungidi Yezu Kristu.[1]

²Dinanga ne bupole bishindame bikole munda muenu. Nenubipete, panudi nuya kumpala mu dimanya dia Mvidi Mukulu, ne dia Mfumu wetu Yezu Kristu.

³Mvidi Mukulu ku bukole buende mmutupe bionsu bitudi tukengela, bua tumone mua kukumbaja bidiye musue. Bualu bavua batumanyishe mudiye mutubikile, bua tudisange nende mu butumbi,[2] ne mu buimpe buende.

⁴Ke padiye mutulaye mapa manene a mushinga mukole, bua tuetu, bamane kupeta mapa aa, tumone mua kuepuka majinga mabi a panu, adi atufikisha ku lufu, tudisange ne Mvidi Mukulu udi wa kashidi.

⁵Ke munudi mua kuenza muenu muonsu, bua nusakidile ku ditaba dienu nsombelu mulenga, ku nsombelu wenu mulenga dimanya,

⁶ku dimanya didikolela, ku didikolela dinanukila, ku dinanukila dinemeka Mvidi Mukulu,

⁷ku dinemeka Mvidi Mukulu diumvuangana dia buena muntu, ku diumvuangana dia buena muntu dinanga.

⁸Ke malu mimpe anudi ne bua kuikala nawu. Nuenu bikale nawu a bungi, neanuambuluishe bua Yezu Kristu, unudi bamanye, akuate mudimu munda muenu, anufikishe ku dikuama bimuma.

⁹Kadi udi kayi nawu, kena umona kule to. Udi bu mpofu. Kena uvuluka mukuabu bamujimijile mibi yende ya kale.

¹⁰Bana hetu, Mvidi Mukulu mmunubikile, mmusungule. Nanku enzayi muenu muonsu bua makanyine dibikila edi. Nuenu benze nanku, kanuakupambuka mu njila mululame.[3]

¹¹Ke munudi mua kubuela mu Bukalenga bua kashidi bua Mfumu wetu ne Musungidi Yezu Kristu.

¹²Ke pandi nnuvuluija malu aa matuku onsu, nansha nuenu bamane kuamanya, bashindame mu bulelela bunudi bapete.

¹³Bualu pantshidi ne muoyi apa, ndi ne bua kunuvuluija amu kunuvuluija malu aa.

¹⁴Ndi mumanye ne: nkadi pa kushiya mubidi udi ufua ewu. Mfumu wetu Yezu Kristu mmummanyishe nanku.

¹⁵Ke mundi ngenza mpindiewu muanyi muonsu, bua numone mua kuvuluka kashidi malu aa, nansha meme mumane kufua.

¹⁶Patuvua banumanyishe ne: Mfumu wetu Yezu Kristu neafike ne bukole buende, katuvua banulondele nsumuinu ifuma ku budimu bua bantu. Kadi tuvua badimuene butumbi buende ne etu abidi.

¹⁷Diba divuaye mupete lumu ne butumbi kudi Mvidi Mukulu Tatu, tuvuapu. Diyi divua difuma ku butumbi bua kulu, diamba ne: “Ewu ke Muananyi undi munange. Udi unsankisha bikole.”

¹⁸Patuvua ne Yezu pa mukuna wa tshijila, tuetu mene tuvua bumvue diyi edi difuma mu diulu.[4]

¹⁹Bu mutuvua bumvue miaku eyi, tudi bajadike bimpe menemene ne: meyi avua bambi batumanyishe kale adi malelela. Nanku panudi nuavuluka ne ntema, nudi nuenza bimpe, bualu adi bu muendu udi utema muaba wa miidima, too ne padi butuku butshia, too ne padi mutotu wa nkesha ukenkesha mioyi yenu.

²⁰Kadi nuvuluke nangananga ne: muntu nansha umue kena mua kumvuija ku lungenyi luende nkayende miaku ya bambi, ivuabu bafunde mu Mikanda ya tshijila.[5]

²¹Bualu bivua bambi batumanyishe kabivua bifuma ku disua nkayadi dia muntu. Kadi bambi bavua bakula mu dina dia Mvidi Mukulu, bualu Mueyelu wa Tshijila uvua ubaludika.